ސޯޝަލް އެންޑް ފެމިލީ ޑިވެލޮޕްމަންޓް މިނިސްޓްރީގެ ދަށުން ރާއްޖޭގެ އެކި ކަންކޮޅުތަކުގައި ގާއިމުކޮށްފައިވާ ހުރިހާ އަމާން ވެށި އަދި އަމާން ހިޔާތަކަށް ދިރާގުން ފޯރުކޮށްދެމުން ގެންދާ ހައި ސްޕީޑް އިންޓަނެޓްގެ އެހީތެރިކަން 2025 ވަނަ އަހަރަށްވެސް އެކުންފުނީގެ ކޯޕަރޭޓް ސޯޝަލް ރެސްޕޮންސިބިލިޓީ (ސީއެސްއާރު)ގެ ދަށުން ފޯރުކޮށްދޭން ނިންމައިފި އެވެ.
އަމާން ވެށި އަދި އަމާން ހިޔާތަކަކީ ސޯޝަލް އެންޑް ފެމިލީ ޑިވެލޮޕްމަންޓް މިނިސްޓްރީގެ ފެމިލީ އެންޑް ޗިލްޑްރަންސް ސާވިސް ސެންޓާސް (އެފްސީއެސްސީ) މެދުވެރިކޮށް ދައުލަތުގެ ދަށުން ކުދިން ބަލަހައްޓާ ހާއްސަ ހިޔާތަކެވެ.
އެގޮތުން ދިރާގުގެ ސީއެސްއާރު ޕްރޮގްރާމްގެ ދަށުން ފޯރުކޮށްދެވޭ މި އެހީގެ ސަބަބުން ހަލުވި ސްޕީޑްގައި ދިރާގު ފައިބަ އިންޓަނެޓް ރާއްޖޭގެ އެކި ކަންކޮޅުތަކުގައި ގާއިމުކުރެވިފައިވާ އެފްސީއެސްސީތަކަށް ފޯރުކޮށްދޭނެ އެވެ.
އޭގެ ތެރޭގައި ބ. އޭދަފުށި، ށ. ފުނަދޫ، ހއ. ދިއްދޫ، ދ. ކުޑަހުވަދޫ، ލ. ފޮނަދޫ، ނ.މަނަދޫ، ޅ. ނައިފަރު، ފުވައްމުލައް ސިޓީ، ކުޅުދުއްފުށި ސިޓީ އަދި ސ. ހިތަދޫގައި ހިންގާ އެފްސީއެސްސީތަށް ހިމެނެ އެވެ.
މި ޕްރޮގްރާމްގެ މަގުސަދަކީ ޑިޖިޓަލް ލިޓަރަސީ ކުރިއަރުވާ، ދައުލަތުގެ ބެލުމުގެ ދަށުގައިވާ ކުދިންގެ ތައުލީމީ ބޭނުންތަކަށް އެހީތެރިވުން ކަމަށް ދިރާގުން ބުންޏެވެ.
ކުޑަކުދިން ރައްކާތެރިކުރުމާއި ޒުވާނުން ބާރުވެރިކުރުމަކީ ދިރާގުގެ ސީއެސްއާރު ޕްރޮގްރާމްގައި ވަރަށް ހާއްސަ އަހަންމިއްޔަތު ކަމެއް ދޭ ދާއިރާއެކެވެ. އެގޮތުން ފާއިތުވި އަހަރުތަކުގައިވެސް ދިރާގުން ވަނީ އަމާން ވެށި، އަމާން ހިޔާ އަދި ކުޑަކުދިންގެ ހިޔާއަށް އެހީތެރިކަން ފޯރުކޮށްދީފަ އެވެ.
މީގެ އިތުރުން ކުޑަކުދިންގެ ހައްގުގައި މަސައްކަތް ކުރާ އެކި އެންޖީއޯތަކަށް އެހީތެރިކަން ފޯރުކޮށްދިނުމަށް ވެސް ދިރާގުން އަބަދުވެސް އިސްކަންދެ އެވެ.