މަދަރުސީ ނިޒާމުގެ ބައެއް އަދަދުތަކަށް ބަލާލުން

ދިވެހިރާއްޖޭގައި އެދެވޭ ތައުލީމީ ނިޒާމެއް ގާއިމުކުރުމަށް އޮތް އެންމެ ދަތި އެއް ކަމަކީ، ރާއްޖޭގެ އަތޮޅުތަކާއި ރަށްތައް ޖިއޮގްރަފީގެ ގޮތުން ބެހިފައި ހުރި ގޮތާއި އަދި އާބާދީ އެތުރިފައި ހުރި ގޮތެވެ. އާބާދީ އެތުރޭނީ ލިބެންހުރި ހިދުމަތްތަކަށް ކަމަށްވީއިރު ބައެއް އަތޮޅުތަކުގައި އާބާދި ނުހަނު ދަށްވެފައި މާލެ ފަދަ އަތޮޅުތަކުގައި އާބާދީ އޮތީ އެކަށީގެންވާ ވަރަށް ވުރެ ގިނަ ވެފަ އެވެ.

ތައުލީމީ ދާއިރާ ނޫނަސް އެހެން މުހިއްމު ދާއިރާތަކަށްވެސް ހިދުމަތް ދިނުމުގައި މިދަތިތައް ހުރުމުން، އެކި ސަރުކާރުތަކުން އެކި ކަހަލަ ސިޔާސަތުތައް ގާއިމު ކުރެވޭތޯ ބަލައެވެ. އެގޮތުން އެއްފަސް ކުރުމުގެ ސިޔާސަތާއި ލާމަރުކަޒީ ނިޒާމަކީ މިއަދުވެސް އެ ސިޔާސަތުތައް އެންމެ ފުރިހަމައަށް ހިންގާފައިވާ ސިޔާސަތުތަކެއް ނޫނެވެ. ހާއްސަކޮށް ތައުލީމީ ނިޒާމަށް ބަލާލާއިރުގައި، މީހުން މަދު ރަށްރަށުގައި މަދަރުސާތައް ފަޅުވުމާއި، މީހުން ގިނަ ރަށްރަށުގައި އެކަށީގެންވާ އަދަދަށް މުދައްރިސުން ނެތުމާއި އަދި ކިލާސްތަކުގައި ދަރިވަރުން ގިނަވުން ހިމެނެ އެވެ. މިކަންކަމަށް އޮތް ހައްލަކީ، އަދަދަށް ބަލާ (ޑާޓާ ޑްރިވަން) ސިޔާސަތުތައް ކަނޑައެޅުމާއި ރޭވުމެވެ.

އަތޮޅުތަކުގައި މަދަރުސާތަކާއި ދަރިވަރުންގެ އަދަދު ބެހިފައި ހުރިގޮތް

ދިވެހިރާއްޖެގައި މާލެ ސިޓީ ހިމަނައިގެން މީހުން ދިރިއުޅޭ 21 އަތޮޅު އެބައޮތެވެ. މިއަތޮޅުތަކުގައި މުޅި ޖުމުލަ 218 ސަރުކާރުގެ މަދަރުސާ އެބަހުއްޓެވެ. ކޮންމެ އަތޮޅަކީ އާބާދީގެ ގޮތުންނާއި ދިރިއުޅުމުގެ ވައްޓަފާޅިގައި އެކިކަހަލަ ތަފާތުތައް ހުރި އަތޮޅުތަކެކެވެ. މިގޮތުން އެކި އަތޮޅުތަކުގައި ސަރުކާރުން އެކި އަދަދަށް މަދަރުސާ އަޅާދީފައި އެބަހުއްޓެވެ. މިއަދަދުތަކަށް ބަލާއިރު މަދަރުސާތައް އަޅާފައި ހުރީ ކިޔަވާ ކުދިންގެ އާބާދީގެ ނިސްބަތުން ކަމަށް ދެންނެވޭކަށް ނެތެވެ.

