ގުޅިފަޅާއި ތިލަފުށްޓާ ދެމެދުގައި ތިލަމާލެ ބްރިޖުގެ ތަނބުތައް ޖެހުމުގެ މަސައްކަތް ކުރިއަށްދާތީ އެ ސަރަހައްދުން އެއްވެސް އުޅަނދެއް ދަތުރު ކުރުން މަނާކޮށްފި އެވެ.
ޓްރާންސްޕޯޓް މިނިސްޓްރީން މިއަދު ނެރުނު އިއުލާނެއްގައި ބުނެފައިވަނީ ގުޅިފަޅާއި ތިލަފުށްޓާ ދެމެދު ބްރިޖުގެ ތަނބުތައް ޖެހުމުގެ މަސައްކަތް މި ހަފްތާގެ ބުރާސްފަތި ދުވަހު ފަށާނެ ކަމަށެވެ.
ގުޅިފަޅާއި ތިލަފުށްޓާ ދެމެދު ހިމެނޭ ކަނޑުއޮޅި ބުރާސްފަތި ދުވަހުން ފެށިގެން ބަންދުކުރާނެ ކަމަށާއި އެހެންވެ އެ ސަރަހައްދުން އެއްވެސް އުޅަނދެއް ދަތުރު ނުކުރުމަށްވެސް ޓްރާންސްޕޯޓް މިނިސްޓްރީން ވަނީ އަންގާފަ އެވެ.
ތިލަމާލެ ބްރިޖުގެ މަސައްކަތް ކުރިއަށްދާތީ މާލެ އާއި ވިލިމާލެއާއި ދެމެދު އޮތް ކަނޑުއޮޅި ހުރަސްކޮށް ދަތުރު ނުކުރުމަށްވެސް ޓްރާންސްޕޯޓް މިނިސްޓްރީން ކުރިން އަންގާފައިވެ އެވެ.
ކުރީގެ ރައީސް އިބްރާހީމް މުހައްމަދު ސޯލިހްގެ ވެރިކަމުގައި ތިލަމާލެ ބްރިޖުގެ މަސައްކަތް ފެށީ މާލެ، ވިލިމާލެ، ގުޅިފަޅު އަދި ތިލަފުށި ގުޅާލުމަށެވެ.
ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތުމަށްފަހު ތިލަފުށްޓާއި ގިރާވަރު އަދި ގިރާވަރާއި އުތުރު ތިލަފަޅު ގުޅާލުމަށް އަޅަންޖެހޭ ބްރިޖުގެ އަމަލީ މަސައްކަތް 2026 ވަނަ އަހަރު ފަށާނެ ކަމަށް ވަނީ އިއުލާންކުރައްވާފަ އެވެ.
ތިލަމާލެ ބްރިޖުގެ 47 ޕަސަންޓް މަސައްކަތް ނިމިފައިވާއިރު 2026 ވަނަ އަހަރު މިމަޝްރޫއު އެއްކޮށް ނިމޭނެ ކަމަށް ސަރުކާރުން ބުނެ އެވެ.