ދަރިވަރުންގެ ނަތީޖާއާ މެދު ވިސްނުން ބަދަލުކުރަންޖެހޭ

މީގެ އަހަރުތަކެއް ކުރިން 2001 ވަނަ އަހަރު ކުރެވުނު ދިރާސާއެއްގައިވާ ގޮތުން، ދިވެހިރާއްޖެ ފަދަ ކުދި ގައުމުތަކުގައި ދަރިވަރުންނަށް ދެވޭ އިމްތިހާންތަކަކީ އެކި މިންވަރުގައި ހިންގޭ ހަރަކާތެކެވެ. މީގެ ތެރޭގައި މަދަރުސާ ފެންވަރުގައި، ރަށު ފެންވަރުގައި އަދި ބައިނަލްއަގްވާމީ ފެންވަރުގެ އިމްތިހާންތައް ހިމެނެ އެވެ.

މީގެ މައިގަނޑު ސަބަބެއް ކަމަށް ދިރާސާގައިވަނީ ގައުމީ ފެންވަރުގެ އިމްތިހާނެއް ތައްޔާރުކޮށް ހިންގޭނެ ތަޖުރިބާކާރުންނާއި މުއައްސަސާތައް ކުދި ގައުމުތަކުގައި ނެތުމެވެ. ދިވެހިރާއްޖޭގައިވެސް ބައިނަލްއަގްވާމީ އިމްތިހާނެއް ދޭން ފެށީ 1984 އިން ފެށިގެންނެވެ. އެއީ ދިވެހިރާއްޖޭގައި އޭރު ހުރި އިނގިރޭސި މީޑިއިމަށް ކިޔަވައިދޭ މަދަރުސާތަކުގައި ދޭން ފެށި އެޑެކްސެލް އޯލެވެލް އަދި އޭލެވެލް އިމްތިހާނެވެ.

ނަމަވެސް އަދުގެ ހާލަތު ތަފާތެވެ. ދުނިޔެ މިވަނީ ގުޅިލާމެހިފައެވެ. މައުލޫމާތު ހޯދާ ލިބިގަތުން މިވަނީ އިންޓަނެޓުގެ ޒަރިއްޔާއިން އެތައް ގޮތަކަށް ފަސޭހަކޮށްދީފަ އެވެ. މުދައްރިސުންނަށް އޯލެވެލް އަދި އޭލެވެލް އިމްތިހާންގެ އެތައް ތަޖުރިބާ ހޯދިފަ އެވެ. ވީއިރު، ރާއްޖޭގައި މިހާރު ބައިނަލްއަގްވާމީ މުއައްސަސާތަކާ ގުޅިގެން އެފެންވަރުގެ އަމިއްލަ އިމްތިހާނެއް އުފައްދާ ނުހިންގޭންވީ ކީއްވެ ހެއްޔެވެ؟ މިސުވާލު ތައުލީމާ ބެހޭ ވުޒާރާއަށް ދޫކޮށްލާފައި މިލިއުމުގެ މައުޟޫއަށް އެނބުރިލާނަމެވެ.

ދިވެހިރާއްޖޭގެ ތައުލީމީ ނިޒާމަށް ކުރިމަތިކުރެވޭ އެއް ފާޑުކިޔުމަކީ ހަމައެކަނި އޯލެވެލް އަދި އޭލެވެލްގެ ނަތީޖާއަށް މަދަރުސާ ނިންމާ ދަރިވަރުންގެ ކާމިޔާބީ ގުޅުވާލުމެވެ. އޯލެވެލް އަދި އޭލެވެލްގައި ދަރިވަރުން އިމްތިހާން ކުރެވެނީ ވަރަށް ހަނި ދާއިރާއެއް ގައެވެ. މި އިމްތިހާންތަކުގައި ހަގީގީ ދިރިއުޅުމާ ގުޅުންހުރި ހުނަރުތައް ނުހިމެނުނު ނަމަވެސް މި ހަނި ދުރުމިން އެކަނި ދަރިވަރުންގެ މުސްތަގުބަލް ބައްޓަންކުރަން ބޮޑު ސަމާލުކަމެއް ދެވެ އެވެ. އާދެ "ޓޮޕް ޓެން"ގެ މަގާމެއް ދަރިވަރަށް ޔަގީން ކޮށްދޭން ބެލެނިވެރިންނާއި މަދުރުސާގެ ހުރިހާ ވަގުތެއް ހުސްކޮށްލަ އެވެ. "ޓޮޕް ޓެން" ގެ ފޯރީގައި ދަރިވަރުންގެ މެދުގައި އަދި މަދަރުސާތަކުގެ މެދުގައިވެސް ނުރަނގަޅު ވާދަވެރިކަމެއް އުފެދެ އެވެ.

