ސީރިއާއަށް ނިސްބަތްވާ ގޯލާންގެ އުސްބިންތަކާއި ސީރިއާއާ ދެމެދު ހަދާފައި އޮންނަ ބަފަޒޯން (ރައްކާތެރި ސަރަހައްދު ނުވަތަ ހަތިޔާރު ގެންގުޅުން މަނާ ސަރަހައްދު) އަށް އިޒުރޭލު ސިފައިން ވަދެގަނެ އެ ސަރަހައްދު އިސްތިއުމާރުކުރުން އެއްގޮތަކަށް ވެސް ބަލައި ނުގަންނާނެކަން މިސްރުން އެމެރިކާއަށް އަންގައިފި އެވެ.
ގޯލާންގެ އުސްބިންތައް ކަމަށް ބަލާ ސަރަހައްދުން ބޮޑު ބައެއް 1967 ވަނަ އަހަރުން ފެށިގެން އޮންނަނީ އިޒުރޭލުގެ ސިފައިންގެ ބާރުގެ ދަށުގަ އެވެ. ޔަހޫދީން މިހާރު ބަލަނީ އެއީ އިޒުރޭލުގެ އަމިއްލަ ސަރަހައްދެއް ކަމަށެވެ.
ސީރިއާގައި އޮތް ބައްޝާރުލް އަސަދުގެ 25 އަހަރުވީ ދިގު ވެރިކަން ވެއްޓުމާ ގުޅިގެން ވާހަކަދައްކަވަމުން އިޒުރޭލުގެ ބޮޑުވަޒީރު ވަނީ ގޯލާންގެ އުސް ބިންތަކަކީ އިޒުރޭލާ ވަކިނުކުރެވޭނެ ސަރަހައްދެއް ކަމަށް ވިދާޅުވެފަ އެވެ.
ބަފަޒޯން ހަދާފައި އޮންނަނީ ގޯލާންގެ އުސްބިންތަކުން އިޒުރޭލު އިސްތިއުމާރުކޮށްފައި އޮންނަ ސަރަހައްދު އިޒުރޭލަށް ވާ ގޮތަށް -- އެ ހިސާބުން ފެށިގެން ސީރިއާއާ ދެމެދު އެވެ.
މިއީ ހަނގުރާމަކުރުން މަނާ ސަރަހައްދަކަށް ވާތީ މި ސަރަހައްދު ބަލަހައްޓަނީ ސީރިއާ ސަރުކާރުގެ ސިފައިންނެވެ. އަދި ބައެއް ސަރަހައްދުގައި އދގެ ސުލްހަ ބަލަހައްޓާ ފައުޖުތއް ވެސް ދެމިތިބެ އެވެ.
މި ސަރަހައްދުގައި ހަމަލާ ބަދަލުކުރުން ފަދަ ނޭދެވޭ ހަރަކާތެއް ހިނގާތޯ ތުރުކީ އާއި އެމެރިކާ ސިފައިން ވަޔާއި އެއްގަމުން ބަލަހައްޓަ އެވެ.
މިސްރުގެ ޚާރިޖީ ވަޒީރު ބަދުރު އަހްމަދު މުހައްމަދު އަބްދުލްއާތީ ވަނީ މި މައްސަލަ ކޮޅެއްގައި ޖެއްސުމަށް އެދިވަޑައިގެން އެމެރިކާގެ ސެކްރެޓަރީ އޮފް ސްޓޭޓް އެންތަނީ ބްލިންކެންއާ މަޝްވަރާކުރައްވާފަ އެވެ.
ސިޔާސީ ގޮތުން މި މައްސަލައަށް ހައްލެއް ހޯދުމަށް ދެ ލީޑަރުން ފޯނުން ދެއްކެވި ވާހަކަތަކުގައި ވަނީ އެއްބަސްވެ ވަޑައިގެންފަ އެވެ.
ރިޕޯޓްތައް ބުނާ ގޮތުން ބަދުރު އަބްދުލްއާތީ ވަނީ ސީރިއާގެ ބިންތަކުން އެއްވެސް މިންވަރެއް އިޒުރޭލުން އިސްތިއުމާރުނުކުރުމަށް އެދިވަޑައިގެން ބްލިންކެންއަށް ޝަކުވާ ދަންނަވާފަ އެވެ.
ސީރިއާގެ މަސްލަހަތު ހަމައަކަށް އެޅުވުމުގައި މިސްރުން އެހީތެރިވާނެ ކަމަށް އެ ގައުމުން ވަނީ ބުނެފަ އެވެ. އަދި ސީރިއާގެ އާންމު ރައްޔިތުންނަށް ލާބަހުރި ކޮންމެ ކަމެއްގައި މިސްރު ބައިވެރިވާނެ ކަމަށް ވެސް ވަނީ ބުނެފަ އެވެ.