ޓޫރިޒަމް ދާއިރާގެ ހުރިހާ ވިޔަފާރިތަކުންވެސް ޑޮލަރު މާރުކުރަން މަޖުބޫރުކުރުމަށް ހަދާފައިވާ ގަވައިދަށް އެއްވެސް ބަދަލެއް ގެނެސްފައި ނުވާނެ ކަމަށާއި މިހާރު ކުރަމުންދާ މަސައްކަތަކީ އެ ގަވައިދު، ގާނޫނަކަށް ބަދަލުކޮށް ބޭރު ފައިސާ މާރުކުރުމުގެ އިންތިޒާމުތައް އިތުރަށް ހަރުދަނާކުރުމުގެ މަސައްކަތް ކަމަށް މަރުކަޒީ ބޭންކު -- އެމްއެމްއޭގެ ގަވަރުނަރު އަހްމަދު މުނައްވަރު ވިދާޅުވެއްޖެ އެވެ.
މުނައްވަރު މިހެން ވިދާޅުވެފައި މިވަނީ "ބޭރު ފައިސާއާ ބެހޭ ބިލް"ގެ ނަމުގައި ބިލެއް އެކުލަވާލާ އާންމުންގެ ހިޔާލަށް ހުޅުވާލުމުން އެ ބިލް، ގާނޫނަކަށް ވުމުން ޑޮލަރު މާރުކުރަން މަޖުބޫރުކުރުމަށް މިހާރު ހަދާފައިވާ ގަވައިދުގެ ތެރެއިން ޑޮލަރު މާރުކުރުމަށް ލުއިތަކެއް ލިބިގެންދާ ކަމަށް ބުނެ ބައެއް ނޫސްތަކުގައި މިއަދު ރިޕޯޓްކުރުމާ ގުޅިގެންނެވެ.
ނޫސްވެރިންނާ މިއަދު ބައްދަލުކުރައްވާ ގަވަރުނަރު މުނައްވަރު ވިދާޅުވީ ބިލެއް އެކުލަވާލީ މިހާރު ހަދާފައިވާ ގަވައިދަށް ގާނޫނީ ބާރުތަކެއް ދިނުމަށާއި ބޭރު ފައިސާ މާރުކުރުމުގެ މަސައްކަތް ވަކި ނިޒާމެއްގެ ތެރެއިން ހަރުދަނާ ގޮތަކަށް ކުރެވޭނެ އިންތިޒާމުތަކެއް ހަމަޖެއްސުމަށް ކަމަށެވެ. ބިލް، ގާނޫނަކަށް ވެގެން އަންނައިރު މިހާރު އޮތް ގަވައިދުގެ ތެރެއިން ޑޮލަރު މާރުކުރުމުގައި ލުއި ދީފައި ނުވާނެ ކަމަށާއި އެ ގަވައިދުގައިވާ ދުވަހުން ފެށިގެން ގަވައިދުގައިވާ އަދަދަށް ޑޮލަރު މާރުކުރަންޖެހޭނެ ކަމަށްވެސް ވިދާޅުވި އެވެ.
މުނައްވަރު ވިދާޅުވީ ޓޫރިޒަމް ދާއިރާއަށް އެތައް ބިލިއަން ޑޮލަރެއް ކޮންމެ އަހަރަކު ލިބުނު ނަމަވެސް އެމްއެމްއޭ އަހަރެއްގެ ތެރޭގައި ލިބެނީ ބިލިއަނެއްހާ ޑޮލަރު ކަމަށާއި އޭގެ ތެރެއިން 700 މިލިއަން ޑޮލަރު ދަނީ އަސާސީ ބޭނުންތަކަށް ކުރާ ހަރަދާއި ލޯނު ދެއްކުމަށެވެ. އެހެންކަމުން އަސާސީ ހިދުމަތްތައް ދިނުން މެދުކެނޑުނަ ނުދިނުމަށްޓަކައި އެމްއެމްއޭ އަށް ޑޮލަރު ލިބޭނެ ގޮތަކެއް އޮންނަންޖެހޭ ކަމަށް ގަވަރުނަރު ވިދާޅުވި އެވެ.
