އުއްތަމަ ފަނޑިޔާރާއި ކޯޓުތަކުގެ އިސް ފަނޑިޔާރުން ރަށުން ބޭރަށް ވަޑައިގަންނަވާނަނަމަ ޖުޑިޝަލް ސާވިސް ކޮމިޝަން (ޖޭއެސްސީ)އަށް އަންގަންޖެހޭ ގޮތަށް ހަމަޖައްސައިފި އެވެ.
ޖޭއެސްސީ އިން އާއްމު ކުރި ބަޔާނެއްގައި ބުނެފައިވަނީ ހަފްތާ ބަންދު ދުވަސްތަކާއި ރަސްމީ ބަންދު ދުވަސްތަކުގައި ރަށުން ބޭރަށް ނުވަތަ ރާއްޖެއިން ބޭރަށް އުއްތަމަ ފަނޑިޔާރު ނުވަތަ އިސްފަނޑިޔާރުން ވަޑައިގަންނަވާނަމަ ޖޭއެސްސީއަށް އެކަން އަންގަންޖެހޭނެ ކަމަށެވެ.
ޖޭއެސްސީ އިން ބުނީ ކޮންމެ ފަނޑިޔާރަކުވެސް އޭނާގެ ހުރިހާ ވަގުތެއް އެކަމަށް ހުސްކުރަންވާނެ ކަމަށް ގާނޫނު އަސާސީ އާއި ފަނޑިޔާރުންގެ ގާނޫނު އަދި ފަނޑިޔާރުންގެ ސުލޫކީ މިންގަނޑުގައި ބަޔާން ކޮށްފައިވާތީ ހަފްތާ ބަންދާއި ރަސްމީ ބަންދު ދުވަސްތަކުގައި ވެސް ފަނޑިޔާރުން އައްޔަންކޮށްފައިވާ ކޯޓު / ދާއިރާ ނުވަތަ ރާއްޖެއިން ބޭރަށް ވަޑައިގަންނަވާނަމަ އެކަން އަންގަން ޖެހޭނެ ކަމަށެވެ.
ޖޭއެސްސީ އިން އިތުރަށް ބުނީ އުއްތަމަ ފަނޑިޔާރާއި ހައި ކޯޓުގެ އިސް ފަނޑިޔާރާއި ދަށު ކޯޓުތަކުގެ އިސް ގާޒިން އަދި އިސް މެޖިސްޓްރޭޓުން ރަށުން ބޭރަށް ވަޑައިގަންނަވާނަމަ އަންގަން ޖެހެނީ ޖޭއެސްސީއަށް ކަމަށެވެ. އަދި އުއްތަމަ ފަނޑިޔާރު ފިޔަވައި ސުޕްރީމް ކޯޓުގެ ފަނޑިޔާރުން ރަށުން ބޭރަށް ވަޑައިގަންނަވާނަމަ އެކަން އުއްތަމަ ފަނޑިޔާރަށް އަންގަން ޖެހޭއިރު، ހައި ކޯޓުގެ ފަނޑިޔާރުން ރަށުން ބޭރަށް ވަޑައިގަންނަވާނަމަ އެ ކޯޓުގެ އިސް ފަނޑިޔާރަށް އަންގަން ޖެހޭނެ ކަމަށްވެސް އެ ސާކިއުލާގައިވެ އެވެ.