މޫސުމީ ވިއްސާރައިގެ ބާރު މި ދަނީ އަހަރުން އަހަރަށް ގަދަވަމުންނެވެ. އެކި ޤުދުރަތީ ކާރިސާތައް ދަނީ އިތުރުވަމުންނެވެ. ވައިގަދަވުމާއި، އުދަ އަރައި ރަށުތެރެ އެއްކޮށް ލޮނުކޮށްލުމުގެ ހާދިސާތައް ވެސް އަހަރުގެ އެކި ހިސާބުތަކުގައި ހިނގަމުން ދެއެވެ.
ރާއްޖޭގެ ތިރި އަދި ކުދި ޖަޒީރާތަކުގައި ހައްދާ ދަނޑުބިންތަކާއި، އެ ބިންތަކުން އުފައްދައި ގޮވާންކުރާ ތަކެއްޗަށް މި ފަދަ ހާދިސާތަކަކީ ބޮޑު ނުރައްކަލެކެވެ. އޭގެ އިތުރުން އެ ދަނޑުބިންތައް ހައްދައި ބަލަހައްޓާ ދަނޑުވެރިންނަށް މިއީ ނުހަނު ބޮޑު މާލީ ގެއްލުމެއް ވެސް މެއެވެ. އެތައް ހަފުތާއަކާއި މަސްތަކެއްގެ އިންތިޒާރުން ލިބޭ މޭވާ އަދި ތަރުކާރީކޮޅު، މިފަދަ ޤުދުރަތީ ހާދިސާއެއްގައި ހަލާކުވެ ނެތި ދިއުމަކީ ދަނޑުވެރިންނަށް ލިބޭ ނުހަނު ބޮޑު ގެއްލުމެކެވެ.
އެކަމަކު ދަނޑުބިންތަކަކީ ވެސް ތަކާފުލްގެ އުސޫލުން ރައްކާތެރިކަން ހޯދޭނެ ތަންތަނެވެ. އެލައިޑްގެ އިސްލާމިކް ވިންޑޯ، އަޔާދީ ތަކާފުލުން ޝަރީއާ އުސޫލުތަކާ އެއްގޮތްވާ ގޮތުގެ މަތިން "ކްރޮޕް ތަކާފުލް" ފޯރުކޮށްދެނީ މި ސަބަބުތަކަށް ޓަކައެވެ. ބޯ ވިއްސާރައާއި، ގަދަ ވަޔާއި، ހަނަފަސްކަމާއި، ސުނާމީ ފަދަ ފެންބޮޑުވުމުގެ ހާދިސާތަކާ އަދި ބިންގަނޑު ކަނޑައިގެންދިއުން ފަދަ ޤުދުރަތީ ކާރިސާތަކުން ދަނޑުބިމާއި ގޮވާންކޮޅު ހަލާކުވުމުގެ ފުރުޞަތު އޮތުމުން އެކަމުން ކުރިމަތިވެދާނެ މާލީ ގެއްލުމެއްގެ ބަދަލު ފޯރުކޮށްދިނުމަށެވެ.
އަޔާދީގެ "ކްރޮޕް ތަކާފުލް" ޕްލޭނުގެ ދަށުން ކަވަރޭޖު ފޯރުކޮށްދޭނީ ފަޅޮލާއި، ބައްޓާއި، ބަޓާނާއި، ކަރަޔާއި، މެލަނާއި، ކިއުކަންބާއާއި، ބަރަބޮލާ އަދި ދޮންކޭލަށެވެ. މިއިން ކޮންމެ ބާވަތަކަށް ކަނޑައެޅިފައިވާ "ކްރޮޕް ސައިކަލް" އެއް ނުވަތަ ކަވަރޭޖު މުއްދަތެއް ކަނޑައެޅިފައިވެއެވެ. ކަވަރޭޖު ފޯރުކޮށްދޭ މިންވަރު ކަނޑައެޅޭނީ ކަވަރޭޖު ހޯދާ ދަނޑުވެރިކަމުގެ ބާވަތާއި، ދަނޑުބިމުގެ ކުޑަބޮޑު މިނަށް ބަލާފައެވެ. އަދި ތަކާފުލް ޕްލޭން ބައްލަވައިގަތުމަށް ޓަކައި ދައްކާ ކޮންޓްރިބިއުޝަންގެ އަދަދު ވެސް ކަނޑައެޅޭނީ އެ ހައްދާ ބާވަތްތަކާއި ދަނޑުބިމުގެ މިނަށް ރިއާޔަތްކޮށެވެ.
ކުރިއަށް އޮތް 2025 ވަނަ އަހަރުގެ ބަރަކާތްތެރި ރަމަޟާން މަސް ދިމާވާނީ މާރިޗު މަހަށެވެ. އެ މަހަށް ބާކީ އޮތީ ހަތަރު މަހެއްހާ ދުވަހެވެ. އެހެންކަމުން އެ މަހަށް ތައްޔާރުވުމަށް ޓަކައި ދަނޑު ހެއްދުމުގެ މަސައްކަތް ފެށުމުގެ ކުރިން "ކްރޮޕް ތަކާފުލް" ޕްލޭނެއް ބައްލަވައިގަތުމަކީ ބުއްދިވެރި ފިޔަވަޅަކަށް ވާނެކަން ޔަޤީނެވެ. ޕްލޭނުގައި ހިމެނިފައިވާ ސަބަބެއް މެދުވެރިވެ، ދަނޑުބިންތަކަށް ފޯރާ ގެއްލުމެއްގެ ބަދަލު ލިބޭނެ އިންތިޒާމެއް އޭރުން ތަރުތީބުވެފައި އޮންނާނެއެވެ. ހިތްހަމަޖެހިލައިގެން، މާލީ ގޮތުން ރައްކާތެރިކަން ލިބޭނެކަމުގެ ފޮނި އުންމީދާ އެކު މަސައްކަތް ކޮށްލެވޭނެއެވެ.
އަޔާދީގެ "ކްރޮޕް ތަކާފުލް" އަކީ ބައްލަވައިގަތުމަށް ވަރަށް ފަސޭހަ ޕްލޭނެކެވެ. އިންޓަނެޓުން އެލައިޑް އިންޝުއަރަންސްގެ "މައި އެލައިޑް" ޕޯޓަލް މެދުވެރިކޮށް ކްރޮޕް ތަކާފުލް ޕްލޭނެއް ބައްލަވައިގަނެވޭނެއެވެ. "މައި އެލައިޑް" އަށް ވަންނަވައި، ދަނޑުގައި ހައްދާ ބާވަތާއި، އެ ބާވަތް ހައްދާ ދަނޑުބިމުގެ ސައިޒު ޖެއްސެވުމުން ކޮންޓްރިބިއުޝަނަށް ދައްކަވަންޖެހޭ މިންވަރާ އަދި ކަވަރޭޖު ލިމިޓުގެ އަންދާޒާއެއް ލިބިވަޑައިގަންނަވާނެއެވެ. އެއަށް ފަހު ކަވަރޭޖު ހޯއްދަވާ ދަނޑުގެ މައުލޫމާތާއި، ރަޖިސްޓަރީ ފަދަ ތަފުސީލުތައް ފޯރުކޮށްދިނުމުން "ކްރޮޕް ތަކާފުލް" ޕްލޭނެއް ބައްލަވައިގަނެވޭނެއެވެ.