މާލެ ސިޓީގައި 20 މަދަރުސާ ހުރިއިރު ދަރިވަރުންގެ މުޅި އާބާދީއަކީ 27،400 އެވެ. ވ. އަތޮޅުގެ 377 ދަރިވަރުންނަށް ފަސް މަދަރުސާ ހުރިއިރު، ޅ އަތޮޅުގައި 2،024 ދަރިވަރުންނަށް ހުރީ ހަތަރު މަދަރުސާއެވެ. މިހެންކަމުން ކޮންމެ ދަރިވަރަކަށް އެއްހަމައެއްގައި ނުވަތަ އެއްފެންވަރެއްގައި ތައުލީމަށް ފުރުސަތު އޮތް ކަމަކަށް ބެލެވޭކަށް ނެތެވެ. ޏ އަތޮޅުގައި 1،921 ދަރިވަރުން ތިބި އިރު ހަތަރު މަދަރުސާ އެބަހުއްޓެވެ. މިއަތޮޅު އުފެދިފައި އޮތީ އެއްފަސްކޮށްވީމައި، މިއަދަދު މަދުކަމުގައި ނުވިޔަސް ބައެއް މަދަރުސާތައް ދަނީ ފަޅުވަމުންނެވެ.

ނަމަވެސް ހަމައެކަނި ދަރިވަރުންގެ އަދަދާއި މަދަރުސާގެ އަދަދުން އެންމެ އެކަށީގެންވާ މަންޒަރެއް ނުފެންނާނެ އެވެ. މީގެ އިތުރަށް މަދަރުސާގެ ބޮޑުމިނާއި، ކިލާސްތަކުގެ އަދަދާއި، މާއްދާތަކަށް ހާއްސަވެފައި ތިބި މުދައްރިސުންގެ އަދަދާއި އަދި އަތޮޅު ތެރޭގައި ދަތުރުފަތުރު ރޭވިފައި ހުރި ގޮތުގެ މައުލޫމާތު އެނގުން މުހިއްމެވެ. މިއަދަދުތަކަށް ބަލައި ދިރާސާކުރެވި އަތޮޅެއްގައި މަދަރުސާ ހުންނާންވާނެ އަދަދުގެ ސިޔާސަތެއް އޮތުމަކީ، އިސްރާފު މަދުވެ އެއްހަމައެއްގައި އަދި އެއްފެންވަރެއްގައި ކޮންމެ ދަރިވަރަކަށް ތައުލީމު ފޯރުކޮށްދިނުމަށް މުހިންމު ކަމެކެވެ.

މަދަރުސާތަކުގައި ދަރިވަރުންގެ ޖިންސުގެ ހަމަހަމަކަން

ސަރުކާރު މަދަރުސާތަކުގައި ފިރިހެން އަދި އަންހެން ދަރިވަރުންގެ ނިސްބަތް ހުރީ ވަރަށް ހަމަހަމަކޮށެވެ. އެންމެ ތަފާތު ބޮޑުކޮށް ހުރީ
ކ. އަތޮޅު ގައެވެ. މިއަތޮޅުގައި ފިރިހެން ދަރިވަރުންގެ ނިސްބަތް 52.8 ޕަސަންޓްގައި ހުރިއިރު، އަންހެން ދަރިވަރުންގެ ނިސްބަތް ހުރީ 47.2 ޕަސަންޓް ގައެވެ. މިއީ 5.7 ޕަސަންޓްގެ ތަފާތެކެވެ. ނަމަވެސް ޅ. އަތޮޅުގައި މިތަފާތު ހުރީ 0.4 ޕަސަންޓު ގައެވެ. ސަރުކާރު މަދަރުސާތަކުގައި ދަރިވަރުންގެ ޖިންސުގެ ހަމަހަމަކަން ރަނގަޅު މިންގަނޑެއްގައި ހުރީ ހިފެހެއްޓިފަ އެވެ. ނަމަވެސް މިއަދަދުތައް މިގޮތުގައި ދެމެހެއްޓުމަށާއި އަދި މިއަށްވުރެވެސް ރަނގަޅުކުރުމަށް ސިޔާސަތުތަކެއް ކަނޑައެޅިފައި އޮތުން މުހިއްމެވެ.

