ސެމްސަންގްގެ އެންމެ ފަހުގެ ފޯނު ދިރާގުން ނެރެފި

ސެމްސަންގްގެ އެންމެ ފަހުގެ ފޯނު ދިރާގުން ރާއްޖޭގެ ބާޒާރުގައި ވިއްކަން ފަށައިފި އެވެ.

ދުނިޔޭގެ ބާޒާރަށް ނެރުނު ދުވަހާ އެއް ދުވަހެއްގައި މިރޭ ބާޒާރަށް ނެރެފައިވާ ސެމްސަންގް ސީރީޒްގެ އެސް 7 އަދި ސެމްސަންގް އެސް 7 އެޖް ބާޒާރަށް ނެރެދެއްވީ ދިރާގުގެ ސީއީއޯ އިސްމާއިލް ވަހީދާއި ސެމްސަންގުން ރާއްޖެ އާއި ސްރީލަންކާގެ މެނޭޖިން ޑިރެކްޓަރު ޔަންގްމިން ސިންގް އެވެ.

ދިރާގުން މިރޭ ބޭއްވި ރަސްމިއްޔާތުގައި މި ފޯނަށް ކުރިއާލާ ބުކިން ހެއްދި މީހުންގެ ތެރެއިން ފުރަތަމަ ފޯނު ލިބުނު މީހާ ބުނީ އޭނާ އަބަދުވެސް ގެންގުޅެނީ ސެމްސަންގް ފޯނު ކަމަށެވެ.

"ވަރަށް އުފާވެ، ދިރާގުން މިފަދަ ފޯނެއް ތައާރަފު ކުރީތީ. އެންމެ ފުރަތަމަ ފޯނު ލިބުނީ ގާތްގަނޑަކަށް ދޮޅު ގަޑިއިރެއްހާ އިރު ކިޔޫގައި ހުރެގެން،" ފޯނު ލިބުމާއެކު އުފަލުން ހުރެ އޭނާ ބުންޏެވެ.

ދިރާގުން ސެމްސަންގް ފޯނު ވިއްކަނީ އެޑްވާންސްގެ ގޮތުގައި 2،499ރ. ދެއްކުމުންނެވެ. މި ފޯނަށް މަހަކު 799ރ ދައްކާ ގޮތަށް 32 ޖީބީގެ އެސް7 ގެ ފޯނެއް ލިބެ އެވެ. އަދި މަހަކު 949ރ. ދެއްކުމުން 32 ޖީބީގެ އެސް7 އެޖް ފޯނެއް ލިބެ އެވެ. އެ ކުންފުނިން މި ފޯނު އެއްކޮށް ފައިސާ ދައްކާ ގޮތަށް ވިއްކަނީ އެސް7 11،499ރ. އަށެވެ. އަދި އެސް7 އެޖް ފޯނެއް ވިއްކަނީ 13،499 އަށެވެ.