ލުބްނާންގެ މުޖާހިދުންގެ ޖަމާއަތް ހިޒްބުﷲ އިން ދެމުންދާ ހަމަލާތައް ވަރުގަދަކޮށް، 340 އަށް ވުރެ ގިނަ ރޮކެޓާއި ޑްރޯން ބޭނުންކޮށްގެން އިސްރާއީލްގެ ބޮޑެތި ރަށްތަކަށް ނުރައްކާތެރި ހަމަލާތަކެއް ދީފި އެވެ.
މި ހަމަލާތަކަކީ ބައިރޫތުގެ އާންމު ރައްޔިތުންނަށް އިޒުރޭލުން ދިން ހަމަލާތަކަށް ބަދަލުހިފުމުގެ ގޮތުން ދެވުނު ހަމަލާތަކެކެވެ.
އިޒުރޭލުގެ ވެރިރަށް ތެލް އަވީވު އަދި އެހެނިހެން ސަރަހައްދުތަކަށް އަމާޒުކުރެވުނު މި ހަމަލާތަކުގައި އިޒުރޭލުގެ 11 ރައްޔިތުން ޒަހަމުވެ، ގެދޮރަށް ބޮޑެތި ގެއްލުންތަކެއް ލިބުނެވެ.
މި ހަމަލާތަކަކީ އޭގެ ކުރީ ދުވަހު ބައިރޫތަށް އިޒުރޭލުން ދިން ހަމަލާއެއްގައި 29 މީހުން ޝަހީދުކޮށްލުމާ ގުޅިގެން ދެވުނު ހަމަލާތަކެކެވެ.
ޣައްޒާގައި ހިނގަމުންދާ ހަނގުރާމައާ ގުޅިގެން މިދިޔަ 13 މަސް ދުވަހުގެ ތެރޭގައި ލުބްނާނާއި އިޒުރޭލާ ދެމެދު ހަމަލާތައް ބަދަލުކުރަމުން އަންނައިރު، މިހާތަނަށް ލުބްނާނުގެ 3,754 އާންމުން ޝަހީދުވެ، 15,626 މީހުން ޒަޚަމްވެފައިވެ އެވެ. އަދި 1.2 މިލިއަން މީހުން ވަނީ ގެދޮރު ގެއްލި ހާލުގައި ޖެހިފަ އެވެ.
އެމެރިކާގެ މެދުވެރިކަމުގައި މި ހަނގުރާމަ ނިންމުމަށް މަޝްވަރާތަކެއް ކުރިއަށްދާއިރު، އެ މަޝްވަރާތަކުގައި ކުރިއެރުންތަކެއް ލިބިފައިވާކަން ވަނީ ހާމަކޮށްފަ އެވެ.
އެމެރިކާއިން ހުށަހަޅާފައިވާ ހުށަހެޅުންތަކަކަށް ލުބްނާނު ސަރުކާރާއި ހިޒްބުﷲއިން އިސްލާހުތަކެއް ހުށަހަޅާފައިވާއިރު، އިޒުރޭލުން އެ ހުށަހެޅުންތައް ބަލައިގަންނާނެ ކަމަށް ބެލެވެ އެވެ.