ދަރިވަރުންގެ އަދަދާއި މުދައްރިސުންގެ އަދަދު ބެހިފައި ހުރިގޮތް

ތަޢުލީމީ ނިޒާމެއްގެ ފެންވަރު ކަނޑައެޅޭ މުހިއްމު އެއް މިންގަޑަކީ، ދަރިވަރުންގެ އަދަދަށް މުދައްރިސުން ޖެހޭ ނިސްބަތެވެ. މުޅި ދިވެހިރާއްޖޭގައި 80،930 ދަރިވަރުން ކިޔަވަމުންދާއިރު 10،094 މުދައްރިސުން ހަރަކާތްތެރިވެ އެވެ. އަތޮޅުތަކަށް ބަލާލައިރުގައި ދަރިވަރުންގެ އަދަދަށް މުދައްރިސުން ޖެހޭ ނިސްބަތް ހުރީ ވަރަށް ތަފާތުކޮށެވެ. އެގޮތުން މ. އަތޮޅާއި އަދި ވ. އަތޮޅުގައި ނިސަބަތުން ގާތްގަނޑަކަށް ކޮންމެ ހަތަރު ދަރިވަރަކަށް މުދައްރިސަކު ހުރިއިރު، މާލެ ސިޓީގައި ކޮންމެ 12.5 ދަރިވަރަކަށް މުދައްރިސަކު ހުރެ އެވެ.

މުޅި ޖުމުލައަށް ބަލާއިރު ރާއްޖޭގައި ކޮންމެ 8 ދަރިވަރަކަށް މުދައްރިސަކު އެބަހުއްޓެވެ. އެހެންނަމަވެސް ކިލާސްތަކަށް ބަލާލާއިރު މާލެ ސިޓީ ފަދަ ދަރިވަރުންގެ އާބާދީ ބޮޑު އަތޮޅުތަކުގައި ކިލާހެއްގައި އެވަރެޖުކޮށް 30 ދަރިވަރުން ތިބިއިރު ކިލާހުގައި ހަރަކާތްތެރިވަނީ އެންމެ މުދައްރިސެކެވެ. މީގެ ގިނަ މުދައްރިސުންނަކީ 4 ނުވަތަ 5 ކިލާހަށް ކިޔަވާ ދެއްވާ މުދައްރިސުން ކަމުން، 150 ވަރަކަށް ދަރިވަރުންގެ ތަރުބިއްޔަތާއި އަދި ގާބިލިޔައްތު އެކަށީގެންވާ ހަމައެއްގައި މިންކުރުމަކީ ބޮޑު ގޮންޖެހުމެކެވެ.

ދިރާސާތަކުން ދައްކާ ގޮތުގައި، ކިލާހެއްގައި މުދައްރިސަކަށް އެންމެ ގިނަވެގެން ތިބެންވާނީ 20 ދަރިވަރުންނެވެ. އެހެންކަމުން މަދަރުސާތަކުގައި މުދައްރިސުން ބެހިފައިވާ ގޮތަށް އެކަށީގެންވާ ބަދަލުތަކެއް އަންނާން ޖެހެ އެވެ. މީގެ ސަބަބުތައް ދެނެގަނެ މިކަމަށް ހައްލުތަކެއް ހޯދުމަކީ ތައުލީމީ ނިޒާމު ހަރުދަނާކުރުމަށް ނުހަނު މުހިއްމު ކަމެކެވެ.

ގެނެވިދާނެ ބައެއް ހައްލުތައް:

ކޮންމެ މަދަރުސާއެއްގެ ދަރިވަރުންގެ އަދަދާއި އަދި މާއްދާތަކުގެ މުހިއްމު ކަމަށް ބަލައި މުދައްރިސުން ހަމަޖެއްސުމަކީ ކުރެވިދާނެ ކަމެކެވެ. މިގޮތުން މުދައްރިސުން ކަނޑައެޅުމުގައި ނިސްބަތުން އެންމެ ބޭނުން އޮތް މަދަރުސާތަކަށް މުދައްރިސުން ވަކި އަދަދަކަށް ކަނޑައެޅިދާނެ އެވެ. މިގޮތަށް މުދައްރިސުން ބަހާލުމަށް "ސެންޓްރަލިޒްޑް ޑާޓާބޭސް"އެއް ނުވަތަ މައުލޫމާތު ރައްކާކޮށް އަދި އެނަލައިޒް ކުރެވޭ ނިޒާމެއްގެ ބޭނުންކުރެވިދާނެ އެވެ. އާންމުކޮށް މުދައްރިސުން ތަމްރީނުކުރަނީ ސަރުކާރުގެ ހަރަދުގައި ކަމުން އެ މުދައްރިސުން ހިދުމަތްކުރާނެ މަދަރުސާ ކަނޑައެޅުމުގެ ބާރު ތައުލީމީ ވުޒާރާއަށް އޮންނާންވާނެ އެވެ.

