މާލޭގެ ބުރިޖް ޕްލެޓްފޯމް ރޫޅާލައި އެ ސަރަހައްދުގައި އިންޓަނޭޝަނަލް ފެންވަރުގެ މުބާރާތްތައް ބޭއްވޭ ގޮތަށް އިންޓަނޭޝަނަލް ސާފިން ސްޓޭޑިއަމެއް ހެދުމުގެ މަސައްކަތް ފަށައިފި އެވެ.
ސްޕޯޓްސް މިނިސްޓްރީގެ މީޑިއާ އޮފިޝަލަކު ވިދާޅުވީ ބުރިޖް ޕްލެޓްފޯމް ރޫޅާލާ އިންޓަނޭޝަނަލް ފެންވަރުގެ މުބާރާތްތައް ބޭއްވޭ ގޮތަށް އެ ސަރަހައްދު އަލުން ތަރައްގީކުރުމުގެ މަސައްކަތް ފަށާފައިވާ ކަމަށެވެ.
މިމަސައްކަތް ހަވާލުކޮށްފައިވަނީ ހޮންކޮންގުގެ ރޯޓައިމް އިންޖިނިއަރިން އެންޑް ޓެކްނޯލޮޖީ ކުންފުންޏަށެވެ. މިކަމާ ގުޅޭ އެއްބަސްވުމުގައި ސޮއި ކުރީ މިދިޔަ އޭޕްރީލް މަހު އެވެ.
އިންޓަނޭޝަނަލް ފެންވަރުގެ ސާފިން ސްޓޭޑިއަމް އެޅުމަށްޓަކައި ބްރިޖު ވިއު ޕްލެޓްފޯމްގެ ސިޑިބަރި މިހާރު ވަނީ ނަގާފަ އެވެ.
ބުރިޖް ޕްލެޓްފޯމަަކީ ކުރީގެ ރައީސް އަބްދުﷲ ޔާމީންގެ ވެރިކަމުގައި ސިނަމާލެ ބްރިޖުގެ މަޝްރޫއު ކުރިއަށް ދިޔަ އެ މަޝްރޫއުގެ މަސައްކަތް ކުރިއަށްދާ ގޮތް ބަލަން ބައެއް އާންމު ރައްޔިތުން ބޭނުންވާތީ އާންމުންނަށް ފަސޭހަކޮށްދިނުމަށްޓަކައި ލޮނުޒިޔާރަތްކޮޅުގައި ހަދައިދިން ޕްލެޓްފޯމެކެވެ.
މި ޕްލެޓްފޯމު ހެދީ އެ ސަރަހައްދުގައި "ނިއުޕޯޓް"ގެ ނަމުގައި ރެސްޓޯރަންޓެއް ހިންގި ސްޓްރާޑާ ކުންފުނިންނެވެ.
އިންޓަނޭޝަނަލް ފެންވަރުގެ މުބާރާތްތައް ބޭއްވޭ ގޮތަށް އިންޓަނޭޝަނަލް ސާފިން ސްޓޭޑިއަމެއް ހެދުމަކީ ރައީސް ޑރ. މުހައްމަދު މުއިއްޒުގެ ވައުދެކެވެ.