ދައުލަތުގެ މާލީ ނިޒާމު ހަރުދަނާ ކުރުމުގެ ގޮތުން ދައުލަތުގެ އެކިއެކި ދާއިރާތައް ރިފޯމް ކުރުމާ ބެހޭ މަސައްކަތްތައް ހަލުވި ކުރުމަށްޓަކައި އިކޮނޮމިކް ރިފޯމް އޮފީހެއް ގާއިމުކޮށް އެ އޮފީހުގެ "ކޮމިޝަނާ އޮފް ރިފޯމް"ގެ މަގާމަށް މީހަކު ހޯދަން އިއުލާންކޮށްފި އެވެ.
ފިނޭންސް މިނިސްޓްރީން މިއަދު ކޮށްފައިވާ އިއުލާނެއްގައި މި މަގާމަށް ކުރިމަތިލުމަށް ޝައުގުވެރިވާ ފަރާތްތަކަށް ފުރުސަތު ހުޅުވާލާފައިވަނީ މިމަހުގެ އަށްވަނަ ދުވަހުގެ މެންދުރުފަހު 1:00ގެ ނިޔަލަށެވެ.
ފިނޭންސް މިނިސްޓަރަށް ސީދާ ރިޕޯޓް ކުރަންޖެހޭ ގޮތަށް އަދި މިނިސްޓަރަށް ލަފާ ދެއްވަންޖެހޭ ގޮތަށް މި މަގާމަށް މީހަކު ހޯދަނީ ދެ އަހަރުގެ މުއްދަތަކަށެވެ.
އިއުލާންގައިވާ ގޮތުން މި މަގާމަށް ހޮވޭ ބޭފުޅަކަށް މުސާރަ ކަނޑައަޅާނީ ދެ ފަރާތުން ވާހަކަދައްކައިގެންނެވެ.
މައިގަނޑު ޝަރުތުތައް
- އެކައުންޓިން އަދި ފައިނޭންސްގެ ދާއިރާ އިން ޑިގްރީއެއް އޮތުން
- މަސައްކަތާ ގުޅޭ ދާއިރާ އިން 10 އަހަރުގެ ތަޖުރިބާ ހުރުން
- ގައުމީ އަދި ބައިނަލްއަގްވާމީ ފެންވަރުގައި ހޯދާފައިވާ ތަޖުރިބާ
- ސިޔާސަތު ކަނޑައެޅުމާއި ހިންގުމުގެ ދާއިރާގައި ހުރި ތަޖުރިބާ
ރައީސް ޑރ. މުހައްމަދު މުއިއްޒުގެ ސަރުކާރުން ވަނީ އިގްތިސާދީ ދާއިރާ އިސްލާހުކުރުމަށްޓަކައި ވަރުގަދަ ފިޔަވަޅުތަކެއް އެޅުމަށް ނިންމާފަ އެވެ. އެގޮތުން ދައުލަތުގެ ކުންފުނިތައް އެއްކޮށްލުމާއި ކޮންމެހެން އުވާލަންޖެހޭ ތަންތަން އުވާލުމާއި ސަބްސިޑީ ދިނުމުގެ އުސޫލު އިސްލާހުކުރުމާއި އާސަންދަ ހަމަޖައްސައިދޭ އުސޫލު އިސްލާހުކުރުން ފަދަ ކަންކަން ހިމެނެ އެވެ.