ލޯނުތައް ދެއްކުމަށް ކުރި ހޭދައާއެކު ދައުލަތުގެ ބަޖެޓުން މި އަހަރު 41 ބިލިއަން ރުފިޔާ ހަރަދުކޮށްފި އެވެ.
ފިނޭންސް މިނިސްޓްރީން އެންމެފަހުން އާންމުކުރި ވީކްލީ ފިސްކަލް ޑިވެލޮޕްމަންޓް ރިޕޯޓް ދައްކާ ގޮތުން ލޯނުތައް ދެއްކުމަށް ކުރި ހޭދައާއެކު މިމަހުގެ ހަތް ވަނަ ދުވަހުގެ ނިޔަލަށް ޖުމްލަ 41.59 ބިލިއަން ރުފިޔާ ހޭދަކޮށްފައިވެ އެވެ. މި އަދަދު މިދިޔަ އަހަރުގެ މި މުއްދަތުގައި ހުރީ 41.2 ބިލިއަން ރުފިޔާގަ އެވެ.
ލޯނަަށް ކުރި ހޭދަ ނުހިމަނައި ދައުލަތުގެ ހަރަދު މި އަހަރުގެ މި މުއްދަތުގައި ހުރީ 39.5 ބިލިއަން ރުފިޔާގަ އެވެ.
މީގެ ތެރެއިން 28.1 ބިލިއަން ރުފިޔާ -- 71 ޕަސެންޓަކީ ރިކަރަންޓް ހަރަދެވެ.
އެ ގޮތުން މުވައްޒަފުންގެ މުސާރަ އާއި އިނާޔަތް އަދި ޕެންޝަނަށް 11.2 ބިލިއަން ރުފިޔާ ހޭދަކޮށްފައިވާއިރު އިދާރީ އަދި ހިންގުމުގެ ހަރަދަށް 16.8 ބިލިއަން ރުފިޔާ ހޭދަކޮށްފައިވެ އެވެ.
މުސާރަ އާއި އިނާޔަތް އަދި ޕެންޝަނަށް މިދިޔަ އަހަރުގެ މި މުއްދަތުގައި ހޭދަކުރީ 9.9 ބިލިއަން ރުފިޔާ އެވެ. އިދާރީ އަދި ހިންގުމުގެ ހަރަދު މިދިޔަ އަހަރުގެ މި މުއްދަތުގައި ހުރީ 16.2 ބިލިއަން ރުފިޔާގަ އެވެ.
ތަރައްގީގެ މަޝްރޫއުތައް -- ޕަބްލިކް ސެކްޓާ އިންވެސްޓްމަންޓް ޕްރޮގްރާމް (ޕީއެސްއައިޕީ) އަށް މި އަހަރު އަށް ބިލިއަން ރުފިޔާ ހޭދަކޮށްފައިވެ އެވެ. މި އަދަދު މިދިޔަ އަހަރުގެ މި މުއްދަތުގައި ހުރީ 10.2 ބިލިއަން ރުފިޔާގަ އެވެ.
ދައުލަތަށް މިއަހަރުގެ މިހާތަނަށް އާމްދަނީގެ ގޮތުގައި 29.3 ބިލިއަން ރުފިޔާ ލިބިފައިވާއިރު މީގެ ތެރޭގައި ޓެކްސް އާމްދަނީގެ ގޮތުގައި ލިބުނު 22.4 ބިލިއަން ރުފިޔާ އާއި ޓެކްސް ނޫން އާމްދަނީގެ ގޮތުގައި ލިބުނު 6.3 ބިލިއަން ރުފިޔާ ހިމެނެ އެވެ. މީގެ އިތުރުން ހިލޭ އެހީގެ ގޮތުގައި 565 މިލިއަން ރުފިޔާ ލިބުނެވެ.
އާމްދަނީ އާއި ހިލޭ އެހީގެ ގޮތުގައި މިދިޔަ އަހަރުގެ މި މުއްދަތުގައި ލިބުނީ 28.9 ބިލިއަން ރުފިޔާ އެވެ.