ހުޅުމާލެ ހޮސްޕިޓަލްގައި އަލަށް ތައާރަފްކުރި ހިދުމަތްތަކާއެކު، ޓާޝަރީ ފެންވަރަށް ހިދުމަތްދޭ ހޮސްޕިޓަލެއްގެ ގޮތުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު، އެތަން ހުޅުއްވައިދެއްވައިފި އެވެ.
ހުޅުމާލެ ހޮސްޕިޓަލްގައި މިއަދު ހަވީރު އޮތް ރަސްމިއްޔާތުގައި ރައީސުލްޖުމްހޫރިއްޔާ ވަނީ ހުޅުމާލެ ހޮސްޕިޓަލްގެ އޮޕަރޭޝަން ތިއޭޓަރު ކޮމްޕްލެކްސް، އައިސީޔޫ.، އެންއައިސީ.ޔޫ އަދި ސީއެސްޑީ ހިދުމަތްތަކާއެކު އެ ހޮސްޕިޓަލް ޓާޝަރީ ފެންވަރަށް ހިދުމަތްދޭ ހޮސްޕިޓަލެއްގެ ގޮތުގައި ހުޅުއްވައިދެއްވާފަ އެވެ.
މި ހިދުމަތްތަކާއެކު ހޮސްޕިޓަލް ހުޅުއްވައިދެއްވުމަށްފަހު ރައީސުލްޖުމްހޫރިއްޔާ ވަނީ ހޮސްޕިޓަލްގައި އަލަށް ތައާރަފް ކުރި ހިދުމަތްތަކާ ބެހޭ ވީޑިއޯ ރިޕޯޓު ބައްލަވާލައްވައި، އޮޕަރޭޝަން ތިއޭޓާ ކޮމްޕްލެކްސް، އައިސީޔޫ. އެންއައިސީޔޫ. އަދި ސީއެސްޑީ ބައްލަވާލައްވައި، އެތަންތަނުން ދޭ ހިދުމަތްތަކާ ބެހޭ މައުލޫމާތު އޮޅުންފިލުއްވާފަ އެވެ.
މިރަސްމިއްޔާތުގައި ހުޅުމާލެ ހޮސްޕިޓަލް ޓާޝަރީ ފެންވަރުގައި ހިންގުމުގެ ރަޖިސްޓްރޭޝަން އަދި އޮޕަރޭޓިން ލައިސަންސް އެ ހޮސްޕިޓަލާ ހަވާލުކުރައްވާފައިވެ އެވެ.