އެމްއެންޑީއެފްގެ ސާޖަންޓް ފަސްޓް ކްލާސް ނަސްރުﷲ އަހްމަދުގެ 95 ވަނަ މެރެތަންގެ މެޑައްޔާއި ޖާޒީ ރައީސުލްޖުމްހޫރިއްޔާގެ ނައިބް ހުސައިން މުހައްމަދު ލަފަތީށް ހަދިޔާކުރައްވައިފި އެވެ.
މެރަތަން ދުވުމުގައި ގިނަ ކާމިޔާބީތައް ހާސިލްކޮށްފައިވާ ދިވެހި ދުވުންތެރިޔާ ނަސްރުގެ 95 ވަނަ މެރެތަންގެ މެޑައްޔާއި ޖާޒީ ނައިބް ރައީސަށް ހަދިޔާކުރީ މިކަމަށްޓަކައި މިއަދު ރައީސުލްޖުމްހޫރިއްޔާގެ އޮފީހުގައި ބޭއްވެވި ހާއްސަ ރަސްމިއްޔާތެއް ގައެވެ.
މި ބައްދަލުކުރެއްވުމުގައި ވާހަކަ ދައްކަވަމުން ނައިބް ރައީސް ވަނީ މެރެތަން ދުވުމުގެ ދާއިރާއިން ނަސްރުﷲ ހޯއްދަވާފައިވާ ކާމިޔާބީ ފާހަގަކުރައްވައި އެކަމަށް މަރުހަބާ ދަންނަވާފަ އެވެ. އަދި ނަސްރުﷲގެ އެންމެ ބޮޑު އެއް އަމާޒު ކަމުގައިވާ، އެންމެ ގިނަ މެރެތަން ދުވެފައިވާ އޭޝިއާ ސަރަހައްދުގެ ދުވުންތެރިޔާގެ ޝަރަފު ހޯދުމަށް ކުރާ މަސައްކަތަށް އެމަނިކުފާނު ހިތްވަރު ދެއްވި އެވެ.
މީގެ އިތުރުން ނަސްރުﷲ ބޭނުންވާ ކަންކަން އޮޅުންފިލުއްވައި އެކަންކަމުގައި ސަރުކާރަށް ދެވެން އޮތް އެއްބާރުލުމެއް ދިނުމަށްވެސް މިބައްދަލުވުމުގައި މަޝްވަރާ ކުރެއްވި އެވެ.
މެރެތަންގެ ރޮނގުން ކުރިއަށް ދިއުމަށް 1999 ވަނަ އަހަރުގެ ކުރީކޮޅު މަސައްކަތް ފެށި ނަސްރުالله އަށް އެންމެ ފާހަގަކޮށްލެވޭ އަހަރަކީ 2018 ވަނަ އަހަރެވެ. އެއީ އެ އަހަރު 13 މެރެތަންގައި ބައިވެރިވެގެން، އެ ހުރިހާ މެރެތަނެއްވެސް ކަނޑައަޅާފައިވާ ވަގުތަށް ވުރެ ހަތަރު ގަޑިއިރު ކުރިން އެ އަަހަރު ނިންމާލެވިފައިވާތީ އެވެ.
ނަސްރުاللهގެ ފާހަގަކޮށްލެވޭ ކާމިޔާބީތަކުގެ ތެރޭގައި 2020 ވަނަ އަހަރު އިންޑިއާގައި ބޭއްވި ހިންދުސްތާން މެރެތަނުން އެއްވަނަ މަގާމު ހޯދުންވެސް ހިމެނެ އެވެ.