ރައީސުލްޖުމްހޫރިއްޔާގެ ނައިބް ހުސައިން މުހައްމަދު ލަޠީފް، ކުޅުދުއްފުށީ ސިޓީއަށް ކުރައްވާ ރަސްމީ ދަތުރުފުޅެއްގައި މިއަދު ހެނދުނު ފުރާވަޑައިގަންނަވައިފި އެވެ.
މި ދަތުރުފުޅުގައި ރައީސުލްޖުމްހޫރިއްޔާގެ ނައިބްގެ އަރިހުގައި ސަރުކާރުގެ މަތީ ފަންތީގެ ވަފުދެއް ބައިވެރިވެވަޑައިގަންނަވަ އެވެ.
ރައީސުލްޖުމްހޫރިއްޔާގެ ނައިބުގެ މި ދަތުރުފުޅުގައި "ހަށިހެޔޮ ރާއްޖެ" ޕްރޮގްރާމް މިއަދު އިފްތިތާހް ކޮށްދެއްވުމަށް ވަނީ ހަމަޖެހިފަ އެވެ.
ހަށިހެޔޮ ރާއްޖެ ޕްރޮގުރާމަށް ލީޑާސް ތަމްރީނުކުރުމަށްޓަކާ ހަ ޒޯނަކަށް ބަހާލައިގެން، "ލީޑިން ލީޑާސް"ގެ ނަމުގައި މިނިސްޓްރީ އޮފް ސްޕޯޓްސް، ފިޓްނަސް އެންޑް ރެކްރިއޭޝަނުން، މި މަހުގެ ހަަތަރުވަނަ ދުވަހު ވަނީ ޕްރޮގުރާމެއްވެސް ފަށާފަ އެވެ.
ރައީސް އޮފީހުން ބުނީ މީހުން ބިނާކުރުމާއި ތަމްރީނުކުރުމަކީ ގައުމުގެ ކުރިމަގު އުޖާލާކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގެންގުޅުއްވާ ހަރުދަނާ ސިޔާސަތެއް ކަމަށެވެ. އެގޮތުން މިއަދު އިފްތިތާހް ކުރާ ޕްރޮގްރާމަކީވެސް މި ސަރުކާރުގެ ހަފްތާ14ގެ ވައުދުތަކުގައި ހިމެނޭ، މޮޅެތި އެތުލީޓުން އުފެއްދުމާ ބެހޭ ދިގު ރާސްތާގެ ޕްރޮގްރާމް ފަރުމާކުރުމުގެ ސިޔާސަތުގެ ތެރެއިން ސްޕޯޓްސް މިނިސްޓްރީގެ ފަރާތުން ކުރިއަށް ގެންދާ ހަރަކާތެކެވެ.