ދިރާސާތަކުން ދައްކާ ގޮތުގައި މިފަދަ ވާދަވެރިކަމުގެ ސަބަބުން ދަރިވަރުން ނަފްސާނީ ގޮތުން ފިކުރުބޮޑުވެ، ކަންބޮޑުވެ އަދި އުނގެނުމަށް ނޭދެވޭ އަސަރު ކުރެ އެވެ. އިލްމީ ދިރާސާތަކުގެ ބައިނަލްއަގްވާމީ ޖާނަލް -- އިންޓަނޭޝަނަލް ޖާނަލް އޮފް އެޑިޔުކޭޝަނަލް ރިސާޗްގައި 2015 ވަނަ އަހަރު އޮތް ދިރާސާއެއްގައި ބުނާ ގޮތުން މަދަރުސާތަކުގައި އޯލެވެލް އަދި އޭލެވެލް ފަދަ އިމްތިހާންތަކަށް ދެވޭ އާދަޔާޚިލާފު ސަމާލުކަމުގެ ސަބަބުން މުދައްރިސުންގެ ކިބައިގައި "އިމްތހާނަށް ކިޔަވައިދިނުމުގެ" ވިސްނުން އަށަގަނެ، ވަށާޖެހޭ އުނގެނުމުގެ ތަޖުރިބާއިން (ހޯލިސްޓިކް ލާނިން އެކްސްޕީރިއެންސް) ދަރިވަރުން މަހްރޫމުވާ ގޮތް މެދުވެރިވެ އެވެ. މީގެ ސަބަބުން ދަރިވަރުންގެ ކިބައިގައި އަށަގަނުވަންޖެހޭ މުހިއްމު ހުނަރުތައް ކަމަށްވާ އެކުގައި މަސައްކަތް ކުރުމުގެ ހުނަރު، މުއާމަލާތްކުރުމުގެ ހުނަރު އަދި މައްސަލަ ހައްލުކުރުމުގެ ހުނަރުތައް ފަދަ ދިރިއުޅުމާއި ގުޅުންހުރި އެތައް ހުނަރުތަކެއް އަށަގަނުވަން އެއްވެސް ވަރަކަށް ވަގުތު ނުދެވެ އެވެ. އަދި މަދަރުސާ މަތިން ދަރިވަރުން ފޫހިވާ ގޮތްވެ އެވެ.

މަދަރުސީ ދައުރަކީ ދަރިވަރުން ހިތްހަމަޖެހޭ ދަތުރަކަށްވުން އެއީ ނުހަނު ބޭނުންތެރި ކަމެކެވެ. އެދަތުރުގެ ހަނދާންތަކަކީ މުސްތަގުބަލްގައި ނަފްސާނީ ދުޅަހެޔޮކަމާ ގުޅުން ހުންނާނެ ކަންކަމެވެ. ނަމަވެސް އިމްތިހާންތަކަށް ދެވޭ ބޮޑު ސަމާލުކަމުގެ ސަބަބުން ދަރިވަރުންނަށް މަދަރުސާ އަކީ ހިތްގައިމު ތަނަކަށް ނުވެ އެވެ. މުދައްރިސުންނާއި، ބެލެނިވެރީންނާއި އަދި ދަރިވަރުންގެ ސަމާލުކަން މުޅީން އިމްތިހާނުގެ ނަތީޖާއަށް ހުއްޓިފައި ހުރުމުން، ދަރިވަރުންގެ މެދުގައި ކޮންމެހެން އޮންނާންޖެހޭ އިޖުތިމާއީ ގުޅުންތެރިކަން ބޮޑުތަނުން ދަށްވެ އެވެ.

ތައުލީމީ ދާއިރާގެ ސައިކޮލޮޖީއާ ބެހޭ ޖާނަލް -- ޖާނަލް އޮފް އެޑިއުކޭޝަނަލް ސައިކޮލޮޖީގައި 2021 ވަނަ އަހަރު ޝާއިއުކުރި ދިރާސާއެއްގައި ބުނާގޮތުން ވަޒީފާގެ މާހައުލުގައި އިޖުތިމާއީ ހުނަރުތަކަކީ އަމިއްލަ ތަރައްގީއާއި ކުރިއެރުމަށް ނުހަނު ބޭނުންތެރި ހުނަރުތަކެކެވެ. އެހެންކަމުން އޯލެވެލް އަދި އޭލެވެލް އިމްތިހާނުގައި މޮޅު ނަތީޖާތަކެއް ލިބުމަކީ ދަރިވަރުންގެ ތަބީއަތުގައި މިހުނަރުތައް ހުރިކަން ކޮންމެހެން ލާޒިމުކުރާ ކަމެއް ނޫނެވެ.

