ސީރިއާގެ ދާޚިލީ ހަނގުރާމައިގެ ސަަބަބުން ގައުމު ދޫކޮށް އެކި ދިމަދިމާއަށް ރެފިއުޖީންގެ ގޮތުގައި ދަތުރުކުރި ގިނަ ބަޔަކު އެނބުރި ގައުމަށް ދިއުމަށް ޝައުގުވެރިވާކަން ޚަބަރުތަކުން ހާމަވެ އެވެ.
ޔޫރަޕްގެ ބައެއް ގައުމުތަކުގައި ތިބި ސީރިއާގެ ރެފިއުޖީން އަމިއްލަ ރުހުމުގައި ރަށަށްދާ ނަމަ، އެ ގައުމުތަކުގެ ސަރުކާރުން މާލީ އެހީތެރިކަން ފޯރުކޮށްދޭން ތައްޔާރު ކަމަށްވެސް ވަނީ ބުނެފަ އެވެ.
ތުރިކީގެ ދާޚިލީ ވަޒީރު އަލީ ޔެރުލިކަޔާ ވިދާޅުވި ގޮތުގައި އެ ގައުމުގައި ތިބި ރެފިއުޖީންގެ ތެރެއިން 1،800 އަށް ވުރެ މީހުން އެނބުރި ސީރިއާއަށް ހިނގައްޖެ އެވެ. މިއީ ސީރިއާގެ ހަނގުރާމަ ހުއްޓި ވެރިކަން ބަދަލުވުމާ ގުޅިގެން ލިބުނު ކުރިއެރުމެއް ކަމަށް ވަޒީރު ވިދާޅުވި އެވެ.
ތުރުކީގައި މިހާރުވެސް 2،938،261 އަށް ވުރެ ގިނަ ސީރިއާ ރެފިއުޖީން ދިރިއުޅޭ ކަމަށް ދާޚިލީ ވަޒީރު ވިދާޅުވި އެވެ. އޭނާ އަދި ވިދާޅުވީ އަސަދުގެ ވެރިކަން ވެއްޓުމާ ގުޅިގެން ސީރިއާއަށް ދާން ބޭނުން މީހުން އިތުރުވަމުން އަންނަ ކަމަށެވެ.
ތުރުކީގެ ރައީސް ރަޖަބް ތައްޔިބު އުރުދުޣާން ވިދާޅުވި ގޮތުން އަމިއްލަ އިޚުތިޔާރުގައި ސީރިއާއަށް ދާން ބޭނުން މީހުންނަށް ސަރުކާރުން އެހީތެރިވާނެ އެވެ. އަދި މަޖުބޫރުން މީހުން ބޭލުމުގެ ވިސްނުން އަދި ނެތް ކަމަށްވެސް ވިދާޅުވި އެވެ.
އުރުދުޣާން ދެކެވަޑައިގަންނަވާ ގޮތުގައި ސީރިއާގެ މަސްރަހު ހަމައަކަށް އެޅޭ ނިސްބަތުން އެނބުރި ދާން ބޭނުންވާ މީހުން އިތުރުވާނެ އެވެ. ސަރުކާރުން މާބޮޑަށް ޕްރެޝަރު ނުކުރިއެއް ކަމަކު އަމިއްލަ ވަޒަނަށް ކޮންމެ މީހަކުވެސް ދާން ބޭނުންވާނެ އެވެ.
ސީރިއާގެ ސަރުކާރާ ދެކޮޅު ހަނގުރާމަވެރިން، ވެރިރަށް ދިމިޝްގަަށް ވަދެގަނެ އަސަދުގެ ވެރިކަން ވައްޓާލީ ޑިސެމްބަރު އަށެއްގަ އެވެ. އޭރު ވެރިކަމުގައި ހުންނެވި އަސަދު ގައުމު ދޫކުރައްވައި ވަޑައިގަތީ ރަޝިއާއަށެވެ.
ސީރިއާގައި އާންމު އިންތިޚާބެއް ބޭއްވެންދެން ވަގުތީ ސަރުކާރެއް މިހާރު ވަނީ އެކުލަވާލާފަ އެވެ. ބޮޑުވަޒީރުގެ މަގާމަށް އައްޔަންކުރެއްވީ މުހައްމަދު އަލް ބަޝީރެވެ. މިއީ އިދިކޮޅު ހަނގުރާމަވެރިން ނިސްބަތްވާ ހައިއަތު ތަހުރީރުއްޝާމްގެ ވެރިންނާ ވަރަށް ގާތް ގުޅުމެއް އޮންނަ ބޭފުޅެކެވެ.