ޣައްޒާގައި އިޒުރޭލުގެ އިތުރު އަސީރަކު މަރުވެއްޖެ ކަމަށް ހަމާސްއިން ބުނެފި އެވެ.
އޭނާ މަރުވީ އިޒުރޭލުގެ އަސްކަރިއްޔާއިން ޣައްޒާއަށް ދިން ވަރުގަދަ ހަމަލާތަކުގައި ވަރަށް ބޮޑަށް ޒަހަމުވުމުގެ ސަބަބުން ކަމަށް އެ ޖަމާއަތުން ބުންޏެވެ.
ހަމާސްއިން ބުނި ގޮތުން މަރުވެފައިވަނީ އިޒުރޭލުގެ އަންހެނެކެވެ. އަދި އެހެން އަސީރަކަށް ބޮޑެތި ޒަހަމްތަކެއް ލިބިފައިވާ ކަމަށްވެސް ހަމާސްއިން ބުންޏެވެ.
އޮކްޓޯބަރު 2023 ގައި ހަމާސްގެ ހަނގުރާމަވެރިން ޔަހޫދީ އާބާދީތަކަށް ވަދެގަނެ ދިން ހަމަލާތަކާ ގުޅިގެން އިޒުރޭލުގެ އަސްކަރިއްޔާއިން ޣައްޒާއަށް ދޭން ފެށި ހަމަލާތައް އަދިވެސް ދަނީ ކުރިއަށެވެ.
ހަމާސްއިން އޮކްޓޯބަރު ހަތެއް 2023ގައި އަސީރުކުރި ޔަހޫދީންގެ ތެރެއިން ބަޔަކު އަދިވެސް ތިބީ އެ ޖަމާއަތުގެ ބެލުމުގެ ދަށުގަ އެވެ.
އިޒުރޭލުން ބުނާ ގޮތުން ޣައްޒާއަށް ދޭ ހަމަލާތަކަކީ ހަމާސް ނައްތާލަން ދޭ ހަމަލާތަކެކެވެ. އަދި އެއްގަމު މަގުން ޣައްޒާއަށް އަރައިގަތީ އަސީރުން މިނިވަން ކުރުމަށެވެ. ނަމަވެސް ހަމާސްއިން އަސީރުން ފޮރުވާފައި ތިބީ ކޮންތާކު ކަމެއް، ޔަހޫދީންނަށް އަދިވެސް ނޭނގެ އެވެ.
ހަމާސްއިން އަސީރުކުރި ޔަހޫދީންގެ ތެރެއިން ބަޔަކު -- އިޒުރޭލުގެ ހަމަލާތަކުގައި މީގެ ކުރިންވެސް ވަނީ މަރުވެފަ އެވެ.
މިކަމާ ބެހޭ ގޮތުން ވާހަކަދައްކަން އިޒުރޭލުން ބޭނުން ނުވި ނަމަވެސް މަރުވެފައި ތިބި އަސީރުންގެ ހަށިތައް އިޒުރޭލަށް ވަނީ ގެންގޮސްފަ އެވެ.
ހަމާސްއިން ބުނާ ގޮތުން އެ މީހުންގެ އަމިއްލަ މީހުން މަރުވުމުގެ ޒިންމާ ނަންގަވަން ޖެހިވަޑައިގަންނަވާނީ އިޒުރޭލުގެ ބޮޑުވަޒީރު ބެންޔަމިން ނަތަންޔާހޫ އެވެ.
އިޒުރޭލުގެ އަސްކަރިއްޔާއިން ޣައްޒާއަށް ހަމަލާ ނުދޭ ނަމަ، އަސީރުންގެ އެކަކުވެސް މަރުނުވާނެ ކަމަށް ހަމާސް އިން ބުންޏެވެ.