ބީބީސީއިން ރިޕޯޓުކޮށްފައިވާ ގޮތުގައި އެމެރިކާގެ ސްްޓާބަކްސް ކޮފީ ޗެއިންގެ 11،000 އަށް ވުރެ ގިނަ ބަރިސްޓާއިން މުސާރައާއި މަސައްކަތުގެ ހާލަތާ މެދު ހިތްހަމަނުޖެހިގެން ފަސް ދުވަހުގެ ހަޅުތާލެއް ފަށައިފި އެވެ.
ސްޓާބަކްސް ވޯކާސް ޔުނައިޓެޑްގެ ބަޔާނެއްގައި ބުނެފައިވާ ގޮތުން މި ހަޅުތާލު ފަށާފައިވަނީ ހުކުރު ދުވަހު ލޮސް އެންޖެލެސް، ޗިކާގޯ އަދި ސިއެޓަލްގެ ސްޓާބަކްސް ފިހާރަތަކުގައެވެ. އެއްބަސްވުމަކަށް ނާދެވިއްޖެނަމަ ކްރިސްމަސް އީވްއާ ހަމައަށް މި ހަޅުތާލު ގައުމުގެ އެކި ކަންކޮޅުތަކަށް ފެތުރިގެންދާނެ ކަމަށް ޔޫނިއަނުން ބުނެ އެވެ.
މި ހަޅުތާލުގެ މައިގަނޑު މަގުސަދަކީ މުވައްޒަފުންގެ މުސާރަ އިތުރުކޮށް، މުވައްޒަފުންގެ އަދަދު އިތުރުކޮށް އަދި މަސައްކަތުގެ ވަގުތުތައް ރަނގަޅުކުރުމަށް ގޮވާލުމެވެ.
ހަޅުތާލާ ގުޅިގެން ސްޓާބަކްސްގެ ތަރުޖަމާނެއް ބީބީސީއަށް ދިން ބަޔާނެއްގައި ބުނެފައިވަނީ އެއްބަސްވުމަކަށް އާދެވޭތޯ މަޝްވަރާކުރުމަށް ތައްޔާރަށް ތިބި ކަމަށާއި ޔޫނިއަނުން މޭޒުދޮށަށް އަނބުރާ އައުމަކީ މުހިއްމު ކަމެއް ކަމަށެވެ.
މިއީ ދެ އަހަރު ކުރިން ޔޫނިއަނާއެކު އެއްބަސްވުމަކަށް އާދެވޭތޯ މަސައްކަތް ފެށި ފަހުން، ވޯކާސް ޔުނައިޓެޑްއިން ހިންގި އެންމެ ބޮޑު ހަރަކާތެވެ. ދެހާސް އެކާވީހުގައި އެމެރިކާގެ ފުރަތަމަ ސްޓާބަކްސް ފިހާރައެއް ޔޫނިއަނާ ގުޅުނު ފަހުން، މިހާރު 45 ސްޓޭޓްގެ 500 އަށް ވުރެ ގިނަ ފިހާރައެއްގައި ޔޫނިއަންގެ މެންބަރުން ތިބި ކަމަށް ބީބީސީގައި ރިޕޯޓްކޮށްފައިވެ އެވެ.
ޓެކްސާސްގެ ސްޓާބަކްސްގެ ބަރިސްޓާއެއް ކަމަށްވާ ފާތިމާ އަލްހަޖަބޫދީ ބީބީސީއަށް ދިން ބަޔާނެއްގައި ބުނެފައިވަނީ މިފަހަރުގެ ހަޅުތާލަކީ ކަންކަން ރަނގަޅުކުރަން ދޭ އެންމެ ފަހު ފުރުސަތު ކަމަށެވެ.
"ސްޓާބަކްސްއިން އެތައްހާސް ބަރިސްޓާއިންނަށް ވެފައިވާ ވައުދު އޮޅާލާފައިވާތީ، އަޅުގަނޑުމެންނަށް މިނޫން އެހެން ގޮތެއް ނެތް،" އޭނާ ބުންޏެވެ.
މީގެ ކުރިން ޔަހޫދީންނަށް ސްޓާބަކްސް އިން އެހީވާ ކަމަށް ތުހުމަތުކޮށް ސްޓާބަކްސް ބޮއިކޮޓްކުރުމުގެ ހަރަކާތެއް ހިންގާފައިވެ އެވެ. އެމަކާ ގުޅިގެން އެކުންފުންޏަށް މާލީގޮތުން ގެއްލުތަކެއް ވެފައިވާ ދަނޑިވަޅެއްގައި ބެރިސްޓާއިން ހަޅުތާލުކުރަން ފެށުންވާނީ ވެސް މާލީގޮތުން ގެއްލުންތަކެއް ލިބޭނެ ކަމެއް ކަމަށް މައްސަލަ ދިރާސާކުރާ ފަރާތްތަކުން ބުނެ އެވެ.