އުރުދުންގެ ވެރިރަށް އަންމާންގައި ހުންނަ އިޒުރޭލު އެމްބަސީއަށް ބަޑިން ހަމަލާދިން މީހާ މަރާލައިފި އެވެ. އޭނާ ވަރާލީ އުރުދުންގެ ފުލުހުން ދިން ކުއްލި ހަމަލާތަކެއް ގައެވެ.
ރިޕޯޓްތައް ބުނާ ގޮތުން ބަޑި ހިފައިގެން އިޒުރޭލު އެމްބަސީ ދޮށަށް މީހަކު ގޮސް ގޮތެއް ފޮތެއް ބެލުމެއް ނެތި ބަަޑިޖަހަން ފެށީ އެވެ. މި ހަމަލާތަކުގައި، ފުލުހުންގެ ތިން އޮފިސަރަކު ޒަހަމުވެފައިވާ ކަމަށް ފުލުހުންގެ އިދާރާއިން ބުނެ އެވެ.
އިޒުރޭލު އެމްބަސީއަށް ހަމަލާދިން މީހާގެ ވަނަވަރު، ފުލުހުން އަދި ހާމައެއް ނުކުރެ އެވެ. އޭނާ އެކަން ކުރި ސަބަބެއްވެސް އަދި ނޭނގެ އެވެ.
ނަމަވެސް އިޒުރޭލުން ފަލަސްތީންގެ ޣައްޒާއަށް ދެމުންދާ ހަމަލާތަކާ ދެކޮޅަށް ގައުމުތަކުގައި ހަރަކާތްތެރިވާ ގުރޫޕްތަކުންނާއި ވަކިވަކި ފަރުދުން ދަނީ އެ ގައުމުތަކުގައި ހުންނަ އިޒުރޭލުގެ އިމާރާތްތަކަށާއި ޝައުގުވެރިކަމަށް ހަމަލާދީ ގެއްލުން ދެމުންނެވެ.
އިޒުރޭލުގެ އެމްބަސީތަކަށާއި، ބޭރު ގައުމުތަކުގައި ވަޒަންވެރިވެގެން އުޅޭ ޔަހޫދީންނަށްވެސް ހަމަލާތައް ދަނީ އަމާޒުކުރަމުންނެވެ.
ޔަހޫދީންނަށް ހަމަލާދިނުމުގެ ފަހަތުގައި ތިބީ ކޮން ބައެއްކަން އަދި ނޭނގެ އެވެ. އިޒުރޭލަށް ވަފާތެރިވާ ގައުމުތަކުން ދެކޭ ގޮތުގައި، ޔަހޫދީންނަށް ދޭ ހަމަލާތަކުގައި ފަހަތުގައި ތިބީ މުސްލިމުންނެވެ.
ޣައްޒާ ހަނގުރާމައާ ގުޅިގެން ފަލަސްތީނަށް ތައީދުކޮށް ހަރަކާތަތައް ހިންގަނީ ހަމައެކަނި މުސްލިމު ގައުމުތަކުގައެއް ނޫނެވެ.
އިނގިރޭސިވިލާތުގައި އަދި ޔޫރަޕްގެ ބައެއް ގައުމުތަކުގައިވެސް ދަނީ ފަލަސްތީނާ އެއްކޮޅަށް އެއްވުންތައް ބާއްވަމުންނެވެ.
އުރުދުންގެ ވެރިރަށުގައި މީހަކު ހިންގި މި ހަރަކާތްތަކާ ބެހޭ ގޮތުން އިޒުރޭލުން އަދި ވާހަކައެއް ނުދައްކަ އެވެ. އެހެންކަމުން، މިކަމުގައި އިޒުރޭލުގެ ވިސްނުމެއް އަދި ނޭނގެ އެވެ.