މުނައްވަރު ވިދާޅުވީ ގަވައިދުގައިވާ ގޮތަށް ޑޮލަރު މާރުކުރުމުގެ ކަންކަން ކުރިއަށް ގޮސްފިނަމަ ރައީސް ޑރ. މުހައްމަދު މުއިއްޒު ވިދާޅުވި ގޮތަށް އެކި ބޭނުންތަކަށް މިހާރު އާންމުންނާއި ވިޔަފާރިވެރިންނަށް ލިބޭ ޑޮލަރުގެ ނިސްބަތް އިތުރުކުރެވި ކަޅު ބާޒާރުން ޑޮލަރު ހޯދަންޖެހޭ މައްސަލައަށް ލުއިތަކެއް ލިބޭނެ ކަމަށެވެ.
"ހަގީގަތުގައި ގަވައިދަކަށް ނާދޭ އެއްވެސް ބަދަލެއް. ނޫސްތަކުން މިއަދު އެކަން އެވަނީ ވަރަށް ބޮޑަށް އޮޅުވާލާފައި،" ގަވަރުނަރު ވިދާޅުވި އެވެ.
ބޭރު ފައިސާއާ ބެހޭ ބިލްގެ މުހިއްމު މައުލޫމާތުތައް ހިމެނޭހެން ހަދާފައިވާ ޕްރެޒެންޓޭޝަނެއްވެސް އެމްއެމްއޭ އިން މިއަދު ވަނީ ނޫސްވެރިންނާ ހިއްސާކޮށްފަ އެވެ.
ޕްރެޒެންޓޭޝަންގައި ހިއްސާކުރި މައުލޫމާތުގައިވާ ގޮތުން ކެޓަގަރީ "އޭ" ގައިވާ ރިސޯޓުތަކާއި ހޮޓާތަކާއި ޓޫރިސްޓް އުޅަނދުތަކަށް އަންނަ ކޮންމެ ފަތުރުވެރިޔަކު 500 ޑޮލަރުގެ ރޭޓުން ރާއްޖޭގެ ކޮންމެވެސް ބޭންކަކަށް މާރުކުރަންޖެހެ އެވެ. އަދި ކެޓަގަރީ "ބީ"ގައި ހިމެނޭ ގެސްޓް ހައުސްތަކުން ކޮންމެ ފަތުރުވެރިޔެއްގެ ބޮލަކަށް 25 ޑޮލަރުގެ ރޭޓުން ރާއްޖޭެ ބޭންކަކަށް ޖަމާކުރަންޖެހެ އެވެ. ޑޮލަރު މާރުކުރަން މަޖުބޫރުކުރުމަށް ހަދާފައިވާ ގަވައިދުގައިވެސް އޮތީ އެގޮތަށެވެ.
ގަވައިދުގައި ނެތް ކަމެއްގެ ގޮތުގައި ބިލަށް ގެނައި މައިގަނޑު ބަދަލަކީ ޓޫރިޒަމް ދާއިރާގައި ހަރަކާތްތެރިވާ ފަރާތްތަކަށް އިންސާފުވެރިވުމުގެ ގޮތުން އިތުރު ކެޓަގަރީއެއް ބިލްގައި ހިމެނުން ކަމަށް ގަވަރުނަރު ވިދާޅުވި އެވެ. އެގޮތުން ބިލްގައި ވަނީ ޓޫރިޒަމް ދާއިރާގައި ނުހިމެނޭ ފަރާތްތަކަށްވެސް އަހަރަކު 20 މިލިއަން އެމެރިކާ ޑޮލަރަށް ވާ އަދަދަށް ބޭރު ފައިސާ ލިބޭ ނަމަ އެފަދަ ފަރާތްތަކުންވެސް އެގޮތަށް ލިބޭ ފައިސާގެ 25 ޕަސެންޓަށް ވުރެ ބޮޑު ނުވާ އަދަދެއް ރާއްޖޭގެ ބޭންކަކަށް ޖަމާކޮށް މާރުކުރަން ލާޒިމުކޮށްފައިވެ އެވެ.
ގަވަރުނަރު ވިދާޅުވީ ޑޮލަރު މާރުކުރުމުގެ ގަވައިދަށް ބަދަލެއް ގެނެސް ލުއިތަކެއް ދީފައި ނުވި ނަމަވެސް ގަވައިދު އޮތް ގޮތުން ޓޫރިޒަމް ދާއިރާގެ ބައެއް ފަރާތްތަކުގެ ޝަކުވާތަކެއް ހުރުމުން އަލަށް އެކުލަވާލި ބިލްގައި އެފަދަ ޝަކުވާތަކަށް ހައްލުތަކެއް ހޯދައިދިނުމަށް މަސައްކަތްކޮށްފައިވާނެ ކަމަށެވެ.