މާލޭގެ ބޮޑު ސަރަހައްދެއްގައި ބޮޑުވި ފެންގަނޑު ހިންދާލައި، އާއްމު ހާލަތަކަށް ގެނެސްފި އެވެ.
މާލެއަށް އިއްޔެ މެންދުރުން ފެށިގެން ރޭ ދަންވަރާ ހަމައަށް ބޯކޮށް ވާރޭ ވެހުމާއި ގުޅިގެން އިއްޔެ އާ ރެޔާއެކު މާލެގެ ބޮޑު ބައެއް ފެނުގެ އަޑިއަށް ގޮސް އެތައް ބައެއްގެ އާއްމު ދިރިއުޅުމަށް ދަތިވެ، އެތައް ފިހާރައެއް ބަންދު ކުރަން ޖެހުނެވެ.
މޫސުމާބެހޭ ގައުމީ އިދާރާ -- މޯލްޑިވްސް މިޓިއޮރޮލޮޖިކަލް ސާވިސް އިން ހާމަކުރި ގޮތުގައި އިއްޔެ ހެނދުނު 8:00 އިން މިއަދު ހެނދުނު 8:00 އަށް އެންމެ ގިނައިން ވާރޭވެހިފައިވަނީ ހުޅުލެ އާއި މާލެ އަދި ހުޅުމާލެ އަށެވެ.
ހުޅުލެއަށް 144 މިލިމީޓަރުގެ ވާރޭވެހުނުއިރު މާލެއަށް 142.6 މިލިމީޓަރުގެ ވާރޭ އަދި ހުޅުމާލެއަށް 122.5 މިލިމީޓަރުގެ ވާރޭވެހިފައިވެ އެވެ.
ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ހާމަކުރި ގޮތުގައި މާލޭގައި ފެންބޮޑުވެގެން އެކިއެކި އެހީތަކަށް އެދި 774 ތަނަކުން ރިޕޯޓުކޮށްފައިވެ އެވެ.
މީގެތެރެއިން 554 ރިކުއެސްޓައަކީ ވެލިބަސްތާ ޖެހުމަށް އެދި ހުށަހެޅި ރިކުއެސްޓް ކަމަށް އެންޑީއެމްއޭ އިން ބުނެފައިވެ އެވެ.
އެންޑީއެމްއޭ އިން ބުނި ގޮތުގައި 53 ގެއެއްގެ ރެޕިޑް އެސެސްމެންޓް ހަދާފައިވެ އެވެ. މީގެތެރެއިިން 36 ގޭބިސީގެ 226 މީހުންނަށް ވަގުތީ ބޯހިޔާވަހިކަމާއި ކެއިންބުއިން ފޯރުކޮށްދެވިފައިިވާ ކަމަށްވެސް އެ އޮތޯރިޓީން ބުނެފައިވެ އެވެ.