ގާނޫނުއަސާސީގެ މުހިންމު މާއްދާތަކަށް އިސްލާހު ގެންނަން ރައްޔިތުންގެ ހިޔާލު ހޯދުމުގެ ވޯޓަކަށް ދާން ޖެހޭ ކަމަށް ބުނާ މާއްދާ އިސްލާހު ކުރަންވެސް ރައްޔިތުންގެ ހިޔާލު ހޯދަން ޖެހޭ ގޮތަށް ގާނޫނުއަސާސީ އިސްލާހު ކުރަން ހުށަހަޅައިފި އެވެ.
ގާނޫނުއަސާސީއަށް މި އިސްލާހު ހުށަހެޅުއްވީ ސަރުކާރުގެ ފަރާތުން ހުޅުދޫ ދާއިރާގެ މެންބަރު މުހައްމަދު ޝާހިދު އެވެ.
ގާނޫނުއަސާސީގެ 262 ވަނަ މާއްދާގެ (ށ) ގައިވާ ގޮތުން އަންނަނިވި މާއްދާތަކަށް އިސްލާހެއް ގެންނަން މަޖިލީހުން ފާސްކުރާ އެއްވެސް ބިލެއް ރައީސް ތަސްދީގު ކުރަން ވާނީ އެ އިސްލާހެއް ގެނައުމަށް ރައްޔިތުން ރުހޭތޯ ބެލުމަށް ނަގާ ފެންނަ ނުފެންނަ ވޯޓަކުން އަޣުލަބިއްޔަތު ލިބިއްޖެ ނަމަ އެވެ.
ގާނޫނުއަސާސީގެ 262 ވަނަ މާއްދާގެ (ށ) ގައި ކަންކަން
- ގާނޫނުއަސާސީގެ ދެވަނަ ބާބު ކަމުގައިވާ "އަސާސީ ހައްގުތަކާއި މިނިވަންކަން" މި ބާބުގައި ހިމެނޭ އެއްވެސް މާއްދާއެއް.
- ގާނޫނުއަސާސީގެ 79 ވަނަ މާއްދާގެ (ހ) ރައްޔިތުންގެ މަޖިލީހުގެ އުމުރުން.
- ގާނޫނުއަސާސީގެ 107 ވަނަ މާއްދާ، ރިޔާސަތުގެ ދައުރު އާއި 108 ވަނަ މާއްދާ، ރައީސުލްޖުމްހޫރިއްޔާ އިންތިހާބުކުރާ ގޮތް.
މެންބަރު ޝާހިދު ވަނީ ގާނޫނުއަސާސީގެ 262 ވަނަ މާއްދާގެ ށ. ގެ ފަހަތަށް 4 ވަނަ ނަންބަރެއް އިތުރުކުރުމަށް ހުށަހަޅުއްވާފަ އެވެ.
އެ އިސްލާހުގައިވާ ގޮތުން ރައްޔިތުންގެ ހިޔާލު ހޯދަން ޖެހޭ ކަމަށް ބުނާ މާއްދާވެސް އިސްލާހު ކުރެވޭނީ ރައްޔިތުންގެ ވޯޓަކުން ރުހުން ލިބިއްޖެނަމަ އެވެ.
ގާނޫނުއަސާސީއަށް މި އިސްލާހު ހުށަހަޅާފައި މިވަނީ ބޮޑު ތިން ނިންމުމެއް ނިންމެވުމަށް ރައްޔިތުންގެ ފެންނަ ނުފެން ވޯޓަކަށް ދާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެފައި ވަނިކޮށެވެ.
އެގޮތުން ޖުމްހޫރީ ދުވަހާ ގުޅުވައިގެން ބޭއްވި ޖަލްސާގައި ރައީސް މުއިއްޒު ވިދާޅުވީ ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށްލުމަށާއި ރިޔާސީ ދައުރު ބަދަލުވާ ދުވަސް ނޮވެމްބަރު 11އަށް އަލުން ބަދަލުކޮށް ރިޔާސީ އިންތިހާބު ފުރަތަމަ ބުރުން ކާމިޔާބުވާ ގޮތް ހެދުމަށް ރައްޔިތުންގެ ފެންނަ ނުފެންނަ ވޯޓަކަށް ދާނެ ކަމަށެވެ.