ކުރިއަށް އޮތް 20 އަހަރު ދުވަހަށް އަމާޒުކޮށްގެން މާސްޓާޕްލޭން ހަދައިދިނުމަށް ބަޔަކު ހޯދުމަށް ކުރި އިއުލާން އިސްލާހުކޮށް އަލުން ބަޔަކު ހޯދުމަށް އިއުލާންކޮށްފި އެވެ.
މާސްޓާޕްލޭން އެކުލަވާލުމަށް ބަޔަކު ހޯދަން ފިނޭންސް މިނިސްޓްރީން އެންމެ ފުރަތަމަ އިއުލާންކުރީ މިމަހުގެ އެއްވަނަ ދުވަހު އެވެ.
ދެވަނަ ފަހަރަށް މިއަދު ކުރި އިއުލާންގައި ވަނީ 20 އަހަރުގެ ގައުމީ ތަރައްގީގެ ޕްލޭނެއް އެކުލަވާލުމަށް ބޭނުންވާ ލޯކަލް ކޮންސަލްޓެންސީ ފާމްތަކުގެ ތެރެއިން ޝަރުތު ހަމަވާ ހުރިހާ ފަރާތްތަކަކަށް އެކްސްޕްރެޝަން އޮފް އިންޓްރެސްޓް (އީއޯއައި) ހުށަހެޅުމަށް ފުރުސަތު ހުޅުވާލާފަ އެވެ.
ގައުމީ ތަރައްގީގެ ޕްލޭނެއް އެކުލަވާލުމުގެ މަގުސަދަކީ ކުރިއަށް އޮތް 20 އަހަރު ދުވަހުގެ ތެރޭގައި ރާއްޖޭގެ ދެމެހެއްޓެނިވި އިގްތިސާދީ، އިޖުތިމާއީ، ތިމާވެށި އަދި އާބަން ޑިވެލޮޕްމަންޓް ގައުމީ ތަރައްގީގެ ޕްލޭނެއް އެކުލަވާލުމެވެ. މި ޕްލޭންގައި ނެޝަނަލް ޑިވެލޮޕްމަންޓް ޕްލޭން ފައިދާހުރި ގޮތެއްގައި ތަންފީޒުކުރުމާއި، މޮނިޓަކުރުމާއި، އިވެލުއޭޓްކުރެވޭނެ މެކޭނިޒަމްތައް ހިމަނަން ޖެހެ އެވެ.
އެހެންވެ މި މަސައްކަތައް ޝައުގުވެރިވާ ފަރާތްތަކުން މަސައްކަތް ކުރުމުގެ ގާބިލްކަން ސާބިތުކޮށްދޭ ލިޔެކިޔުންތައް ހުށަހެޅުމަށް ވަނީ ހުޅުވާލާފަ އެވެ. ހުށަހަޅަންޖެހޭ ލިޔުންތަކުގެ ތެރޭގައި ކުންފުނީގެ ފަންނީ ގާބިލްކަން، ދާއިރާއިން ކޮށްފައިވާ މަސައްކަތްތަކުގެ ތަފްސީލް، މަސައްކަތްތަކުގެ އަގު އަދި މިފަދަ މަސައްކަތެއް ކުރުމުގެ ހުނަރާއި ގާބިލުކަން ހުރި މިންވަރު އެނގޭފަދަ ލިޔުންތައް ހިމެނެ އެވެ.
އިއުލާންގައިވާ ގޮތުން މާސްޓާޕްލޭން އެކުލަވާލުމަށް ޕްރޮޕޯސަލް ހުށަހަޅަން ފުރުސަތު ދިނުމަށް ހަމަޖެހިފައިވަނީ މި މަސައްކަތަށް ޝައުގުވެރިކަން ފާޅުކުރާ ފަރާތްތަކުގެ ތެރެއިން ޝޯޓް ލިސްޓް ކުރެވޭ ފަރާތްތަކަށް އެކަންޏެވެ.
މިމަސައްކަތްތަކާ ގުޅޭ މައުލޫމާތު ހިމެނޭ ގޮތަށް ތައްޔާރުކޮށްފައިވާ ޓާމްސް އޮފް ރިފަރެންސް (ޓީއޯއާރް) ފިނޭންސް މިނިސްޓްރީގެ ވެބްސައިޓުން ޑައުންލޯޑް ކުރެވޭނެ ގޮތް ވަނީ ހަމަޖައްސާފަ އެވެ. މިމަސައްކަތާ ގުޅިގެން ދޫކުރެވޭ އެންމެފަހުގެ މައުލޫމާތުތައް ފިނޭންސް މިނިސްޓްރީގެ ވެބްސައިޓް މެދުވެރިކޮށް ހޯދުމަކީ ބީލަމަށް ކުރިމަތިލާ ފަރާތުގެ ޒިންމާއެއް ކަމަށްވެސް އިއުލާންގައިވެ އެވެ.
މާސްޓާޕްލޭން ހަދައިދިނުމަށް ޝައުގުވެރިވާ ފަރާތްތަކުން އެކްސްޕްރެޝަން އޮފް އިންޓަރެސްޓް ހުށަހަޅަންޖެހެނީ ކުރިއަށް އޮތް ޖެނުއަރީ ހަތްވަނަ ދުވަހުގެ މެންދުރުފަހު 2:00ގެ ކުރިން އީމެއިލް މެދުވެރިކޮށެވެ.
ކުރިއަށް އޮތް 20 އަހަރުގެ މާސްޓާ ޕްލޭން އެކުލަވާލުމުގެ މަސައްކަތް ސަރުކާރުން ފަށާފައިވަނީ މިދިޔަ މަހުގެ ހަވަނަ ދުވަހު އެވެ. މި ޕްލޭން ވާނީ ދެމެހެއްޓެނެވި ގޮތެއްގައި ރާއްޖޭގެ ތަރައްގީ ބައްޓަންކޮށް، މުސްތަގުބަލުގައި ގައުމު ދަތުރުކުރާނެ ގޮތުގެ މިސްރާބު ކަނޑައެޅުމުގައި މުހިއްމު މަގުޗާޓަކަށް ކަމުގައި ސަރުކާރުން ބުނެ އެވެ.