ގާނޫނުއަސާސީއަށް އިސްލާހު ގެނައީ ރައްޔިތުންގެ ދިފާއުގައި ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.
އއ. މަތިވެރީގެ ރައްޔިތުންނާ ބައްދަލުކުރައްވާ ރައީސް މުއިއްޒު ވިދާޅުވީ ގާނޫނުއަސާސީއަށް ގެނައި ބަދަލުތަކުގެ ސަބަބުން ރައްޔިތުންގެ ބާރުވެރިކަން އިތުރު ކުރެވިފައިވާކަން ސިޔާސީ ތައައްސަބުތަކުން އެއްކިބާވެ ވިސްނާ ކޮންމެ މީހަކަށް އެނގޭނެ ކަމަށެވެ.
ގާނޫނުއަސާސީގެ މަގުސަދަކީ ދައުލަތުގެ ސިޔާދަތީ ބާރާއި އެ ބާރު ހިނގާ ސަރަހައްދު އިއުލާންކޮށް ކަނޑައެޅުމާއި ރައްޔިތުންގެ ބާރު ކަނޑައެޅުމާއި ރައްޔިތުންގެ ހައްގުތަކާއި ޒިންމާތައް ކަނޑައެޅުމާއި ދައުލަތުގެ ގާނޫނީ ވެރިކަން ހިންގުމުގެ ނިޒާމާއި ތަރުތީބާއި އިންތިޒާމުތައް ކަނޑައެޅުންކަން ކަމަށް ރައީސް މުއިއްޒު ވިދާޅުވި އެވެ.
ގާނޫނުއަސާސީއަށް ގެނައި އިސްލާހުތަކާއެކު ރާއްޖޭގެ ހާއްސަ އިގުތިސާދީ ސަރަހައްދުގެ އެންމެ އަކަ އިންޗިއަކަށްވެސް ބަދަލެއް ގެނެވޭނީ ރައްޔިތުންގެ މަޖިލީހުގެ އަގުލަބިއްޔަތުގެ ހަތަރުބައިކުޅަ ތިންބައިގެ ވޯޓުގެ އިތުރުން، 143،332 ރައްޔިތުންގެ ރުހުމާއެކު ކަމަށް ރައީސް ވިދާޅުވި އެވެ.
ރައީސް މުއިއްޒު ވަނީ ގާނޫނުއަސާސީގެ 251 ވަނަ މާއްދާއަށް ގެނައި ބަދަލާއެކު، ރާއްޖޭގައި ބޭރުގެ ސިފައިން ހަރަކާތްތެރިވުމަށް ރައްޔިތުންގެ މަޖިލީހުގެ އަގުލަބިއްޔަތު ހޯދަންޖެހޭކަން ފާހަގަކުރައްވާފަ އެވެ.
މީގެ އިތުރުން ރައްޔިތުންގެ މަޖިލީހުގެ މެންބަރަކަށްވުމުގެ ޝަރުތުތަކަށް ގެނައި ބަދަލާއެކު ރައްޔިތުންގެ ހައްގުތައް ހިމާޔަތްކޮށްދޭ ކަމަށް ވިދާޅުވި އެވެ.
އެގޮތުން މެންބަރުން އިންތިހާބުގައި ވާދަކުރަނީ ވަކި ފިކުރެއް ނުވަތަ ޕާޓީއެއް ތަމްސީލުކުރާ މީހެއްގެ ގޮތުން ކަމަށާއި އެހެންކަމުން، އިންތިހާބުވާ މެންބަރާ ދާއިރާގެ ރައްޔިތުންނާ ދެމެދު ވަނީ އަހުދެއް ކަމަށް ރައީސް މުއިއްޒު ވިދާޅުވި އެވެ.
ގާނޫނުއަސާސީއަށް އިސްލާހެއް ގެނައުމުގެ ކުރިން ރައްޔިތުންގެ ވޯޓުން ފާސްކުރަންޖެހޭ ހާލަތްތަކަށް ރިއާޔަތްކުރައްވާ ރައީސް މުއިއްޒު ވަނީ ފެންނަ ނުފެންނަ ވޯޓާމެދު ގޮތް ނިންމުމަށް މަދު މީސްކޮޅެއްގެ މުށުތެރޭގައި އޮތް ބާރު، ގާނޫނުއަސާސީއަށް ގެނައި އިސްލާހާއެކު ރައްޔިތުންގެ އަތްމައްޗަށް ދޫކޮށްލެވިފައިވާކަން ފާހަގަކުރައްވާފަ އެވެ.
ގާނޫނުއަސާސީއަށް ހަ ވަނަ އިސްލާހު ގެނައުމުގެ ބިލު ރައީސުލްޖުމްހޫރިއްޔާ ތަސްދީގު ކުރައްވާފައިވަނީ މިދިޔަ މަހުގެ 20 ވަނަ ދުވަހު އެވެ.