އެމެރިކާގައި ނޮވެމްބަރު ފަހެއްގައި އޮތް ރިޔާސީ އިންތިހާބުގެ ނަތީޖާ ގަބޫލުކުރައްވާ ކަމަށް -- ޑިމޮކްރެޓިކް ކެންޑިޑޭޓް އަދި މިހާރުގެ ނައިބު ރައީސް ކަމަލާ ހެރިސް ވިދާޅުވެއްޖެ އެވެ.
ކަމަލާއަށް ތާއީދުކުރެއްވި އަދި ވެރިކަމަށް ހޮވުމަށް މަސައްކަތް ކުރެއްވި ސަޕޯޓަރުނާ މުހާތަބުކުރައްވައި، އިންތިހާބުގެ ނަތީޖާ ގަބޫލުކުރަމަށް ވަނީ އެދިވަޑައިގެންފަ އެވެ.
ކަމަލާ ވިދާޅުވީ ވެރިކަން ބަދަލުވެގެންދާ މަރުހަލާތަކުގައި އޭނާގެ ސަރުކާރުން ހުރިހާ އެއްބާރުލުމެއް، އިންތިހާބީ ރައީސް ޑޮނަލްޑް ޓްރަމްޕަށް ދެއްވާނެ ކަމަށެވެ.
އިންތިހާބުގެ ފޯރީގައި ބަލިގަބޫލުކުރެއްވުން ފަސޭހަ ނޫން ކަމަށްވެސް ކަމަލާ ވިދާޅުވި އެވެ. އޭނާވިދާޅުވީ މިއީ ޖޯޝަށް ވުރެ ގައުމީ އެއްބައިވަންތަކަން ކަށަވަރުކުރުން މުހިއްމު ވަގުތެއް ކަމަށެވެ.
އެމެރިކާއަށް ރައީސަކު ހޮވުމަށް އަންގާރަ ދުވަހު ބޭއްވި ރިޔާސީ އިންތިހާބުގައި ރިޕަބްލިކަން ކެންޑިޑޭޓް ޑޮނަލްޑް ޓްރަމްޕަށް 295 އިލެކްޓޯރަލް ވޯޓު މިހާތަނަށް އޮތީ ލިބިވަޑައިގެންފަ އެވެ. ޑިމޮކްރެޓިކް ކެންޑިޑޭޓް ކަމަލާ ހެރިސްއަށް ލިބިވަޑައިގަތީ 226 އިލެކްޓޯރަލް ވޯޓެވެ. އިންތިހާބު ކާމިޔާކުރަން ބޭނުންވަނީ 270 އިލެކްޓޯރަލް ވޯޓެެވެ.
ކަމަލާ ވިދާޅުވީ އިންތިހާބަށްފަހު ޑޮނަލްޑް ޓްރަމްޕަށް ފޯނުކުރައްވައި މަރުހަބާ ވިދާޅުވި ކަމަށެވެ. އަދި މި ވަގުތު ސަރުކާރުގައި ތިބި ނަމަވެސް ވެރިކަން ބަދަލުވެގެން ދިއުމަށް އެއްބާރުލުން ދެއްވާނެ ކަމަށްވެސް ވިދާޅުވި އެވެ.
ކަމަލާ ވިދާޅުވި ގޮތުގައި އިންތިހާބު ކާމިޔާބު ނުކުރެވުމަކީ ވަގުތީ ދެރައަކަށް ހައްދަވާނެ ކަމަށެވެ. އެކަމަކު އެއީ ހަސަދަވެރި ކަމަށާއި ދެކޮޅުވެރިކަމަށް މަގުފަހިކުރުވާ ކަމަކަށް ވެގެން ނުވާނެ ކަމަށް ވިދާޅުވި އެވެ.
ޑޮނަލްޑް ޓްރަމްޕްގެ ވެރިކަމުގައި ދުނިޔެ ތަޖުރިބާކުރަން ޖެހިދާނެ ހާލަތަކަށް ގައުމުތަކުގެ ލީޑަރުން މިހާރު ވެސް ތިއްބެވީ ބިރުންނެވެ. ޓްރަމްޕްގެ ކެމްޕޭން އެއްވުންތަކުގައި ވަރަށް ފާޅުކޮށް އޭނާ ވަނީ ދުނިޔޭގެ ސިޔާސަތަށް ގެންނަވާނެ ބަދަލުތަކާ ބެހޭ ގޮތުން ވާހަކަދައްކަވާފަ އެވެ.
ޔޫރަޕުން ޖިޒީ ނެންގެވުމާއި ނޭޓޯ އުވާލުން އަދި ގައުމުތަކުގައި ތިބި އެމެރިކާ ސިފައިން އަނބުރާ ގައުމަށް ގެނައުން ފަދަ ބަަދަލުތައް ފެނިދާނެ ކަމަށް މަސްރަހު ދިރާސާކުރާ މީހުންވެސް ބުނެ އެވެ.