ޓެނިސް ކޯޓުތަކުގައި އެތައް ރެކޯޑެއް މުގުރާލާފައިވާ ދުނިޔެ ދުށް އެންމެ ކާމިޔާބު އެއް ޓެނިސް ކުޅުންތެރިޔާ ސްޕެއިންގެ ލެޖެންޑް ރަފޭލް ނަޑާލް އޭނާގެ 22 އަހަރުގެ ޕްރޮފެޝަނަލް ކެރިއާ ނިންމާލައިފި އެވެ.
އުމުރުން 38 އަހަރުގެ ނަޑާލް ޓެނިސް ކޯޓުތައް ދޫކޮށްލީ ޑޭވިސް ކަޕްގެ ކުއާޓަ ފައިނަލްގައި އޭނާގެ ގައުމު ސްޕެއިން، ނެދަލެންޑްސް އަތުން ބަލިވުމާ އެކުގަ އެވެ.
މިދިޔަ މަހު އޭނާ ވަނީ މިފަހަރުގެ ޑޭވިސް ކަޕަކީ އޭނާގެ ފަހު މުބާރާތް ކަމަށް އިއުލާނުކޮށްފަ އެވެ.
ރިޓަޔާކުރުމަށްފަހު ދެއްކި ވާހަކައެއްގައި ނަޑާލް ބުނީ ނާކާމިޔާބު މުބާރާތަކުން ކެރިއަ ނިންމާލަން ޖެހުނު ނަމަވެސް އޭނާގެ މުޅި ކެރިއަރުގައި ހޯދި ކާމިޔާބީތަކަށް ބަލާއިރު އޭނާ އުއްމީދުކުރި ވަރަށްވުރެވެސް ގިނަ ކާމިޔާބީތައް ލިބިފައިވާ ކަމަށެެވެ.
ޓެނިހުގެ އެންމެ ޝަރަފުވެރި ޓައިޓަލް، ގްރޭންޑް ސްލޭމް 22 ފަހަރު ކާމިޔާބުކޮށްފައިވާ ނަޑާލްގެ ކެރިއަރު ފެށުނީ 2001 ވަނަ އަހަރު އޭނާގެ އުމުރުން އެންމެ 14 އަހަރު ގައެވެ.