އެމެރިކާގައި ނޮވެމްބަރު ފަހެއްގައި އޮތް ރިޔާސީ އިންތިޚާބު ދޫކޮށްލެވުނީތީ ހިތާމަކުރައްވާ ކަމަށް އެމެރިކާގެ މިހާރުގެ ރައީސް ޖޯ ބައިޑަން ވިދާޅުވެއްޖެ އެވެ.
ބައިޑަން ދެކެވަޑައިގަންނަވާ ގޮތުގައި އިންތިޚާބުގައި ވާދަކުރެވުނު ނަމަ، ޓްރަމްޕަށް ވުރެ ރަނގަޅު ނަތީޖާއެއް އޭނާއަށް ލިބުނީހެވެ.
ބައިޑަންގެ ފުތަމަ ދައުރު އަންނަ އަހަރުގެ ޖެނުއަރީ 20 ގައި ނިމޭއިރު، އޭނާއަށް އަދިވެސް ހަތަރު އަހަރުގެ އެއް ދައުރު އެބަ އޮތެވެ. މިހެން ކަން އޮތުމުން ބައިޑަން މަސައްކަތްކުރެއްވީ ދެވަނަ ދައުރު ކާމިޔާބުކުރައްވައި ރައީސްގެ މަގާމުގައި ދެމިހުންނެވުމަށެވެ.
ނަމަވެސް، ކެމްޕޭންކުރެއްވުމުގައި ހެއްދެވުނު ގޯސްތަކުގެ ސަބަބުންނާއި ޓްރަމްޕާ ވާދަކުރައްވައި ބަސްމަގު އޮޅިވަޑައިގަތުމުގެ ސަބަބުން ބައިޑަންއަށް އޮތް ތާއީދު ވަރަށް ބޮޑަށް ދަށްވެގެން ދިޔަ އެވެ.
ބައިޑަންގެ ސިއްހީ ހާލަތު ހުރި ގޮތުންނާއި، އުމުރުން ދުވަސްވުމުގެ ސަަބަބުން އެމެރިކާ ކަހަލަ ގައުމުގެ ރައީސްކަމަށް ކުރިމަތިލެއްވުމާ މެދު ޚުދު ބައިޑަންގެ އަމިއްލަ ޕާޓީން ވެސް އިއުތިރާޒުކުރި އެވެ.
ރައީސްގެ މަގާމުގައި މި ހިނގާ ފުރަތަމަ ދައުރުގައި ސިޔާސީ ގޮތުން އެންމެ ރަނގަޅު ނޫން ސިޔާސަތުތަކަށް އިސްކަން ދެވިފައިވާ ކަމަށްވެސް ބައިޑަން ވިދާޅުވި އެވެ.
ވާހަކަދެއްކުމުގައި ދޫއޮޅި ވަޑައިގަތުމާއި ހުންނެވެނީ ކޮން ތަނެއްގައިކަން ނޭނގޭ ފަހަރުވެސް ބައިޑަން ވަނީ ތަޖުރިބާކުރައްވާފަ އެވެ. މި ފަދަ ހާދިސާތަކާ ގުޅިގެން ބައިޑަން ބުއްދީގެ ހާލަތު ބެލުމަށް ވެސް އިދިކޮޅުން ސިޔާސީ ލީޑަރުން ވަނީ ގޮވާލާފަ އެވެ.
ބައިޑަންގެ ބަދަލުގައި އޭނާގެ ޑިމޮކްރެޓިކް ޕާޓީން އިންތިޚާބަށް ނުކުމެވަޑައިގަތީ ކަމަލާ ހެރިސް އެވެ. ނަމަވެސް، ޓްރަމްޕަށް އޮތް ބޮޑު ތާއީދާ އެކު އެއްބުރުން އޭނާ ވަނީ އިންތިޚާބު ކާމިޔާޞުކުރައްވާފަ އެވެ.