ސީރިއާގެ ވެރިރަށް ދިމިޝްގައި -- މިހާތަނަށް ބަންދުކޮށްފައި ހުރި ތުރުކީ އެމްބަސީ، ޑިސެމްބަރު 14 ގައި ހުޅުވާނެ ކަމަށް ތުރުކީގެ ހާރިޖީ ވަޒީރު ހަކާން ފިދާން ވިދާޅުވެއްޖެ އެވެ.
ދިމިޝްގައި ހުންނަ ތުރުކީ އެމްބަސީ މިއަދު އަލުން މި ހުޅުވަނީ ބަންދުކޮށްފައި ހުންނަތާ 12 އަހަރު ފަހުންނެވެ.
ތުރުކީގެ ހާރިޖީ ވަޒީރު ވިދާޅުވި ގޮތުން އެމްބަސީ ހުޅުވުމަށްޓަކައި ކުރަންޖެހޭ ތައްޔާރީތައް މިހާރު ހުރީ ނިމިފަ އެވެ. އަދި މުވައްޒަފުން ދަތުރުމަތީގައި އުޅޭ ކަމަށް ވިދާޅުވި އެވެ.
ސީރިއާއަށް ތުރުކީން ކަނޑައަޅާ ސަފީރަކީ، އެފްރިކާގެ ގައުމެއް ކަމަށްވާ މޮރިޓާނިއާއަށް ވެސް ކަނޑައަޅުއްވާފައި ހުންނަވާ ސަފީރު ބުރުހާން ކޮރޮގުލޫ އެވެ.
ހަކާން ފިދާން ވިދާޅުވި ގޮތުން ސީރިއާގައި ހައިއަތު ތަހުރީރުއްޝާމް އިން ގާއިމުކުރާނީ ގައުމު ބިނާކުރެވޭ ވަރުގެ ސަރުކާރެކެވެ. އަދި އެއީ ތުރުކީގެ ތާއީދު އޮތް ބަޔަކަށް ވާނެ ކަމަށް ވިދާޅުވި އެވެ.
ސީރިއާގައި އޮތް 25 އަހަރުވީ ބައްޝާރުލް އަސަދުގެ ވެރިކަން، ހައިއަތު ތަހުރީރުއްޝާމްގެ ހަނގުރާމަވެެރިން ވަނީ ހަފުތާއެއް ތެރޭގައި ވައްޓާލާފަ އެވެ.
ހަނގުރާމަވެރިން ހަމަލާތައް ދޭން ފެށުމުން ވެރިކަމުގައި ހުންނެވި އަސަދު ގައުމު ދޫކުރައްވައި ވަޑައިގަތީ ރަޝިއާ އަށެވެ.
ހަކާން ވިދާޅުވި ގޮތުން ސީރިއާގައި މިހާރު އޮތް ހާލަތު ބަލައިގަންނަ ކަމަށާއި މަސްރަހު ބަދަލުކޮށްފައި އެ އޮތީ ތުރުކީގެ ތާއީދާ އެކު ކަމަށެވެ.
ސީރިއާގެ ފަސް މިލިއަނަށް ވުރެ ބޮޑު އާބާދީއެއް މިހާރު އޮތީ ހައިއަތު ތަހުރީރުއްޝާމްގެ ކޮންޓްރޯލްގައި ކަމަށްވެސް ވަޒީރު ވިދާޅުވި އެވެ. އެ މީހުންނަށް ބޭނުންވާ އަސާސީ ހުރިހާ ހިދުމަތްތަކެއް ބަރާބަރަށް ލިބެމުންދާ ކަމަށްވެސް ވިދާޅުވި އެވެ.
އޭނާ ވިދާޅުވީ ދަރުތުފަތުރާއި ބޭސް ފަރުވާ އަދި ދަރިވަރުންނަށް ކިޔަވައިދިނުން ފަދަ ހުރިހާ ކަމެއް ހަމައަކަށް އެޅެމުންދާ ކަމަށެވެ.
ހައިއަތު ތަހުރީރުއްޝާމްގެ ހަނގުރާމަވެރިން ސީރިއާގައި އިންތިގާލީ ސަރުކާރެއްވެސް މިހާރު ދަނީ އެކުލަވާލަމުންނެވެ. އެގޮތުން ވަގުތީ ބޮޑުވަޒީރުގެ މަގާމަށް މުހައްމަދު އަލް ބަޝީރު ވަނީ ހަމަޖައްސާފަ އެވެ.