ދަނޑުވެރިކަމުގެ ވިޔަފާރިކުރުމަށްޓަކައި ސަރުކާރުން އުފައްދާފައިވާ ކުންފުނި އެގްރޯ ނެޝަނަލް ކޯޕަރޭޝަން (އެގްރޯނެޓް) ހިންގުން އިއްޔެއިން ފެށިގެން ވަގުތީގޮތުން ހުޓާލައިފި އެވެ.
ކުރީގެ ރައީސް އިބްރާހީމް މުހައްމަދު ސޯލިހްގެ ވެރިކަމުގައި 2020 ވަނަ އަހަރު އުފެއްދި އެގްރޯނެޓް ކުންފުނިން ބުނީ އެ ކުންފުނީގެ ދަށުން ކުރަމުންދިޔަ މަސައްކަތްތައް މިދިޔަ މަހު 30 އިން ފެށިގެން ހުޢްޓާލާފައިވާ ކަމަށެވެ.
މަސައްކަތްތައް ހުއްޓާލި ފަހުން ދަނޑުވެރިންނާ އެއްވެސް މުއާމަލާތެއް އެ ކުންފުނިން ނުކުރެ އެވެ. މިހާރު ހިނގަމުންދަނީ މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން (އެމްއައިޑީއެފްސީޒެޑް)ގެ ދަށަށް އެގްރޯނެޓް ބަދަލު ކުރުމުގެ މަސައްކަތް ކަމަށްވެސް އެ ކުންފުނިން ބުންޏެވެ.
އެގްރޯނެޓުން ބުނީ މިވަގުތު ދަނޑުވެރިންގެ އަތުން ތަކެތި ގަތުން ހުއްޓާލި ނަމަވެސް ކުންފުނީގައި ތިބި މުވައްޒަފުން ވަޒީފާއިން ވަކިނުކުރާ ކަމަށާއި ކުންފުނީގައި މަސައްކަތް ކުރަމުންދާ ކަމަށެވެ.
ރައީސް ސޯލިހް ވެރިކަމުގައި އެގްރޯނެޓް އުފެއްދީ ދަނޑުވެރިކަން ކުރިއެރުވުމާއި ދަނޑުވެރިކަމުން ރާއްޖޭގައި އުފައްދާ ތަކެތި އިތުރު ކުރުމުގެ ބޭނުމުގައެވެ.
ރާއްޖެއަށް ދިމާވެފައިވާ އިގުތިސާދީ ދަތިތަކުން އަރައިގަތުމަށްޓަކައި ސަރުކާރުން ކުންފުނިތަކަށް ކުރާ ހޭދަ ކުޑަކުރުމަށްޓަކައި ބައެއް ކުންފުނިތައް އުވާލައި ބައެއް ކުންފުނިތައް އެއްކޮށްލުމުގެ ޕްލޭންތައް ގެންގުޅުއްވާ ކަމަށް ފިނޭންސް މިނިސްޓްރީން ވަނީ ބުނެފަ އެވެ.