ގދ. ތިނަދޫއަށް ސިޓީއެއްގެ ދަރަޖަ ދިނުމުގައި އޮޅުވާލުންތަކެއް ހުރި ކަމަށް ތުހުމަތުކުރެވޭތީ އެ މައްސަލަ ބެލުމަށް ރައްޔިތުންގެ މަޖިލީހަށް ހުށަހަޅައިފި އެވެ.
މި މައްސަލަ މަޖިލީހަށް ހުށަހެޅުއްވީ ތިނަދޫއަށް ނިސްބަތްވާ ތިނަދޫ އުތުރު ދާއިރާގެ މެންބަރު ސައުދުﷲ ހިލްމީ އެވެ.
ސައުދުﷲގެ ސިޓީގައި ވިދާޅުވީ ތިނަދޫ ސިޓީއެއްގެ ދަރަޖަ ދިނުމުގައި ގާނޫނާ ހިލާފު ކަންތައްތަކެއް ހިންގާފައިވާތީ އާއި އަދި ކުރިއަށް އޮތް ދުވަސްތަކުގައި ވެސް އެފަދަ ކަންކަން ހިނގާފާނެތީ ތިނަދޫގެ މައްސަލަ ބެލުމަށް މަޖިލީހަށް ހުށަހެޅުއްވީ ކަމަށެވެ.
ތިނަދޫއަށް ސިޓީއެއްގެ ދަރަޖަ ދިނުމުގައި ގާނޫނާ ހިލާފު އެތައް ކަމެއް ހިންގާފައި ކަމަށް ބުނެ ތިނަދޫއަށް ސިޓީއެއްގެ ދަރަޖަ ދިނުމަށް ނިންމާފައިވާ ނިންމުން ބާތިލްކުރުމަށް ހައިކޯޓަށް މިދިޔަ ހަފްތާގެ ތެރޭގައި ވަނީ ދުސްތޫރީ މައްސަލައެއް ހުށަހަޅާފަ އެވެ.
މިމައްސަލަ ހައިކޯޓަށް ހުށަހެޅުއްވީ އެންވަޔަރަމަންޓް މިނިސްޓްރީގެ ކުރީގެ ޑެޕިއުޓީ މިނިސްޓަރު އަދި ތިނަދޫއާއި އެންމެ ބޮޑަށް ވާދަކުރާ ގދ. ގައްދޫއަށް ނިސްބަތްވާ ގާނޫނީ ވަކީލް މުހައްމަދު ރާގިބް އެވެ. ޑެޕިއުޓީ މިނިސްޓަރެއްގެ މަގާމުގައި ހުންނަވައިގެން ދައުލަތާ ދެކޮޅަށް ދައުވާކުރުމުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ރަގީބް މަގާމުންވެސް ވަކިިކުރައްވާފަ އެވެ.
ލާމަރުކަޒީ ގާނޫނު ބުނާ ގޮތުން ސިޓީއެއްގެ ދަރަޖަ ދެވޭނީ އާބާދީގައި 10،000 މީހުން ހިމެނޭ ރަށްތަކަށެވެ.
ތިނަދޫއަށް ސިޓީއެއްގެ ދަރަޖަ ދިނީ މިދިޔަ ރިޔާސީ އިންތިހާބުގެ ކެމްޕޭންގެ އެންމެ ފަހު ދުވަސްކޮޅު އޭރުގެ ރައީސުލްޖުމްހޫރިއްޔާ އަދި އެމްޑީޕީގެ އޭރުގެ ރިޔާސީ ކެންޑިޑޭޓް އިބްރާހީމް މުހައްމަދު ސޯލިހް އެވެ.
ތަފާސްހިސާބުތައް ދައްކާ ގޮތުން އޭރު ތިނަދޫގެ އާބާދީއަކީ 8،000 މީހުންނެވެ. އަދި އޭރު ތިނަދޫގައި ދިރިއުޅެނީ 5،000 އެއްހާ މީހުންނެވެ.