ކެލިފޯނިއާގެ ސެން ފްރެންސިސްކޯ ބޭ އޭރިއާގައި ކުރިއަށްދާ ހަވަނަ ކެރަމް ވޯލްޑް ކަޕްގެ ޓީމު އިވެންޓްގެ ސެމީ ފައިނަލަށް ދިވެހިރާއްޖޭގެ އަންހެން އަދި ފިރިހެން ޓީމު ދަތުރުކޮށްފި އެވެ.
މި މުބާރާތުގެ ސެމީ ފައިނަލްގައި ދިވެހި ޓީމު ވާދަކުރާނީ ސްރީލަންކާގެ ޓީމާ ދެކޮޅަށެވެ.
އެމެރިކާގެ ކެރަމް އެސޯސިއޭޝަން (ޔޫއެސްސީއޭ) އާއި އިންޓަނޭޝަނަލް ކެރަމް ފެޑެރޭޝަން (އައިސީއެފް) ގުޅިގެން އިންތިޒާމްކޮށްގެން ބާއްވާ މި މުބާރާތް ނިމޭނީ މި މަހުގެ 17 ވަނަ ދުވަހު އެވެ.
ދިވެހިރާއްޖޭގެ ގައުމީ ޓީމުގެ ފިރިހެން ސްކޮޑުގައި ހިމެނެނީ އިސްމާއިލް އަޒްމީން، އިބްރާހިމް ހުޖާން އަލީ، ހަސަން ނާޒިމް، މުޙައްމަދު މުންތަސިރު އަދި ހާތިމް ހަލީލް އެވެ. އަންހެން ޓީމުގައި ހިމެނެނީ އައިމިނަތު ވިދާދް، އައިޝަތު ނަހުފާ، އައިޝަތު ފައިނާޒް، ފާތިމަތު ރަޔާނާ އަދި އައިމިނަތު ޝުބާ އާދަމް އެވެ.
އެންމެ ފަހުން ބޭއްވި ބައިނަލްއަގުވާމީ މުބާރާތް ކަމުގައިވާ، މިދިޔަ އޭޕްރީލް މަހު ރާއްޖޭގައި ބޭއްވި ހަވަނަ އޭޝިއަން ކެރަމް ޗެމްޕިއަންޝިޕްގައި ދިވެހި ޓީމުތަކުން ވަނީ ފާހަގަކޮށްލެވޭ ކާމިޔާބީތަކެއް ހޯދާފަ އެވެ. އެގޮތުން ފިރިހެން ޓީމުން ރިހި މެޑެލް ހޯދިއިރު، އަންހެން ޓީމުން ލޯ މެޑެލް ހޯދި އެވެ. އަދި ޑަބަލްސް އިވެންޓުން އަޒްމީން އާއި ނާޒިމްގެ ޕެއާވެސް ވަނީ ރިހި މެޑެލް ހާސިލުކޮށްފަ އެވެ.
މިހާރު ކުރިއަށްދާ ވޯލްޑް ކަޕްގައި އޯޕަން ސިންގަލްސް، އޯޕަން ޑަބަލްސް، ޓީމު އިވެންޓް އަދި ސްވިސް އިވެންޓްގެ އިތުރުން ޔޫއެސް އޯޕަން އިންވިޓޭޝަނަލް މުބާރާތްވެސް ކުޅުމަށް ވަނީ ހަމަޖެހިފަ އެވެ.