ސަރުކާރުން ހުރިހާ ކަމެއްގެ ކޮންޓްރޯލް ނެގުމުގެ ބަދަލުގައި މަސްވެރިންނަށް ކަންކަން ދޫކުރުމުގެ އުސޫލެއް ސަރުކާރުން ގެންގުޅޭ ކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
އއ. ރަސްދޫއަށް މިއަދު ވަޑައިގެން އެ ރަށު ރައްޔިތުންނާ ބައްދަލުކުރައްވާ ރައީސް މުއިއްޒު ވިދާޅުވީ މަސްވެރިކަމަކީ ވަރަށް މުހިންމު ދާއިރާއަކަށް ވާއިރު ސަރުކާރުން ހުރިހާ ކަމެއްގެ ކޮންޓްރޯލް ނެގުމުގެ ބަދަލުގައި މަސްވެރިންނަށް ކަންކަން ދޫކުރުމުގެ އުސޫލެއް ގެންގުޅުއްވާ ކަމަށެވެ. މިއުސޫލުގެ ތެރެއިން އަމިއްލަ އޮޑިފަހަރުގައި އައިސް އުފައްދާ، މަހުގެ ތާޒާކަން ކަށަވަރު ކުރުމުގެ ފުރުސަތު އެބައޮތް ކަމަށްވެސް ވިދާޅުވި އެެވެ.
"އެކަމަށް ބޭނުންވާ އެހީގެ މަގުތައް ފަހިކޮށްދިނުމުގައި ކައުންސިލްތަކާއި ގުޅިގެން ސަރުކާރުން ހަރަކާތްތެރިވާނެ،" ރައީސް ވިދާޅުވި އެވެ.
އެމަނިކުފާނު ވިދާޅުވީ މިހިނގާ 2024 ވަނަ އަހަރަށް ލިބުނު ބަޖެޓަކީ ރިޔާސީ އިންތިހާބަށްފަހު އައި އިންތިގާލީ މަރުހަލާގައި އެމަނިކުފާނު ބަޖެޓުގައި ހިމަނަން އެދުނު ކަންކަމަށް ރިއާޔަތް ނުކޮށް ނިމިގެން ދިޔަ އެމްޑީޕީގެ ސަރުކާރުން އެކުލަވާލި ބަޖެޓެއް ކަމުގައިވާތީ ތަރައްގީގައި އޮތީ ތަޅެއް އެޅުވިފައި ކަމުގައި ވިދާޅުވި އެވެ.
ކުރިއަށް އޮތް 2025 އަދި 2026 ވަނަ އަހަރަށް ރާވާފައިވަނީ ކުޑަ ރަށެއް ބޮޑު ރަށެއް ތަފާތު ކުރުމެއް ނެތި، ވައުދުވި ގޮތަށް ތަރައްގީގެ އެކި މަޝްރޫއުތައް އަމަލީ ގޮތުން ފަށައި، ނިންމުން ކަމުގައިވެސް ރައީސް ވިދާޅުވި އެވެ. ނިމިގެން މިދާ އަހަރު ކުރަންޖެހުނު އެންމެ ބޮޑު ކަމަކީ ގައުމު ބަނގުރޫޓު ނުވެ، ސަލާމަތުގެ އައްސޭރިއަކަށް ގެންދިއުމުގެ މަސައްކަތް ކަމުގައިވެސް ވިދާޅުވި އެވެ. އަދި ގާއިމުކުރެވުނު ހަރުދަނާ ބިންގަލުގެ މަތީގައި ރާއްޖޭގެ އިގްތިސާދު ދާނީ ކުރިއަށް ކަން ފާހަގަކުރައްވަމުން ރައީސް ވިދާޅުވީ މި ފެށޭ އަހަރުގެ ތެރޭގައި ގިނަ މަސައްކަތްތަކެއް ފަށައިގަނެވޭނެ ކަމަށެވެ.
"ކުރިއަށް އޮތް އަހަރަށް ރައްޔިތުންގެ މަޖިލީހުން ފާސްކޮށްފައި އޮތް ބަޖެޓަކީ ރަސްދޫ ހިމެނޭހެން ރާއްޖޭގެ އެކި ކަންކޮޅުތަކުގައި ތަރައްގީގެ މަޝްރޫޢުތައް ހިންގޭނެ ފަދަ ގޮތަކަށް ފާސްކޮށްފައިވާ ބަޖެޓެއް،" އަންނަ އަހަރު މަޝްރޫއުތައް ކުރިއަށްދާނެ ކަމުގެ ޔަގީންކަން ދެއްވަމުން ރައީސް ވިދާޅުވި އެވެ.
އެމަނިކުފާނު ވިދާޅުވީ ހަގީގީ ކުރިއެރުމަކީ އިމާރާތްތައް ބިނާކުރުމާއެކު މުޖުމައެއްގައި ހުރި މައްސަލަތައް ހައްލުވެ، ފިކުރީ ތަރައްގީ ލިބި، ބިނާކުރަނިވި ފުދުންތެރި މުޖުތަމައެއް ބިނާވުން ކަމަށެވެ. އެފަދަ ވަށާޖެހެނިވި ތަރައްގީއެއް ގެނެސްދިނުމަކީ ރައްޔިތުން އެދޭ ގޮތް ކަމުގައިވާތީ އެ މަގަށް މަސައްކަތް ކުރައްވާނެ ކަމުގައިވެސް ވިދާޅުވި އެވެ. ސިޔާސީ އޮއިވަރުގައި ނުޖެހި، ގައުމީ ވިސްނުމެއްގައި، އަމިއްލަ ސިކުނޑިން ވިސްނައި، އެންމެން އެކަތިގަނޑެއްގެ ގޮތުގައި ކުރިއަށްދާނަމަ، ބިނާކުރަނިވި، ދެމެހެއްޓެނިވި، ހަގީގީ ތަރައްގީ ލިބިގެންދާނެ ކަމުގައިވެސް ވިދާޅުވި އެވެ.
އއ. ރަސްދޫއާ ގުޅޭގޮތުން ރައީސް ވިދާޅުވީ އެ ރަށަށް އެންމެ މުހިންމު އެއް ކަމަކީ ބަނދަރު ތަރައްގީކުރުން ކަމަށްވާތީ ރައްޔިތުން އެދޭ ހަލުވި ދުވެލީގައި އެ މަސައްކަތް ކޮށްދެއްވާނެ ކަމުގައި ވިދާޅުވި އެވެެ. ރަސްދޫއަކީ ފަތުރުވެރިކަމުގެ ސިނާއަތާއި މަސްވެރިކަންވެސްތް ފުޅާވެފައި އޮތް ރަށަކަށް ވާއިރު، ވެއްޓާ ރައްޓެހި ދެމެހެއްޓެނިވި ރޫހެއްގައި ފަތުރުވެރިކަމާއި މަސްވެރިކަން ކުރިއެރުވުމަށްވެސް ރައީސް ވަނީ އެދިވަޑައިގެންފަ އެވެ. އެގޮތުން އއ. ރަސްދޫގައި ހިންގާ ގެސްޓްހައުސްތަކަކީ އިރުގެ އަވިން ހަކަތަ އުފައްދާ ނިޒާމުތަކަށް ބަރޯސާވާ ތަންތަން ކަމުގައި ހަދައި، އިޔާދަކުރަނިވި ހަކަތައަށް ބަދަލުވުމަށް ރައީސް ވަނީ ހިތްވަރު ދެއްވާފަ އެވެ.