ސޫރިއާގެ ހުޅަނގު އުތުރުގައި އޮތް ހަލަބު ޕުރޮވިންސަށް ހަޔިއަތު ތަހްރީރް އަލް-ޝާމް (އެޗްޓީއެސް)ގެ ހަނގުރާމަވެރިން އަތްގަދަކޮށް އެތަން ހިސާރުކޮށްފި އެވެ. އެހެންވެ ހަލަބު ޕުރޮވިންސް މިހާރު އޮތީ އެޗްޓީއެސްގެ ބާރުގެ ދަށުގައެވެ.
ހަލަބް ޕްރޮވިންސް ހަނގުރާމަވެރިންގެ އަތްދަށަށް ދިއުމާ ގުޅިގެން ސީރިއާގައި ތިބޭ ރަޝިއާ ސިފައިންނާ ގުޅުންހުރި ރަޝިއާގެ އިސް ޖެނެރަލެއް ކަމަށްވާ ސެރްގިޔޭ ކިސެލް ވަނީ މަގާމުންވެސް ވަކިކޮށްފަ އެވެ.
ނޮވެންބަރު 27 ވަނަ ދުވަހުން ފެށިގެން އެޗްޓީއެސްގެ ހަނގުރާމަވެރިން ހަލަބު ޕުރޮވިންސް ހިފުމަށް ދިޔައީ މަސައްކަތް ކުރަމުންނެވެ. މިހާރު ހަލަބު ސިޓީއާއި މައި ވައިގެ ބަނދަރު އޮތީ އެޗްޓީއެސްގެ ބާރުގެ ދަށުގަ އެވެ.
ސޫރިއާގެ ރައީސް ބައްޝާރް އަލް-އަސަދުގެ ސަރުކާރު ސިފައިންނަށް ރަޝިއާ އިން ގެންދަނީ ވާގިވެރިވަމުންނެވެ.
ސޫރިއާގެ އަސްކަރިއްޔާއަށް ހަތިޔާރު އެޅި ޖަމާއަތްތަކާ ދެކޮޅަށް ހަނގުރާމަ ކުރުމުގައި ރަޝިއާ އިން ކެނޑިނޭޅި ސަރުކާރަށް އެހީތެރިވަމުންދާނެ ކަމަށްވެސް އެ ގައުމުން ބުނެ އެވެ.
ހަލަބް ޕުރޮވިންސް ހަނގުރާމަވެރިންގެ އަތްދަށަށް ދިއުމަކީ އަސަދުގެ ސަރުކާރަށް ދިމާވާނެ ވަރަށް ބޮޑު ގޮންޖެހުމެކެވެ. ނަމަވެސް ރަޝިއާ އާއި އީރާންގެ އެހީތެރިކަމާއެކު، ސޫރިއާގެ އަސްކަރިއްޔާ އިން ކުރިއަށް އޮތް ދުވަސްތަކުގައި ހަނގުރާމަވެރިންނާ ދެކޮޅަށް ވަރުގަދަ ހަމަލާތަކެއް ދޭނެ ކަމަށް ރިޕޯޓްތައް ބުނެ އެވެ.
ސޫރިއާގެ މަސްރަޙު ފިނިކޮށް، ހަމަލާ ބަދަލުކުރުން ހުއްޓުވުމަކަށް ގެނައުމަށް ރަޝިއާ އާއި ތުރުކީވިލާތުން ވެސް ދަނީ ގުޅިގެން މަސައްކަތްތަކެއް ކުރަމުންނެވެ. މިކަމާ ގުޅޭގޮތުން މަޝްވަރާ ކުރެއްވުމަށް ރަޝިއާގެ ހާރިޖީ ވަޒީރު ސެރްގިޔޭ ލެވްރޮފް ވަނީ ތުރުކީވިލާތުގެ ހާރިޖީ ވަޒީރު ހަކާން ފިދާނަށް ފޯނުން ގުޅުއްވާފަ އެވެ.
ރަޝިއާގެ ހާރިޖީ ވުޒާރާއިން ބުނީ ސޫރިއާގެ މަސްރަހު ހޫނުވުމާއި، ހާލަތު އިތުރަށް ނުރައްކާތެރިވަމުން ދިއުމާ ގުޅިގެން މައްސަލަތައް ހައްލުކުރުމާ ގުޅޭ ގޮތުން ދެ ބޭފުޅުން ފުޅާ ދާއިރާއެއްގައި މަޝްވަރާ ކުރައްވާފައިވާ ކަމުގައެވެ. އެޗްޓީއެސްގެ ހަނގުރާމަވެރިން ފަހަތަށް ޖެއްސުމަށް ސޫރިއާގެ އަސްކަރިއްޔާއަށް ބޭނުންވާ ހަތިޔާރާއި ސާމާނު ފޯރުކޮށްދިނުމަށްވެސް ރަޝިއާ އިން ދަނީ މަސައްކަތް ކުރަމުންނެވެ.