ލޮނުފެނުން މަސް ފިނިކުރާ ނިޒާމު ނުވަތަ އާރްއެސްޑަބްލިއު ސިސްޓަމް ގާއިމުކުރުމަށް ދޫކުރަން ނިންމާފައިވާ ލޯނު ފެސިލިޓީއަށް އަލުން ހުޅުވާލުމަށް ފިޝަރީޒް މިނިސްޓްރީން ނިންމައިފި އެވެ.
އެގޮތުން މި މަހުގެ ހަތްވަނަ ދުވަހުން ފެށިގެން އެސްޑީއެފްސީ ޕޯޓަލް މެދުވެރިކޮށް އާރްއެސްޑަބްލިއު ފައިނޭންސިން ފެސިލިޓީއަށް އެދި ހުށަހެޅުމުގެ ފުރުސަތު ހުޅުވާލުމަށް ވަނީ ނިންމާފަ އެވެ.
މި މަޝްރޫއުގެ ދަށުން 700،000 ރުފިޔާ އިން ފެށިގެން 2،000،000 ރުފިޔާއާ ހަމައަށް ލޯނު ދޫކުރާނެ އެވެ.
އާރްއެސްޑަބްލިއު ސިސްޓަމާއި ޖަނަރޭޓަރާއި ސޯލާ ގަތުމަށް ހޭދަކުރާ އަގުގެ 35 ޕަސެންޓް އޮޑިވެރިން އަނބުރާ ދައްކާކަށް ނުޖެހޭނެ އެވެ.
މި ލޯނަށް ހަ މަސްދުވަހުގެ ގްރޭސް ޕީރިއަޑެއްވެސް ލިބޭނެ ކަމަށް ފިޝަރީޒް މިނިސްޓްރީން ބުނެ އެވެ.
އިސްލާމީ ޝަރީއާ ހުއްދަ ކުރާ ހަމަތަކުގެ މަތިން ތަކެތި ގަތް އަގާއި އަގަށް ފައިދާގެ ގޮތުގައި ލާ މިންވަރު ކަނޑައަޅައިގެން ދޫކުރަން ނިންމާފައިވާ މި ލޯން ދެއްކުމަށް 10 އަހަރުގެ މުއްދަތެއް ލިބޭނެ އެވެ.