މެންޗެސްޓާ ސިޓީއަށް ރެކޯޑް އަދަދަކަށް އާމްދަނީ ލިބިއްޖެ އެވެ.
މި އަހަރު އެ ކްލަބަށް ލިބިފައިވަނީ 715 މިލިއަން ޕައުންޑުގެ ރެކޯޑް އާމްދަނީއެކެވެ. މިއީ މިދިޔަ އަހަރުގެ އާމްދަނީއާ އަޅާބަލާއިރު 2.2 މިލިއަން ޕައުންޑްގެ އިތުރުވުމެކެވެ.
ވޭތުވެދިޔަ ހަތަރު ސީޒަނުގައި ޕްރިމިއާ ލީގް އަދި އިތުރު ދެ ބައިނަލްއަގްވާމީ ލީގް ކާމިޔާބު ކޮށްފައިވާ މެންޗެސްޓާ ސިޓީން، މިއަހަރު ކްލަބް ވޯލްޑް ކަޕް އަދި ޔޫރަޕިއަން ސުޕާ ކަޕްވެސް ކާމިޔާބު ކޮށްފައިވެ އެވެ.
ކްލަބުގެ ހަރަދުތައް 412.6 މިލިއަން ޕައުންޑަށް ކުޑަކޮށްފައިވާއިރު، ޓެކްސްއާ އެކު ލިބުނު ފައިދާއަކީ 73.8 މިލިއަން ޕައުންޑެވެ. ދެހާސް ސާދައިން ފެށިގެން ކޮވިޑް ދުވަސްތައް ފިޔަވާ، ކޮންމެ އަހަރަކުވެސް ކްލަބަށް ފައިދާވަމުން އަންނަ ކަމަށް ސިޓީން މައުލޫމާތު ދީފައިވެ އެވެ.
ކުޅުންތެރިން ގަތުމާއި ވިއްކުމުގެ ބާޒާރުން އެ ކްލަބަށް 92.8 މިލިއަން ޕައުންޑް ފައިދާވެފައިވާ ކަމަށް އެނގެއެވެ. އަލްވަރޭޒް، ކެންސެލޯ އަދި ޑެލަޕް ފަދަ ކުޅުންތެރިން މި އަހަރު ސިޓީން ވިއްކާލާފައިވެ އެވެ.
އަބޫ ދާބީގެ ރައްޔިތެއް ކަމަށްވާ ޝައިހް މަންސޫރު ކްލަބާއި ހަވާލުވިފަހުން، ޕްރިމިއާ ލީގުގެ ފައިނޭންޝަލް ފެއާ ޕްލޭ އާއި އެ ކްލަބު ހިލާފުވެފައިވާ ކަމަށް ބުނެ 115 މައްސަލައެއް އިނގިރޭސި އެފްއޭ އިން މިހާރު ބަލަމުންވެސް އެބަދެ އެވެ. މި މައްސަލަތަކުގެ އަޑުއެހުންތައް ނިމިފައިވާއިރު، ވަރަށް އަވަހަށް ގޮތެއް ނިންމާނެކަމަށް ރިޕޯޓްތައް ބުނެ އެވެ.
މީގެއިތުރުން ސިޓީން މިހާރު ފަށާފައިވަނީ އިއްތިހާދު ސްޓޭޑިއަމްގެ ނޯތު ސްޓޭންޑް މަރާމާތު ކުރުމުގެ މަސައްކަތެވެ. ތިންސަތޭކަ މިލިއަން ޕައުންޑުގެ މި މަޝްރޫއު ނިމޭއިރު ސްޓޭޑިއަމްގެ ޖާގަ 60،000 އަށް އިތުރު ވެގެންދާނެއެވެ.