މާލެ ސަރަހައްދުގައި ފެން އުފައްދާ ކެޕޭސިޓީ ދެ ގުނަ އިތުރުކުރުމަކީ އަމާޒެއް ކަމުގައި އެމްޑަބްލިއުއެސްސީގެ މެނޭޖިން ޑިރެކްޓަރު އަބްދުލްމަތީން މުހައްމަދު ވިދާޅުވެއްޖެ އެވެ.
ދައުލަތުގެ މީޑިއާއަށް ދެއްވި އިންޓަވިއުއެއްގައި އަބްދުލްމަތީން ވިދާޅުވީ މާލެ އާއި ހުޅުމާލޭގައި ފެން އުފައްދާ އިތުރު ޕްލާންޓްގެ މަސައްކަތް ފެށުމަށް ތައްޔާރުވެފައިވާ ކަމަށެވެ.
"ހުޅުމާލޭގައި 5000 ޓަނުގެ ޕްލާންޓެއް އަދި މާލޭގައިވެސް 5000 ޓަނުގެ ޕްލާންޓެއް މި ހޯދަނީ،" އަބްދުލްމަތީން ވިދާޅުވި އެވެ.
އަބްދުލްމަތީން ވިދާޅުވީ މި މަޝްރޫއު މި އަހަރު ފުރިހަމަ ކުރުމަކީ އަމާޒެއް ކަމުގަ އެވެ.
މި ޕްލާންޓާއެކު މާލޭގައި ފެން އުފައްދާ ކެޕޭސިޓީއަށް އިތުރު 30 ޕަސެންޓް އިތުރުކުރެވޭނެ ކަމަށްވެސް އޭނާ ވިދާޅުވި އެވެ.
މާލެ ސަރަހައްދުގައި ފެނުގެ ހިދުމަތް ދިނުމަށް މިހާރު ގާއިމުކޮށްފައިވާ ޕްލާންޓްތަކުން ދުވާލަކު 20،000 ޓަނުގެ ފެން އުފައްދަ އެވެ.
މާލެ ސަރަހައްދުގައި ފެން އުފައްދާ ކެޕޭސިޓީ އިތުރުކުރާއިރު ސިނަމާލެ ބްރިޖުގެ އަރިމަތިން ހޮޅިއެއް އަޅައި މާލެ އާއި ހުޅުމާލޭގެ ފެނުގެ ވިއުގަ ގުޅާލުމުގެ މަސައްކަތްވެސް ދަނީ ކުރަމުންނެވެ.
މި ވިއުގައިގެ މަސައްކަތް ނިމުމުން ގަޑިއަކު 800 ޓަނުގެ ފެން މާލެ އާއި ހުޅުމާލެ ދެމެދު ފޯރުކޮށްދެވޭނެ އެވެ.