މާލެ ވޯޓާ އެންޑް ސްވެރެޖް ކޮމްޕެނީ (އެމްޑަބްލިޔުއެސްސީ) އިން 400 މިލިއަން ރުފިޔާގެ ބޮންޑެއް ތައާރަފުކޮށް އިންވެސްޓް ކުރުމުގެ ފުރުސަތު ހުޅުވާލައިފި އެވެ.
ކެޕިޓަލް މާކެޓަށް މި ބޮންޑް ނެރެދިން ފަސްޓް ނޭޝަނަލް ފައިނޭންސް ކޯޕަރޭޝަނުން ބުނީ މި ބޮންޑު ވިއްކާނީ ދެ މަރުހަލާއަކަށް ބަހާލައިގެން ކަމަށެވެ.
ފުރަތަމަ މަރުހަލާގައި ވިއްކާ 200 މިލިއަން ރުފިޔާގެ ބޮންޑްގައި އިންވެސްޓް ކުރުމުގެ ފުރުސަތު އެމްޑަބްލިޔުއެސްސީގެ ވިޔަނި ޕޯޓަލް މެދުވެރިކޮށް މިހާރު ވަނީ ހުޅުވާލާފަ އެވެ.
ފަސް އަހަރަށް އިޝޫ ކުރާ މި ބޮންޑުގައި އިންވެސްޓް ކުރާ ފަރާތްތަކަށް 7.5 ޕަސެންޓުގެ އިންޓަރެސްޓް ލިބެ އެވެ.
އެމްޑަބްލިއުއެސްސީ އިން ބޮންޑް ވިއްކަން ނިންމީ އެ ކުންފުނީގެ ކުރިއަށް ހުރި މަޝްރޫއުތަކާއި ފައިނޭންސް ހޯދުމެވެ.
ބޮންޑް ވިއްކައިގެން ލިބޭ ފައިސާ އިން އެމްޑަބްލިއުއެސްސީގެ އުފެއްދުންތެރިކަމާއި ގާބިލުކަން އިތުރު ކުރެވޭނެ ކަމަށްވެސް ފަސްޓް ނޭޝަނަލް ފައިނޭންސް ކޯޕަރޭޝަނުން ބުންޏެވެ.