ނިމިދިޔަ އެމްޑީޕީ ސަރުކާރުން ފެށި މަޝްރޫއުތައް މިސަރުކާރުން ހުއްޓާ ނުލައި ކަމަށާއި އެކަމަކު އެ މަޝްރޫއުތަކުގެ މަސައްކަތްތައް އިތުރަށް ހަލުވިކޮށްފައިވާ ކަމަށް ނައިބް ރައީސް ހުސައިން މުހައްމަދު ލަތީފް ވިދާޅުވެއްޖެ އެވެ.
އއ. އުކުޅަހުގައި އެމްޑީޕީގެ ސަރުކާރުން ތަރައްގީކުރަން ފެށި ފުޓުބޯޅަ ދަނޑު ހުޅުވުމަށް އެރަށުގައި ބޭއްވި ރަސްމިއްޔާތުގައި ވާހަކަދައްކަވަމުން ނައިބް ރައީސް މަޝްރޫއުތައް ހުއްޓާނުލައި ކުރިއަށްދާކަން ރައީސް ޑރ. މުހައްމަދު މުއިއްޒު ގެންދަވަނީ ސާބިތުކޮށްދެއްވަމުން ކަމަށެވެ.
ނައިބް ރައީސް ވިދާޅުވީ ނިމިދިޔަ އެމްޑީޕީ ސަރުކާރުން ފަށާފައިވާ އެއްވެސް މަޝްރޫއެއް ހުއްޓާ ނުލައި ކުރިއަށް ގެންދިއުމަކީ ރައީސް މުއިއްޒުގެ ވައުދަކަށް ވާތީ މަޝްރޫއުތައް ހުއްޓާ ނުލައި ކުރިއަށް ގެންދާނެ ކަމަށެވެ.
"މަޝްރޫއުތައް ދެން ކުރިއަށް ގެންދާނީވެސް ކުރިއަށް ވުރެ ބާރަށް. މަޝްރޫއުތަކަށް ބޭނުންވާ ފައިސާ ހޯދައިގެން ރައްޔިތުންގެ ޙައްގުގައި މަޝްރޫއުތައް މިސަރުކާރުން އަވަހަށް ނިންމާނެ،" ހުސައިން ވިދާޅުވި އެވެ.
ނައިބް ރައީސް ވިދާޅުވީ ޒުވާނުން ބޭނުންވާ އެތައް ކަމެއް ކުރަން ހުރި ކަމަށް ގަބޫލުކުރައްވާ ކަމަށެވެ. އަދި އެކަން ނުވާނަމަ އަޑުއުފުލަން ޖެހޭނެ ކަމަށާއި ހަމައެއާއެކު ރައީސްގެ އިރުޝާދާ އެއްގޮތަށް ކަންކަން ހައްލުކުރަން އެއްބާރުލުން ދޭންވާނެ ކަމުގައިވެސް ވިދާޅުވި އެވެ.
"އެއީ [ޒުވާނުންނަކީ] އަޅުގަނޑުމެންގެ ގައުމުގެ ހަކަތަ. އެ ހަކަތައިގައި ވަރުނެތްނަމަ އަޅުގަނޑުމެންގެ ގައުމެއް ނުހިނގާނެ،" ނައިބް ރައީސް ވިދާޅުވި އެވެ.