ސަރުކާރުގެ އޮފީސްތަކުގެ އޮންލައިން ޕޯޓަލް -- ނެޝަނަލް ޑިޖިޓަލް އައިޑެންޓިޓީ، އީފާސްގެ ފޭސް ރެކޮގްނިޝަންގެ އާ ވެންޑާއަކަށް ލެޓްވިއާގެ ކުންފުންޏެއް ހަމަޖައްސައިފި އެވެ.
އެންސީއައިޓީ އިން މިއަދު ނެރުނު ބަޔާނެއްގައި ބުނެފައިވަނީ އީފާސްގެ ފޭސް ރެކޮގްނިޝަން ހިދުމަތް ދިނުމަށް ކުރިން ހަވާލުކޮށްފައިވާ "ސަމް އެންޑް ސަބްސްޓެންސް ޕްރައިވެޑް ލިމިޓެޑް" (ސަމްސަބް) ކުންފުންޏާ ހަވާލުކޮށްފައިވާ މަސައްކަތްތައް އެ ކުންފުނިން ވަކިކޮށްފައިވާ ކަމަށެވެ.
ސަމްސަބް ރަޖިސްޓަރީކޮށްފައިވަނީ އިނގިރޭސިވިލާތުގައި ކަމަށްވީ ނަމަވެސް އެ ކުންފުންޏަކީ އިޒްރޭލަށް ނިސްބަތްވާ ބައެއްގެ ކުންފުންޏެކެވެ.
ދިވެހި ސަރުކާރުން އިޒުރޭލު މީހުންނާ ހަވާލުކޮށްފައިވާ މަސައްކަތް އަތުލީ އާންމުންގެ ފާޑުކިޔުން ބޮޑުވުމުން ކަމަށް އެންސީއައިޓީ އިން ބުންޏެވެ.
އީފާސްގެ ފޭސް ރެކޮގްނިޝަންގެ އާ ވެންޑާއަކަށް މިހާރު ހަމަޖައްސާފައިވަނީ ލެޓްވިއާގައި ރަޖިސްޓަރީކޮށްފައިވާ ރެގިއުލާ ފޮރެންސިކްސް އެވެ. ފޭސް ވެރިފިކޭޝަން މިހާރު ހަދަނީވެސް 30 އަހަރުގެ ތަޖުރިބާ ހުރި އެ ކުންފުނީގެ ހާއްސަ އެޕްލިކޭޝަނެއް ބޭނުންކޮށްގެން ކަމަށްވެސް ބަޔާނުގައިވެ އެވެ.
މި ގެނައި ބަދަލާއެކު މިވަގުތު ފޭސް ރިކޮގްނިޝަންގެ ހިދުމަތް ލިބޭނީ އިފާސް ވެބް މެދުވެރިކޮށް ކަމަށާއި އަދި އާންމުކޮށް ބޭނުންކުރާ ހުރިހާ ބްރައުޒާތަކުން އީފާސްއަށް ލޮގިންކޮށް ހިދުމަތް ލިބޭނެ ކަމަށްވެސް އެންސީއައިޓީން ބުންޏެވެ.
"މިކަން ހިނގާނީ ބޭރުގެ އެއްވެސް ފަރާތަކަށް އެއްވެސް ރައްޔިތެއްގެ ފޮޓޯއެއް ނުވަތަ އެ ނޫންވެސް އެހެން ޒާތީ މައުލޫމާތެއް ހިއްސާކުރުމަކާ ނުލައި އެންސީއައިޓީގެ އެތެރޭގައެވެ." ބަޔާނުގައިވެ އެވެ.