މުދައްރިސުން ތަމްރީނުކުރަނީ ދިވެހިރާއްޖޭގެ މަތީ ތައުލީމުދޭ މަރުކަޒުތަކުން ކަމަށްވެފައި އަދި މުދައްރިސުންނަށް ވަޒީފާދޭ މައިގަނޑު ފަރަތަކީ ތައުލީމާ ބެހޭ ވުޒާރާ ކަމުގައިވީއިރު މިދެންނެވި މުއައްސަސާތަކާއި ތައުލީމާ ބެހޭ ވުޒާރާއާއި ދެމެދު އެކަށިގެންވާ ގުޅުމެއް އޮތުމަކީ މުހިއްމު ކަމެކެވެ. މިގޮތުން އެކި މާއްދާތަކަށް އަދި އަތޮޅުތަކަށް މުދައްރިސުން ބެނުންވާ މިންވަރާއި ފެންވަރު ދެ މުއައްސަސާ ދެމެދު ހިއްސާ ކުރެވެންޖެހެ އެވެ. މުދައްރިސުން ތަމްރީނުކުރަނީ މަދަރުސާތަކުގައި ހިދުމަތްކުރަން ކަމުން، މުދައްރިސުން ތަމްރީނުކުރެވޭ އަދަދާއި މަދަރުސާތަކަށް ބޭނުންވާ މިންވަރާއި ދިމާވާންޖެހޭނެ އެވެ.

އެކަށީގެންވާ ރަނގަޅު މިންގަނޑެއްގައި ތައުލީމު ފޯރުކޮށްދިނުމަށް މުދައްރިސުން ތަމްރީނުކުރާ މަންހަޖަށް ބަދަލުތަކެއް ގެނެވިދާނެ އެވެ. މިގޮތުން އެއް ގްރޭޑަށްވުރެ ގިނަ ގްރޭޑަށް ކިޔަވާދެވޭނެ މުދައްރިސުން ތަމްރީނުކުރުމާއި، އެއް މާއްދާއަށް ވުރެ ގިނަ މާއްދާތަކަށް ކިޔަވާދެވޭނެ މުދައްރިސުން ތަމްރީނު ކުރެވިދާނެ އެވެ. މިއީ ދިވެހިރާއްޖެ ފަދަ ރަށްތައް ދުރުދުރުގައި ހުރި އަދި އަތޮޅުތަކުގައި އާބާދީގެ ގޮތުން ތަފާތު ހުރި ގައުމަކަށް ބޭނުންތެރި ގޮތަކަށްވާނެ އެވެ. މީގެ ސަބަބުން މުދައްރިސުންގެ އަދަދަށް ދަރިވަރުން ޖެހޭ ނިސްބަތް ދަށްކުރެވި، މުދައްރިސުންގެ މަސައްކަތުގެ ފެންވަރު ރަނގަޅުކުރެވި އަދި ތައުލީމު ފޯރުކޮށްދިނުން މިހާރަށް ވުރެ ފުރިހަމަ ކުރެވޭނެ އެވެ. ހާއްސަކޮށް ދަރިވަރުން މަދު މަދަރުސާތަކުގައެވެ.

ކޮންމެ ނިޒާމެއްވެސް ފުރިހަމަ ގޮތުގައި ބައްޓަންކުރަން ތަފާސްހިސާބުގެ އެހީ ހޯދުމަކީ ބޭނުންތެރިކަމެކެވެ. އެގޮތުން ދިވެހިރާއްޖޭގެ ތަޢުލީމީ ނިޒާމު މިހާރަށް ވުރެ ފުރިހަމަކުރަން އަދަދަށް ބަލާ (ޑާޓާ ޑްރިވަން) ސިޔާސަތުތައް ކަނޑައެޅުމަކީ ނުހަނު މުހިންމު ކަމެކެވެ.