ފ. ނިލަންދޫގެ ނަރުދަމާ ނިޒާމު 540 ދުވަސްތެރޭގައި ގާއިމުކުރުމަށް އެމްޑަބްލިއުއެސް.ސީ އާއި ހަވާލުކޮށްފި އެވެ.
ނިލަންދޫގެ ނަރުދަމާގެ މައްސަލަ ހައްލުކުރުމަށް މުޅިން އާ ޒަމާނީ ނިޒާމެއް ގާއިމުކުރުމަށް ނިންމާފައިވާ ކަމަށް އެމްޑަބްލިއުއެސްސީގެ މެނޭޖިން ޑިރެކްޓަރު އަބްދުލް މަތީން މުހައްމަދު ކުރިން ވިދާޅުވެފައިވެ އެވެ.
ނިލަންދޫގައި ގާއިމުކޮށްފައިވާ ނަރުދަމާ އަކީ މީގެ 17 ވަރަކަށް އަހަރު ކުރިން އެރަށުގައި ބޭނުންކުރަން ފެށި ނިޒާމެކެވެ. މިއީ ރާއްޖޭގައި އާއްމުކޮށް އަޅާ ނަރުދަމާ ނިޒާމުގެ މޮޑެލާއި ތަފާތުކޮށް، ނެދަލޭންޑްގެ ކުންފުންޏަކާ ހަވާލުކޮށްގެން އަޅާފައިވާ ވެކިއުމް ނަރުދަމާ ނިޒާމެކެވެ.
ނިލަންދޫގެ ނަރުދަމާ ނިޒާމަކީ ދުވަސްވީ ނިޒާމަކަށްވެފައި، އެ ނިޒާމު ރަނގަޅަށް ނުބެލެހެއްޓުމުގެ ސަބަބުން ގިނަ މައްސަލަތަކަކާ ވަނީ ކުރިމަތިވެފަ އެވެ.
މައުލޫމާތު ލިބިފައިވާ ގޮތުގައި ވެކިއުމް ސިސްޓަމް އަދި ނަރުދަމާ ވިއުގައިން ރަނގަޅަށް ފެން ނުދާތީ މަގުތަކަށް ނަޖިސް ބޭރުވުމުގެ މައްސަލަ އެރަށުގައި ވަނީ ބޮޑުވެފަ އެވެ. އެމައްސަލަ ހައްލުނުވުމުގެ ސަބަބުން ރަށުގެ މަގުތަކުގައި ވަޅުގަނޑު ހަދައިގެން ފެން ބޭރުކުރަން ރައްޔިތުންނަށް މަޖުބޫރުވާ ހިސާބަށް އެމައްސަލަ ގޯސްވެފައިވެ އެވެ.
ނިލަންދޫގެ ނަރުދަމާ ބެލެހެއްޓުމުގެ މަސައްކަތް 2019 ވަނަ އަހަރު ފެނަކައާއި ހަވާލުކޮށްފައިވެ އެވެ. ނަމަވެސް މި ނިޒާމަކީ ރާއްޖޭގައި އާންމުކޮށް ބޭނުންކުރާ ނަރުދަމާއާއި ތަފާތު ނިޒާމަކަށްވުމުން، ވިއުގަ ރަނގަޅަށް ނުބެލެހެއްޓި ގިނަ މައްސަލަތަކެއް ދިމާވި އެވެ. މިއާއެކު ރައްޔިތުންނަށް ވަނީ އެތައް ތަކުލީފެއް އުފުލަން ޖެހިފަ އެވެ.
މި މައްސަލައަށް ވަގުތީ ހައްލެއް ހޯދައިދިނުމުގެ ގޮތުން އެރަށަށް ޖަންކްޝަން ހިއްކާ ބައުޒަރެއް ގެންގޮސް އަންނަނީ ބޭނުންކުރަމުންނެވެ.