ދިވެހި ގައުމިއްޔަތު އިސްވަރުގެ ފުރަތަމަ މަހާސިންތާ "ކަޅުއޮށްފުންމި - ދިވެހި ގައުމިއްޔަތުގެ ދަރުބާރު" ހުޅުވައިފި އެވެ.
މި މަހާސިންތާ މިއަދު ހުޅުއްވައިދެއްވީ ރައީސުލްޖުމްހޫރިއްޔާގެ ނައިބް ހުސައިން މުހައްމަދު ލަތީފް އެވެ.
އިސްލާމިކް ޔުނިވަސިޓީގައި ކުރިއަށްދާ މިމަހާސިންތާ އަކީ ދިވެހި ގައުމިއްޔަތުގެ އިސްވަރުގެ ފަުރަތަމަ މަހަސިންތާ އެވެ. މީގެފަހުން ދިވެހި ގައުމިއްޔަތު ކޮލެޖުގެ ފަރާތުން ކޮންމެ އަހަރަކު ދެ ފަހަރު މިފަދަ މަހާސިންތާއެއް ބޭއްވުމަށް ވަނީ ނިންމާފަ އެވެ.
މިމަހާސިންތާގައި ވަހަކަ ދައްކަވަމުން ދިވެހި ލެންގްއޭޖް ހެރިޓޭޖް އެންޑް ކަލްޗާ މިނިސްޓަރު އާދަމް ނަސީރު އިބްރާހިމް ވިދާޅުވީ މިއީ ދިވެހި ބަހާ ތަރިކައާއި މެދު އިލްމީ ނަޒަރަކުން ވިސްނަން ފެށުމުގެ ފެށުމެއް ކަމަށެވެ. ދާއިމީ ގޮތެއްގައި މިކަން ކުރިއަށް ގެންދިއުމަށް ރާވާލައިގެން ބައެއް ކަންކަން ކުރިއަށް ގެންދަންޖެހޭ ކަމަށްވެސް ވިދާޅުވި އެވެ.
"މިއީ އަހަރެއްގެ ތެރެއިން ރާވާލެވިގެން ވަކި ތަރުތީބަކުން އިލްމީ ވިސްނުމެއްގެ ތެރެއިން ފެށޭ ފެށުމެއް،" މިނިސްޓަރު ވިދާޅުވި އެވެ.
މި މަހަސިންތާގައި ރައީސުލްޖުމްހޫރިއްޔާގެ ނައިބަށް ދިވެހި ގައުމިޔަތުގެ ދަރުބާރުގެ ރަމްޒު ވަނީ އަރުވާފަ އެވެ.
މިފަދަ މަހާސިންތާއެއްގެ މަގުސަދުތަކުގެ ތެރޭގައި ދިވެހިންގެ ތެރޭގައި އިލްމާއި ވިިސްނުމުގެ ގޮތުން ދިވެހިންގެ ދިވެހިވަންތަ ކަމަށް މަގުފަހިވާނެ ވިސްނުމާއި އިލްމު ރާއްޖޭގައި ފަތުރާ ފުޅާކުރުން ހިމެނެ އެވެ.