އިތުރު ވަގުތުގައި ޖެހި ގޯލާއެކު ސްޕެއިން މޮޅުވެއްޖެ

ޔުއެފާ ނޭޝަންސް ލީގު މެޗުގައި އިތުރު ވަގުތުގައި ޖެހި ޕެނަލްޓީއަކުން ސްޕެއިން ސްވިޓްޒަލަންޑާ ދެކޮޅަށް 3-2ގެ ނަތީޖާއަކުން މޮޅުވެއްޖެ އެވެ.

އެކާވީސްހާސް ސަޕޯޓަރުންގެ ކުރިމަތީގައި ކުޅުނު މި މެޗުގައި ފުރަތަމަ ލަނޑު ޖެހީ 32 ވަނަ މިނެޓުގައި ސްޕެއިންގެ ޔެރެމީ ޕިނޯ އެވެ. ނަމަވެސް 63 ވަނަ މިނެޓުގައި ސްވިޓްޒަލެންޑުގެ ޖޮއެލް މޮންޓެއިރޯ މެޗު އެއްވަރު ކުރި އެވެ. އޭގެ ކުޑައިރުކޮޅެއްގެ ތެރޭގައި ބްރަޔަން ގިލް ސްޕެއިން އަށް އަނެއްކާވެސް ލީޑު ނަގައިދިނެވެ.

މެޗު ނިމެން ކައިރިވެފައި ވަނިކޮށް، 85 ވަނަ މިނެޓުގައި ގޯލު ޖަހައި ސްވިޓްޒަލަންޑާގެ އެންޑީ ޒެގީރީ ވަނީ އަނެއްކާވެސް އެޓީމު އެއްވަރު ކޮށްދީފަ އެވެ. އެހެންނަމަވެސް އިތުރު ވަގުތުގެ ތިންވަނަ މިނެޓުގައި ލިބުނު ޕެނަލްޓީއެއްގައި ބްރަޔަން ޒަރަގޯޒާ ގޯލު ޖަހައި ސްޕެއިން މޮޅުކޮށްދިނެވެ.

މި މެޗުގެ ކުރިނވެސް ސްޕެއިން ވަނީ އެ ގްރޫޕުން ކުއާޓަ ފައިނަލްގެ ފުރަތަމަ ޖާގަ ކަށަވަރުކޮށްފަ އެވެ. އަދި މި ގްރޫޕުން ޑެންމާކް ވެސް ވަނީ ސާބިއައާ އެކު ކުޅުނު މެޗުން 0-0 އިން އެއްވަރުވެ، 8 ޕޮއިންޓާއެކު ކުއާޓަ ފައިނަލަށް ދަތުރުކޮށްފަ އެވެ. އެހެންނަމަވެސް ސާބިއާއަށް މިހާރު ޖެހޭނީ ރެލިގޭޝަން ޕްލޭއޮފް މެޗެއް ކުޅޭށެވެ.