އިހަވަންދިއްޕޮޅުގެ ބަނދަރުގައި ފުރަތަމަ ފަހަރަށް ބޭރުގެ ޔޮޓަކަށް ކްލިއަރެންސް ހިދުމަތް ފޯރުކޮށްދީފި އެވެ.
އިހަވަންދިއްޕޮޅުގައި އެމްޕީއެލް އިން ގާއިމުކޮށްފައިވާ "އިންޓަނޭޝަނަލް ޝިޕް އެންޑް ޕޯޓް ސެކިއުރިޓީ ގޭޓް" އިން މި ހިދުމަތް ފޯރުކޮށްދިނީ މިއަދުގެ ވަގުތެއްގައެވެ.
އެމްޕީއެލްގެ ސީއީއޯ މުހައްމަދު ވަޖީހު ވިދާޅުވި ގޮތުން މިއީ ފަތުރުވެރިން ގޮވައިގެން ރާއްޖެ އައި ޔޮޓެކެވެ. އަދި ކުރިއަށް އޮތް ދުވަސްތަކުގައި ރާއްޖެއަށް ފަތުރުވެރިން ގޮވައިގެން ގިނަ އަދަދެއްގެ ޔޮޓުފަހަރު ދަތުރުކުރާނެ ކަމަށް ލަފާކުރެވޭ ކަމަށްވެސް ވިދާޅުވި އެވެ.
އެމްޕީއެލްއިން މިފަދަ ޔޮޓުފަހަރަށް ބޭނުންވާ ހުރިހާ ހިދުމަތްތަކެއް ފޯރުކޮށްދިނުމަށް ފުރިހަމައަށް ތައްޔާރުވެފައި ކަމަށްވެސް އެ ކުންފުނިން ބުނެ އެވެ.
މި ހިދުމަތް ތައާރަފުކުރުމާއެކު، ރާއްޖޭގެ ޓޫރިޒަމް ދާއިރާއަށް އިތުރު ކުރިއެރުންތަކެއް ލިބިގެންދާނެ ކަމަށްވެސް އެމްޕީއެލް އިން ޔަގީންކުރެ އެވެ.