އެމެރިކާގެ ކުރީގެ ރައީސް ޖިމީ ކާޓަރު އުމުރުން 100 އަަހަރުގައި -- ޑިސެމްބަރު 29، 2024 ގައި -- އާދީއްތަ ދުވަހު ވަނީ އަވަހާރަވެފަ އެވެ. އޭނާ އުފަންވެ ވަޑައިގަތީ އޮކްޓޯބަރު 1، 1924 ގައެވެ.
ޖިމީ ކާޓަރުގެ ޖަނާޒާ ވޮޝިންޓަނުގައި، ރަސްމީ އިއްޒަތުގައި ބޭއްވުމަށް އެމެރިކާގެ ރައީސް ޖޯ ބައިޑަން ވަނީ އަމުރުކުރައްވާފަ އެވެ.
އެމެރިކާގައި ރަސްމީ އިއްޒަތުގައި ޖަނާޒާއެއް ބާއްވާނަމަ، ގާނޫނު ހަދާ މަޖިލީހުގެ އާންމު ގެއަށް ސަންދޯ ގެންދެ އެވެ. އެއީ ޒިޔާރަތްކުރަން ބޭނުން ބަޔަކަށް ފަސޭހަކޮށްދިނުމަށާއި، ޖަނާޒާގައި އެ މީހުން ގަބޫލުކުރާ މިންގަޑުތައް ފުރިހަމަކުރުމަށެވެ.
ޖިމީ ކާޓަރު އަވަހާރަވުމާ ގުޅިގެން ދުނިޔޭ ނުފޫޒުގަދަ ލީޑަރުންނާއި ސިޔާސީ ލީޑަރުން ދަނީ ހިިތާމައާ އެކު ޝުއޫރުފާޅުކުރަމުންނެވެ.
މި ހިތާމާގައި ބައިވެރިވެވަޑައިގެން ޗައިނާގެ ރައީސް ޝީ ޖިންޕިން ވެސް ވަނީ އެމެރިކާގެ ރައީސް ޖޯ ބައިޑާންއަށް އަދި ކާޓަރުގެ އާއިލާއަށް ތައުޒިޔާ ވިދާޅުވެފަ އެވެ.
ތައުޒިޔާ ވިދާޅުވި އެމެރިކާގެ ލީޑަރުންގެ ތެރޭގައި ބާރަކް އޮބާމާ އާއި ޑޮނަލްޑް ޓްރަމްޕް އަދި ރައީސްކަން ކުރެއްވި ކްލިންޓަން ފަދަ ލީޑަރުން ހިމެނެ އެވެ.
ޖިމީ ކާޓަރު އެމެރިކާގެ ރައީސްގެ މަގާމު އަދާކުރެއްވީ ޖެނުއަރީ 20، 1977 - ޖެނުއަރީ 20، 1981 އަށެވެ. އޭނާއަށް ވެރިކަމުގައި ހުންނެވުނީ ހަތަރު އަހަރު ދުވަހު އެވެ. އެއީ އެމެރިކާގެ ރައީސްގެ މަގާމަށް އިންތިހާބުކުރެވޭ ކެންޑިޑޭޓަކަށް އޮންނަ އެއް ދައުރެވެ.
ރައީސްގެ މަގާމަށް ވަޑައިގަނެވޭ ކޮންމެ ކެންޑިޑޭޓަކަށް ވެސް ހަތަރު އަހަރުގެ ދެ ދައުރު އޮވެ އެވެ. މިހެންކަމުން ދެވަނަ ޓާމެއް ރައްޔިތުންގެ ވޯޓުން ކާމިޔާބުކުރެވިއްޖެނަމަ ވެރިކަމުގައި އަށް އަހަރު ދެމިހުންނެވެ އެވެ.
ކާޓަރުގެ ކުރިން އެމެރިކާގެ ރައީސްގެ މަގާމުގައި ހުންނެވީ ޖެރަލްޑް ފޯޑް އެވެ. ކާޓަރަށް ފަހު ވެރިކަމާ ހަވާލުވެވަޑައިގަތީ ރޮނަލްޑް ރޭގަން އެވެ..
ޖިމީ ކާޓަރު އަވަހާރަވިއިރު އޭނާ ވެފައި މިވަނީ އެންމެ ގިނަ ދުވަހު ދުނިޔޭގައި ހުންނެވުނު ރައީސްކަން ކުރެއްވި ކުރީގެ ރައީސަށެވެ.