ރާއްޖޭގެ ފުޓްބޯޅަ އަލުން ކޮޅަށް ނަގަން ކުރަންޖެހޭ މަސައްކަތުގައި ކުޑަކުދިންނާއި ޒުވާން ކުޅުންތެރިންގެ ކުރިއެރުމަށް ސަރުކާރުން ބޮޑު އިސްކަމެއް ދޭ ކަމަށް ނައިބް ރައީސް ހުސައިން މުހައްމަދު ލަތީފް ވިދާޅުވެއްޖެ އެވެ.
ނައިބް ރައީސް މިހެން ވިދާޅުވީ ސޮކަ ވެޓަރަންސް އެސޯސިއޭޝަނުން އިއްޔެ ހަވީރު ބޭއްވި މައިލޯ 14 އަހަރުން ދަށުގެ އެކަޑަމީ މުބާރާތުގެ ފައިނަލް މެޗް ބެއްލެވުމަށް ހެންވޭރު ދަނޑަށް ވަޑައިގެން ދެއްކެވި ވާހަަކަފުޅުގަ އެވެ.
ނަސްރުގެ ދުވަހުގެ ހަރަކާތްތައް ހިނގަމުން ދަނިކޮށް މި މުބާރާތަށް ވަޑައިގެންނެވީ ރައީސް ޑރ. މުހައްމަދު މުއިއްޒު އާއި ސަރުކާރުން މިކަމަށް ދެއްވާ ސަމާލުކަމުގެ ސަބަބުން ކަމަށްވެސް ނައިބް ރައީސް ވިދާޅުވި އެވެ.
އެމަނިކުފާނު ވިދާޅުވީ ޒުވާން އުމުރުފުރާތަކުގައި މިހާރު ވަރަށް ހުނަރުވެރި ކުޅުންތެރިން ފެންނަމުންދާ ކަމަށެވެ. އަދި މިއީ އެ ކުދިންގެ ބެލެނިވެރިންނާއި މައިންބަފައިން ރެއާއި ދުވާލު ކުރަމުންދާ ހޭދައިގެ ފޮނި ނަތީޖާ ކަމަށް ވިދާޅުވި އެވެ.
"ތި ހޭދައިގެ ފޮނިކަން މުޅި ދައުލަތުން ބޭނުންވޭ އޭގެ ފޮނި މަންފާ އެ ރައްޔިތަކަށް ނުވަތަ އެ ބެލެނިވެރިޔަކަށް ނުވަތަ އެ މަންމަޔަކަށް ލިބޭނެ ދުވަހެއް ހޯދައި ދޭން. އެއީ އަޅުގަނޑުމެން މިކުރާ މަސައްކަތަކީ،" ނައިބު ރައީސް ވިދާޅުވި އެވެ.
"މާގިނަ ވާހަކައެއް މި ފުރުސަތުގައި ނުދަންނަވާނަން. އެހެންނަމަވެސް ހަނދާނުގައި ބަހައްޓަން ޖެހެނީ މިވެސް ގައުމީ މަސައްކަތެއްކަން. ގައުމީ ލެވެލްގައި ކޮންމެ ކުއްޖަކުވެސް ގައުމީ ރޫހުގައި ކުޅެން މަސައްކަތް ކުރަންޖެހޭކަން. އެއީ، އަޅުގަނޑުމެންގެ ގައުމީ ކާމިޔާބީއެއް. އެ ކާމިޔާބީއާ ހަމައަށް ދެވޭނީ ތިޔަ ކުޅުންތެރިންގެ ބުރަ މަސައްކަތާ އެކީގައި،" އެމަނިކުފާނު ވިދާޅުވި އެވެ.
މި މުބާރާތުގެ ފައިނަލް މެޗުގައި ސުޕަ ޔުނައިޓެޑް ސްޕޯޓްސް އެކަޑަމީއާއި އެޑްވެންޗާ ފުޓްބޯޅަ އެކަޑަމީ ބައްދަލުކުރި އެވެ. މި މެޗުން ސުޕަ ޔުނައިޓެޑް ސްޕޯޓްސް އެކަޑަމީން 7-0 ން މޮޅުވެ، ޗެމްޕިއަންކަން ހޯދި އެވެ.