މާލޭގައި ބުރާސްފަތި ދުވަހު ހިނގި އަލިފާނުގެ ހާދިސާގައި އެންމެ ބޮޑު އިސްކަމެއް ދިނީ އެއްވެސް މީހެއްގެ ފުރާނައަށް ގެއްލުން ލިބުނަނުދިނުމަށް ކަމަށް ޗީފް އޮފް ޑިފެންސް ފޯސް މޭޖާ ޖެނެރަލް އިބްރާހީމް ހިލްމީ ވިދާޅުވެއްޖެ އެވެ.
އަލިފާނުގެ ހާދިސާއާ ގުޅިގެން ބޭއްވި ނޫސްވެރިންގެ ބައްދަލުވުމުގައި ހިލްމީ ވިދާޅުވި ގޮތުގައި އެ ހާދިސާގެ މައުލޫމާތު ލިބުނީ ބުރާސްފަތި ދުވަހުގެ ހެނދުނު 6:27 ގަ އެވެ.
ހިލްމީ ވިދާޅުވީ ހެނދުނު 6:30 ހާއިރު ހާދިސާ ހިނގައިގެން އުޅޭ ސަރަހައްދަށް ގޮސް އަލިފާން ނިއްވުމަށް ފުރަތަމަ ޓީމްގެ މަސައްކަތް ފެށި ކަމަށެވެ.
"އެ ގޮތުން އަޅުގަނޑުމެން ދެ ޓީމަކަށް ބެހިގެން އިމާރާތުގެ އެތެރެއަށް ވަދެ އަލިފާން ރޯވެފައި ހުރި ތަންތަން ހޯދުމަށްޓަކައި ދެނެގަތުމަށްޓަކައި މަސައްކަތް ފެށިގެންދިޔަ،" ހިލްމީ ވިދާޅުވި އެވެ.
އޭނާ ވިދާޅުވީ އޭރު ވަރަށް ބޮޑަށް ދުން އަރަމުންދިޔަ ކަމަށާއި އަލިފާނުގެ ނިޝާނެއް ފެންނަން ނެތުމުން ތާމަލް ކެމެރާއެއްގެ އެހީގައި އަލިފާން ހިފާފައި ހުރި ތަންތަން ދެނެގަނެ އަލިފާން ނިއްވަން ފެށި ވަގުތު އަލިފާން ފަޅައިގެން ގޮސް ފެތުރެން ފެށި ކަމަށެވެ.
އެއާއެކު އެތެރޭގައި ތިބުމަކީ އެންމެ ރައްކާތެރިކަމަކަށް ނުވާތީވެ ޓީމުތައް ބޭރަށް ނިކުމެ އަނެއްކާވެސް އަލިފާން ނިއްވުމުގެ މަސައްކަތް ފެށުނު ކަމަށް ހިލްމީ ވިދާޅުވި އެވެ.
"އަޅުގަނޑުމެން އެންމެ ބޮޑު އިސްކަމެއް ދިނީ މީގައި އެއްވެސް މީހެއްގެ ފުރާނައަށް ގެއްލުމެއް ނުލިބި އަދި ރައްޔިތުންގެ މުދަލަށްވެސް ގެއްލުމެއް ނުލިބި ކޮންޓްރޯލް ކުރުމަށް،" ހިލްމީ ވިދާޅުވި އެވެ.
މާލޭގައި ބުރާސްފަތި ދުވަހު ހެނދުނު ސަރުކާރުގެ ރަސްމީ ގަޑި ފެށުމުގެ ކުރިން އަލިފާން ފުރަތަމަ ރޯވީ ހައުސިން މިނިސްޓްރީ ގައެވެ.
އޭގެފަހުން އަލިފާން ރޯވީ ހައުސިން މިނިސްޓްރީއާއި ޖެހިގެން ކޮންސްޓްރަކްޝަން މިނިސްޓްރީގަ އެވެ. އަލިފާންގަނޑު އިތުރަށް ފެތުރި އިރުގަނޑެއް ފަހުން ދެން ރޯވީ އެންވަޔަރަންމަންޓް މިނިސްޓްރީ ގައެވެ.