ގުޅީފަޅު ބިން ހިއްކުމުގެ މަޝްރޫއު ނިމިފައިވާ ކަމަށް ސަރުކާރުން ބުނެފި އެވެ.
ސަރުކާރުގެ ފަރާތުން މިކަން ހާމަކުރީ ސަރުކާރަށް އެއް އަހަރު ފުރުން ފާހަގަކުރުމަށް ކޮންސްޓްރަކްޝަން މިނިސްޓްރީ ސޯޝަލް މީޑިއާއަށް އިއްޔެ ދޫކޮށްލި ވީޑިއޯއެއް ގައެވެ.
ގުޅީފަޅުގެ 42 ހެކްޓަރު، މާޗް 2020 ގައި ހިއްކާފައިވާއިރު ދެވަނަ ފިޔަވަހީގެ 132 ހެކްޓަރު މި އަހަރުގެ އެޕްރީލް މަހު ހިއްކާ ނިންމާފައިވާ ކަމަށް އެ މިނިސްޓްރީން ކުރިން އޮތީ ބުނެފަ އެވެ.
"ގުޅީފަޅު ބިންހިއްކުމުގެ މަޝްރޫއުގެ 100 ޕަސެންޓް މިހާރު ވަނީ ނިމިފަ،" ކޮންސްޓްރަކްޝަން މިނިސްޓްރީން ބުނެފައިވެ އެވެ.
އެ މިނިސްޓްރީން ބުނި ގޮތުގައި ހިއްކި ސަރަހައްދު ހިމާޔަތްކުރުމުގެ މަސައްކަތުގެ 2.66 ކިލޯމީޓަރު ވަނީ ނިމިފަ އެވެ.
ރައީސް ޑރ. މުހައްމަދު މުއިއްޒުގެ ސަރުކާރުން ވަނީ އެމްޑީޕީ ސަރުކާރުން ގުޅިފަޅު ހިއްކަން ކަނޑައެޅި ސަރަހައްދުގެ ތެރެއަށް އިތުރު 85 ހެކްޓަރު އިތުރުކުރަން ނިންމާފަ އެވެ.
ގުޅީފަޅު ބިން ހިއްކުމުގެ މަޝްރޫއު ނިމިފައިވާ ކަމަށް ކޮންސްޓްރަކްޝަން މިނިސްޓްރީން ބުނި ނަމަވެސް ހައުސިން މިނިސްޓަރު އަލީ ހައިދަރު މިމަހުގެ ނުވަވަނަ ދުވަހުގެ ރޭ ދައުލަތުގެ މީޑިއާގައި ދެއްކެވި ވާހަކަތަކަށް ބަލާއިރު ގުޅިފަޅު ހިއްކާ ނިމިފައިވާ ކަމަށް ސުވާލު އުފެދެ އެވެ.
ދައުލަތުގެ މީޑިއާގައި އަލީ ހައިދަރު މިމަހުގެ ނުވަވަނަ ދުވަހުގެ ރޭ ވިދާޅުވީ ގުޅިފަޅުގެ އެންމެ ފުން ސަރަހައްދު ވަރަށް އަވަހަށް ހިއްކަން ފަށަން ތައްޔާރުވަމުންދާ ވާހަކަ އެކެވެ. ހައިދަރު މި ވާހަކަ ވިދާޅުވިތާ އަދި ފާއިތުވެ ދިޔައީ އެންމެ 8 ދުވަހެވެ.