ވިނަރެސް މަޝްރޫއިން ފުލެޓް ގަނެފައިވާ ފަރާތްތަކަށް ކާރު ޕާކް ކުރާނެ ޖާގަ ދޫކުރުމަށް ނިންމައި، އެކަމަށް ހުޅުވާލައިފި އެވެ.
ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ވަނީ ވިނަރެސް ޓަވަރުތަކުގެ ކާރު ޕާކިން ޖާގަ އަމިއްލަ ފަރާތްތަކަށް ދޫކުރުމަށް އިއުލާން ކޮށްފަ އެވެ. މި އިއުލާނާއެކު، ވިނަރެސް ޓަވަރުތަކުގެ ކާރު ޕާކިން ޖާގަ ދޫކުރާނެ ގޮތުގެ ތަފްސީލުވެސް ހާމަކޮށްފައިވެ އެވެ.
އެޗްޑީސީ އިން މައުލޫމާތު ދޭ ގޮތުގައި ވިނަރެސް ފްލެޓްތަކުގެ އެތެރެއިން ޖުމުލަ 76 ޕާކިން ޖާގަ ވިއްކުމަށް ހަމަޖެހިފައިވާއިރު، އަގު ފަށާނީ 650,000 ރުފިޔާއިން އެވެ. މި ޕާކިން ޖާގަތަކަށް ކާރު ރަޖިސްޓަރީކުރުމުގެ ހުއްދަ ލިބޭނެ އެވެ.
އިމާރާތުގެ ބޭރުން އިތުރު 78 ޕާކިން ޖާގަ ކުއްޔަށް ދޫކުރާނެ އެވެ. މި ޖާގަތަކުގެ ފެށޭ އަގަކީ 2,000 ރުފިޔާ އެވެ. މި ޕާކިން ޖާގަތައް ދޫކުރެވޭނީ ހަމައެކަނި ޕާކުކުރުމުގެ ބޭނުމަށެވެ. އެ ތަންތަނަށް ކާރު ރަޖިސްޓަރީއެއް ނުކުރެވޭނެ އެވެ.
ޕާކިން ޖާގަ ހޯދުމަށް އެކި ޝަރުތުތައް ކަނޑައަޅާފައިވެ އެވެ. މައިގަނޑު ޝަރުތުތަކުގެ ތެރޭގައި ވިނަރެސް ފުލެޓު ގަތުމުގެ އެއްބަސްވުމުގައި ސޮއިކޮށްފައިވާ މައި-އެޕްލިކަންޓެއް ކަމުގައިވުމާއި، ކުރިއަށް އޮތް ޑިސެމްބަރު ފަސްވަނަ ދުވަހުގެ ނިޔަލަށް އެއްވެސް ފައިސާއެއް ދައްކަންޖެހި ނުދައްކާ ފަރާތެއް ކަމުގައި ނުވުން ހިމެނެ އެވެ.
އެޗްޑީސީ އިން މައުލޫމާތު ދޭ ގޮތުގައި ޝައުގުވެރިކަން ހުރި ފަރާތްތަކަށް އެޕްލިކޭޝަން ހުށަހެޅޭނީ މިކަމަށް ހާއްސަ އޮންލައިން ޕޯޓަލް މެދުވެރިކޮށެވެ.
އެޕްލިކޭޝަން ހުށަހެޅޭނީ މިއަދުން ފެށިގެން އަންނަ މަހުގެ ފަސްވަނަ ދުވަހުގެ ނިޔަލަށެވެ.