ދަރިވަރުންގެ ކާމިޔާބީ މިންކުރަން ބެލިދާނެ އެހެން ގޮތްތައް

މަތީގައި ދެންނެވުނު ކަންކަމަށް ބަލައި ދަރިވަރުންގެ ކާމިޔާބީ މިންކުރެވިދާނެ އެހެން ގޮތްތަކެއް ހޯދަންޖެހެ އެވެ. ހަމައެކަނި އިމްތިހާނުގެ ނަތީޖާއަށް ވުރެ ފުޅާ ދާއިރާއެއްގައި ދަރިވަރުންގެ ގާބިލިއްޔަތު (ކޮމްޕިޓެންސީ) މިންކުރާނެ ގޮތްތަކެއް ނުވަތަ އިންޑިކޭޓަރުތަކެއް ކަނޑައެޅެންޖެހެ އެވެ. މިގޮތުން ކުރެވިދާނެ ނުވަތަ ބޭނުންކުރެވިދާނެ ބައެއް ގޮތްތައް ހިމަނާލާނަމެވެ.

މިކަން ދެނެގަތުމަށް ގިނަ ދަރިވަރުން އެކުގައި ކުރެވިދާނެ މަސައްކަތެއް ހަވާލުކުރެވިދާނެ އެވެ. އެގޮތުން ފާޑުވެރި ވިސްނުމާއި (ކްރިޓިކަލް ތިންކިން) އަދި އުފެއްދުންތެރި ވިސްނުން (ކްރިއޭޓިވް ތިންކިން)ގެ ހުނަރު ބޭނުންކުރަންޖެހޭ މަސައްކަތަކަށް އެމަސައްކަތް ވާންވާނެ އެވެ. މިހަރަކާތުގެ ތެރެއިން ދަރިވަރުންގެ ވިސްނުން ބައްޓަންކުރާ ގޮތާއި އަދި އެކުގައި މަސައްކަތް ކުރުމުގެ ހުނަރުހުރި މިންވަރު ދެނެގަނެވިދާނެ އެވެ.

މަންހަޖުގައި ހިމެނޭ އެކި މާއްދާތަކުގެ މަސައްކަތްތައް ޕޯޓްފޯލިއޯއެއްގެ ގޮތުގައި އެކުލަވާލަން ހަވާލުކުރެވިދާނެ އެވެ. މިހަރަކާތުގެ ތެރެއިން، ހަވާލުކުރެވޭ މަސައްކަތެއްގެ މުހިއްމު ބައިތައް ދެނެގަނެ، އެކުލަވާލައި އަދި ހުށައަޅައިދިނުން މިންކުރެވިދާނެ އެވެ.

އެކުގައި މަސައްކަތް ކުރުން، މުއާމަލާތުކުރުން އަދި ކަންކަމުގައި އިސްނެގުން އެކުލެވޭ އިތުރު ހަރަކާތްތަކާއި އަދި މަންހަޖުގެ ތެރެއިންވެސް ހަރަކާތްތައް ހިންގާ އެ ހުނަރުތައް މިންކޮށް ދެނެގަނެވިދާނެ އެވެ.

މިދެންނެވުނު ގޮތްތަކުން ދަރިވަރުންގެ ކާމިޔާބީ މިންކުރެވޭނީ ހަމައެކަނި އިމްތިހާނުގެ ނަތީޖާއަކުން ނޫނެވެ. މީގެ ސަބަބުން ވަށާޖެހޭ މިންކުރުމަކުން ދަރިވަރުންގެ ގާބިލިއްޔަތު މާފުޅާ ދާއިރާއެއްގައި ދެނެގަނެވޭނެ އެވެ.

މަދަރުސާއަކީ ހަމައެކަނި އިލްމީ ގާބިލްކަމުގެ އިތުރުން ދަރިވަރުންގެ ޢިޖުތިމާއީ ގުޅުންތެރިކަން އަދި އިހުސާސްތައް ތަރައްގީކުރާ މާހައުލަކަށްވީމައި، އެކުދީންގެ މުސްތަގުބަލްގައި ދިމާވާނެ ދަތިތަކާ ކުރިމަތިލައި އަދި ކަންކަމުގައި ހައްލު ހޯދައިގަތުމުގެ ގާބިލްކަން ލިއްބައިދޭނެ ތަނަކަށް މަދަރުސާ ވެގެންދާނެ އެވެ.