ދިވެހި ގައުމިއްޔަތުގެ އިސްވަރުގެ މަސައްކަތް ރަސްމީކޮށް ފެށުން ވެގެންދާނީ ދިވެހި ގައުމިއްޔަތަށް ހޭލުންތެރި އާ ޒަމާނެއް އައުންކަމުގައި ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުހައްމަދު ވިދާޅުވެއްޖެ އެވެ.
ރައީސުލްޖުމްހޫރިއްޔާގެ އަނބިކަނބަލުން މިހެން ވިދާޅުވީ ދިވެހި ގައުމިއްޔަތުގެ އިސްވަރުގެ އޮފީސް ހުޅުވުމުގެ ރަސްމިއްޔާތު މިއަދު ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ.
މެޑަމް ސާޖިދާ ވިދާޅުވީ ދިވެހި ގައުމިއްޔަތުގެ އިސްވަރުގެ މަސައްކަތް ރަސްމީކޮށް ފެށުމުން ދިވެހި ގައުމިއްޔަތަށް ހޭލުންތެރިކުރުވުމުގެ އާ ހަރަކާތްތެރިކަމެއްގެ ފެށި އެކަމުގެ ސަބަބުން ގައުމާ މެދު ހެޔޮ ވިސްނުންތަކެއް އުފެދި، އުފާވެރި މާދަމާއަކަށް ޖާގަ ތަނަވަސްވާނެ ކަމަށެވެ.
"މި ވަގުތަކީ ދިވެހި ގައުމިއްޔަތަށް އާ ދިރުމެއް ލިބޭ ވަގުތެއް. ދިވެހި ގައުމިއްޔަތަކީ ދިވެހީންގެ މާތްވެގެންވާ އިސްލާމްދީނާއި، ދިވެހީންގެ މާދަރީ އަމިއްލަ ދިވެހި ބަހާއި، ސަގާފަތާއި ތަރިކައާއި އާދަކާދައާއި، ސިލްސިލާކޮށް ގުޅެމުން ވާރުތަވަމުން އަންނަ ދިވެހީންގެ ހަނދާންތަކާއި ތަޖުރިބާތައް،" މެޑަމް ވިދާޅުވި އެވެ.
ސާޖިދާ ވިދާޅުވީ ދިވެހި ގައުމިއްޔަތު ދިރިގެން އައުމަކީ ދިވެހީން މާތްވެގެންވާ އިސްލާމްދީނުގެ އަހްލާގީ ގަހަނާއިން ޒީނަތްތެރިކޮށް، ދިވެހީންނަށް ދިވެހީންގެ އަމިއްލަ ބަހާއި ސަގާފަތާއި އާދަކާދައިގެ އަގުތައް މޭރުންވެގެންދާނެ ކަމެއް ކަމަށެވެ. އަދި ދިވެހީންނަކީ ތަހުޒީބު ހަރުދަނާ ވިސްނުންތެރި ބަޔަކު ކަމުގައިވުމުގެ އިތުރުން ދިވެހީންގެ ފަސްގަނޑާއި ދިވެހީންނާއި ދިވެހި ދައުލަތުގެ ދެމިއޮތުން ކަށަވަރުކުރުމުގެ އިލްމީ ފިކުރު ދިވެހީންގެ ވިސްނުމުގައި ހަރުލަމުން، އަށަގަންނަމުން އެ ކަމަށް އަހުލުވެރިވަމުން ދިއުމަކީވެސް ދިވެހި ގައުމިއްޔަތުގެ ބައެއް ކަމުގައި ވިދާޅުވި އެވެ.
"ދިވެހި ގައުމިއްޔަތުގެ އިލްމަކީ ދިވެހީންގެ ދެމިތިބުމާ ގުޅިފައިވާ އިލްމެއް،" ސާޖިދާ ވިދާޅުވި އެވެ.
މެޑަމް ވިދާޅުވީ ކޮންމެ ގައުމެއްގައިވެސް އެ ގައުމެއްގެ ގައުމިއްޔަތެއް އޮންނާނެ ކަމަށާއި، އެގޮތުން ދިވެހި ގައުމިއްޔަތު ނުވަތަ ދިވެހީން ގަބޫލުކުރާ ގޮތްތަކާއި ހަމަތަކަކީ، ދިވެހި ދަރީންގެ ގައުމީ ވިސްނުން ބިނާވާންޖެހޭ އަސާސްތައް ކަމަށެވެ. އަދި އިލްމީ ގޮތުން ދިވެހި ގައުމާ އެއްކޮޅަށް ވިސްނަން އެނގޭ، އަމިއްލަ ނަފްސާއި އަމިއްލަ ގައުމަށް ގަދަރުކުރަން އެނގޭ ޖީލެއް ބިނާވުމުގެ މަގުތައް ހުޅުވޭކަމީ، މަންމައެއްގެ ހައިސިއްތުން ނުހަނު އުފާކުރައްވާ ކަމެއް ކަމަށްވެސް ވިދާޅުވި އެވެ.
ސާޖިދާ ވިދާޅުވީ މިއަދު ސަރުކާރަށް އެއް އަހަރުވީއިރު ދިވެހި ގައުމިއްޔަތުގެ ހައްގުގައި އަދުގެ ސަރުކާރުން ގިނަގުނަ މަސައްކަތްތަކެއް ކޮށްފައިވާ ކަމަށެވެ. މިއަދު ރަސްމީކޮށް ހުޅުވިގެންދިޔަ ދިވެހި ގައުމިއްޔަތުގެ އިސްވަރުގެ އޮފީހުގެ ސަބަބުން، މަސައްކަތްތައް އިތުރަށް ހަލުއިވެ، އެތައް ގުނަޔަކަށް މަސައްކަތް އިތުރުވެގެންދާނެކަމާ މެދަކު ޝައްކުނުކުރައްވާ ކަމުގައިވެސް ވިދާޅުވި އެވެ.
މިރަސްމިއްޔާތުގައި މެޑަމް ސާޖިދާ ވަނީ "ހިދުމަތުގެ 52 ހަފްތާގެ ފޮތް" ވެސް ނެރެދެއްވާފަ އެވެ.