ޕޯޗުގަލްގެ މަޝްހޫރު ފުޓުބޯޅަ ކުޅުންތެރިޔާ ނާނީ ވެސް އެންމެ ފަހުން ބޫޓު ބަހައްޓައި ފުޓުބޯޅާއިން ރިޓަޔާ ކުރަން ނިންމައިފި އެވެ.
އުމުރުން 38 އަހަރުގެ ނާނީ އެންމެފަހުން ކުޅުނީ އޭނާގެ ފުރަތަމަ ކުލަބް، ސްޕޯޓިން ލިޒްބަންއާ އެކު އޮތް މެޗުގައެވެ.
"އަހަރެންގެ ފުޓްބޯޅަ ކެރިއަރު ނިންމާލުމަށް މިއީ އެންމެ އެކަށީގެންވާ ވަގުތު ކަމުގައި ދެކެނީ. މީގެ 20 އަހަރު ދުވަހުގެ ތެރޭގައި ގިނަ ތަޖުރިބާތައް ކޮށްފިން. އުފާވެރި އަދި ހިތާމަވެރި މިނެޓުތަކުގެ ތެރޭގައި އެކުގައި ތިބި މީހުންނަށް ޝުކުރު އަދާކުރަން،" ސޯޝަލް މީޑިއާގައި ނާނީ ހާމަކޮށްފައިވެ އެވެ.
ދެހާސް ހަތްވަނަ އަހަރު ސްޕޯޓިންގް ދޫކޮށް، ނާނީ މެންޗެސްޓާ ޔުނައިޓެޑަށް 25 މިލިއަން ޑޮލަރަށް ބަދަލުވި އެވެ. ޖުމްލަ 230 މެޗުގައި ކުޅެ، 41 ގޯލް އެ ޓީމަށް ޖަހައިދީފައިވެ އެވެ.
ޔުނައިޓެޑާއެކު ޕްރިމިއާ ލީގް، ޗެމްޕިއަންސް ލީގް އަދި ކްލަބް ވޯލްޑް ކަޕް ކާމިޔާބުކޮށްފައިވެ އެވެ. 2011 ވަނަ އަހަރު އެ ކުލަބުގެ އެންމެ މޮޅު ކުޅުންތެރިޔާގެ މަގާމުވެސް އޭނާއަށް ލިބިފައިވެ އެވެ.
ސްޕޯޓިން، ޔުނައިޓެޑް އަދި އެސްޓްރެލާގެ އިތުރުން ނާނީ ކުޅެފައިވާ ޓީމުތަކަކީ ވެލެންސިއާ، ލާޒިއޯ، އޯލެންޑޯ ސިޓީ، ފެނަބަޗޭ، ވެނިސް، މެލްބަން ވިކްޓަރީ އަދި އަޑާނާ ޑެމިރުސްޕޯރެވެ.
ޕޯޗުގަލް ޓީމުގައި ދެހާސް ސޯޅަވަނަ އަހަރު ހިމެނުނު ނާނީ، ޖުމްލަ 112 މެޗު ކުޅެ 24 ގޯލް ޕޯޗްގަލަށް ޖަހައިދީފައިވެ އެވެ.